ՀՊԼ 36-րդ տուրում «Փյունիկը» Գյումրիում նվազագույն հաշվով հաղթեց «Շիրակին» և նվաճեց Հայաստանի 16-րդ չեմպիոնությունը։
Հանդիպումից հետո «Փյունիկի» գլխավոր մարզիչ Եղիշե Մելիքյանն ասաց հետևյալը․
«Եղանակային պայմանները հավասարեցրեցին խաղը։ Մենք շատ բան ունեինք կորցնելու և շատ զգույշ էինք գործում, «Շիրակը» ոչինչ չուներ կորցնելու ու ավելի վստահ ու համարձակ էին գործում։ Կարող եմ ասել, որ այդ լարվածությունը մեզ ինչ-որ տեղ խանգարեց․ ինչ-որ տեղ զիջում էինք, բայց մեր փորձի, նվիրվածության ու կազմակերպված խաղի հաշվին հասանք մեր արդյունքին ու ստացանք մեր ուզածը։ Շատ ուրախ եմ, շատ բան կա ասելու, բայց էմոցիաների ազդեցության տակ շատ չեմ խոսի։ Կանցնի մի քանի օր, ես հարցազրույց կտամ ու իմ խոսքը կասեմ։
Ուզում եմ շնորհակալություն հայտնել մեր երկրպագուներին։ Ուր գնացինք, ուր մեզ ուղարկեցին մեր երկրպագուները մեզ հետ են եղել։ Ներողություն եմ խնդրում այն երկրպագուներից, որոնք ինչ-ինչ պատճառներով ներկա չեն եղել մեր խաղերին, դրա պատճառները կան, դրա մասին էլ անպայման կխոսեմ, մեզ մեղադրել պետք չէ մենք այն ակումբն ենք, որը միշտ մտածում է իր երկրպագուների մասին։
Շատ երջանիկ եմ, շատ հարգում եմ մեր նախագահին, գնահատում եմ նրա աշխատանքը․ ամենադժվար պահերին, երբ մենք անկում էինք ապրում, ինձ մոտիվացրեց նրա մի նախադասությունը, և ես նրան խոստացա, որ ես դա կանեմ։ Շատ մոտիվացիաներ ու սկզբունքներ ունեի, բայց այդ խոսքերը ամենաառաջնայինն էին ինձ համար։ Նա ասաց․ «Եղիշ, իմ երազանքն է, որ այս տարի չեմպիոն լինենք, ինձ դա պետք է, ես ուզում եմ դա ստանալ»։ Դա մեծ նպատակ էր ինձ համար, որովհետև ես տեսնում եմ՝ նա որքան է գնահատում մեր աշխատանքը, ամեն ինչով աջակցում է»։
-Հանդես էիք գալիս բնական խոտածածկի վրա, դա խանգարող հանգամա՞նք էր։
-Այո։ Խոտածածկը մեզ միշտ է խանգարել։ Եթե տեսաք, վերջում Վակուլենկոն, Ժունինյոն խնդիրներ ունեցան այդ պատճառով։ «Նոայի» իսպանացի մասնագետի հարցազրույցն էլ եմ լսել, երբ ասաց, որ խոտածածկն իրենց խանգարում է։ Եթե չեմ սխալվում, մենք բնական խոտածածկի վրա 10 հոգով հաղթեցինք իրենց, և նրանք արհեստական խոտածածկի վրա կարողացան 5-0 հաղթանակ տանել։ Ուզում եմ ասել, որ մենք պատրաստ ենք ամեն խոտածածկի վրա պայքարել և արդյունքի հասնել, դառնալ չեմպիոն։ Այո, դժվարություններ լինում են, բայց մենք այդպես գնում ենք առաջ։ Ոչ մի անգամ չենք փորձել արդարանալ։ Մենք կարողանում ենք և՛ ճիշտ պարտվել, և՛ ճիշտ հաղթել։
-Իհարկե, չեմպիոն դառնալը կարևոր է, բայց ավելի կարևոր է այն կայունությունը, որ թիմն ունի վերջին 3 տարիներին։ Այս ընթացքում նաև կարևոր ֆուտբոլիստներ են թիմից գնացել, ինչպե՞ս է հաջողվել այդ կայունությունը պահել և միշտ լինել չեմպիոնական մրցավազքում։
-Սա ամենաբարդ հարցն է։ Ես միշտ ունեցել եմ խնդիրներ, բայց ոչ մի անգամ անակնկալի չեմ եկել, որովհետև ես ինձ համարում եմ պրոֆեսիոնալ, իսկ պրոֆեսիոնալն իրավունք չունի անակնկալի գալու։ Ես միշտ պատրաստ եմ յուրաքանչյուր դժվարության․ այն պետք է ընդունել այնպես, ինչպես ֆուտբոլիստը դաշտում գնդակն է ընդունում։ Ես ոչ մի անգամ չեմ փախչուն խնդիրներից, ընդունում եմ, աշխատում եմ։ Պատրաստ եմ խնդիրներով աշխատել, ուղղակի շատ մեծ ցավ եմ ապրում, որ այդ ամենն արհեստական է լինում։ Մենք արժանի չենք դրան։ Մենք արժանի ենք միասնական աշխատելուն ու մեր հայկական ֆուտբոլն առաջ տանելուն։