«Արարատ-Արմենիայի» գլխավոր մարզիչ Վարդան Մինասյանն այսօր մամուլի ասուլիս է հրավիրել և անդրադարձել մի շարք հարցերի:
Ուրիշ խաղ կտեսնեինք, եթե «Նոայի» հետ հանդիպումն ուրիշ ժամանակ լիներ
«Համոզված եմ՝ եթե «Նոայի» հետ առաջնության խաղը չլիներ գավաթի եզրափակչից հետո, բոլորովին այլ խաղ էր լինելու ոչ թե հաշվի ու արդյունքի տեսանկյունից, այլ իր մտքով ու փիլիսոփայությամբ: Կարծում եմ՝ էմոցիան դրական լինի, թե՝ բացասական, մեծ էներգիա է տանում: Իհարկե, հաղթած խաղից հետո ավելի հեշտ ես պատրաստվում, բայց էմոցիաների պակաս իսկապես զգացի այդ խաղում: Առաջին խաղակեսում հատկապես դա շատ զգացվեց: Երկրորդ կեսում մի փոքր փոխվեց ամեն ինչ. ժամանակը միակ բանն է, որ երբեք չես կարող հետ բերել: 45 րոպե ունեինք, ու պետք էր ցույց տալ այն, ինչին մենք սովոր ենք: Կարծում եմ՝ թիմին դա հաջողվեց, հատկապես 10 հոգով մենք ավելի շատ պահեր ստեղծեցինք, բայց համոզված եմ՝ ուրիշ խաղ կտեսնեինք, եթե այդ հանդիպումն ուրիշ ժամանակ լիներ»:
Արթուր Սերոբյանի և Ժիրայր Շաղոյանի մասին
«Արթուր Սերոբյանին և Ժիրայր Շաղոյանին խորհուրդ կտամ դեռ մնալ Հայաստանում և կայանալ գոնե մոտ 6 ամիս: Սերոբյանին ավելի շատ իր վնասվածքները խանգարեցին, իսկ Շաղոյանը դեռ հոգեբանորեն պետք է կայանա: Տենտոնը 99 տոկոսով չի լինելու թիմում: Նա արդեն այնքան հասունացել է, որ գնա: Ունենք 3-4 ֆուտբոլիստի ցուցակ, որ ցանկանում ենք տեսնել մեր թիմում թե՛ Հայաստանի առաջնությունից, թե՛ դրսից: Նախնական խոսակցություններ եղել են, հետագան պարզ կլինի մոտ ժամանակներս:
Շաղոյանի մոտ պրոգրես կա, բայց պետք է ավելացնի խաղային որակների առումով: Նա բոլոր շանսերն ունի հայտնվելու թոփ-5 առաջնություններում, միանգամայն անկեղծ եմ ասում: Բայց շատ կարևոր է հոգեբանության, վստահության հարցը: Այն որակները, որ նա ունի, քիչ ֆուտբոլիստներ ունեն: Իր որակները տաղանդի առումով կարող եմ համեմատել Էդգար Մանուչարյանի որակների հետ: Հուսով եմ՝ նա չի ունենա կարիերայի այն հետագիծը, որն ունեցավ Էդգար Մանուչարյանը»:
