Արտաշատում մայիսի 19-20-ը 28-րդ անգամ անցկացվել է Հայաստանի բազմակի չեմպիոն, ազատամարտիկ Գառնիկ Ղուկասյանի անվան աթլետիկայի միջազգային հուշամրցաշարը, որին ավելի քան 120 մարզիկ է մասնակցել՝ Երևանից, Վանաձորից, Կապանից, Արտաշատից, Գյումրիից և Վրաստանից: Այս մասին հայտնում է ԿԳՄՍՆ պաշտոնական կայքը:
Արտաշատի վերակառուցված մարզադաշտում անցկացված մրցումներին հետևել են ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանը, Արարատի մարզպետ Սեդրակ Թևոնյանը, տեղական ինքնակառավարման մարմինների ներկայացուցիչներ, Գառնիկ Ղուկասյանի մարզական և մարտական ընկերները, նախկին մարզիչներն ու բազմաթիվ մարզասերներ:
ԿԳՄՍ նախարարի տեղակալը պարգևատրել է 3000մ վազքատարածությունում չեմպիոնի կոչումը նվաճած Երվանդ Մկրտչյանին: Հայաստանի առաջատար վազորդը մրցատարածությունը հաղթահարել է 8:25.99 րոպե արդյունքով և զբաղեցրել առաջին հորիզոնականը:
Ողջունելով ներկաներին ու Գառնիկ Ղուկասյանի հուշամրցաշարի մասնակիցներին՝ Կարեն Գիլոյանը վերհիշել է՝ ժամանակին որպես մարզական լրագրող շուրջ 25 տարի լուսաբանել է այս մրցաշարը, և այն հատուկ նշանակություն ունի իր համար:
«Այս մրցաշարում ձևավորվել են շատ աթլետներ, որոնք հետագայում Հայաստանի պատիվը բարձր են պահել Օլիմպիական խաղերում, աշխարհի և Եվրոպայի առաջնություններում, զանազան միջազգային մրցաշարերում: Այս անգամ էլ շատ մարզիկների համար մասնակցությունը այս մրցաշարին շատ կարևոր է. միջազգային տեսուչի ներկայությունն այս մրցաշարին ենթադրում է, որ ձեզնից բարձր արդյունքներ են ակնկալում և ուզում են հավաստիանալ, որ այդ արդյունքներն ազնիվ են»,- ասել է Կարեն Գիլոյանը՝ բոլորին մաղթելով ազնիվ մրցակցություն, բարձր արդյունքներ, իսկ մրցաշարի ավարտից հետո՝ միմյանց շնորհավորելու առիթներ:
Գառնիկ Ղուկասյանի անվան աթլետիկայի միջազգային հուշամրցաշարի շրջանակում անցկացվել են նաև կանանց ու տղամարդկանց 100 մետր, 400 մետր և 1500 մետր վազքի, կանանց և տղամարդկանց հեռացատկի ու եռացատկի, ինչպես նաև տղաների գնդի հրման և նիզակի նետման մրցումները, 200 և 800 մետր վազքի մրցումները: Յուրաքանչյուր օրվա մրցաձևերի ավարտին անցկացվել են նաև 4 X 100 և 4 X 400 մետր փոխանցավազքի մրցումները:
