Օգոստոսի վերջին հայտնի դարձավ, որ «Նոան» նոր սեփականատեր ունի՝ ի դեմս Digitain ընկերությունների խմբի նախագահ Վարդգես Վարդանյանի: Արդյունքում, փոխվեց թիմի թե՛ ղեկավար, թե՛ մարզչական շտաբը:
Սեպտեմբերի վերջին թիմը գլխավորեց իսպանացի մասնագետ Կառլոս Ինարեխոսը, Հայաստանի հավաքականի նախկին ֆուտբոլիստ, այժմ մարզիչ Ալեքսանդր Թադևոսյանը ստանձնեց գլխավոր մարզչի օգնականի պաշտոնը, հավաքականի լեգենդար դարպասապահ Ռոման Բերեզովսկին էլ դարձավ «Նոայի» դարպասապահների մարզիչը:
«Նոայում» ընթացող աշխատանքների և զարգացման նոր վեկտորի մասին ArmSport.am-ը զրուցել է ակումբի մարզական տնօրեն Արթուր Ոսկանյանի հետ, որը ևս սեպտեմբերի վերջին միացավ թիմին:
Ֆուտբոլի ակադեմիայից հեռանալու մասին
Արթուր Ոսկանյանն այս տարվա փետրվարին էր ստանձնել Ավանի ֆուտբոլի ակադեմիայի մարզական տնօրենի պաշտոնը: Մասնագետի խոսքով՝ «Նոայում» աշխատանքի անցնելու լուրջ առաջարկը ստացել է միայն Ակադեմիայից հեռանալուց հետո. «Երբ Ակադեմիայում էի, կային տարբեր առաջարկներ, որոնք այդքան էլ լուրջ չէին: Եվ հետո, ցանկություն էլ չկար հեռանալու, քանի որ Ակադեմիայում արդեն մեծ աշխատանք էինք տարել, կատարել էինք սելեկցիոն աշխատանքներ և ձևավորել լավ թիմեր։ Թիմերը աշխատում էին իմ պատրաստած ծրագրով, ու մեծ առաջընթաց կար թե՛ երեխաների և թե՛ մարզիչների շրջանում։ Ակադեմիայից դուրս եմ եկել իմ ցանկությամբ՝ մի քանի խնդիրների պատճառով, որոնց մասին չեմ ցանկանում բարձրաձայնել»:
«Նոային» միանալու և ակումբի զարգացման հեռանկարների մասին
««Նոայի» կողմից լուրջ առաջարկ ստացա, որը բավականին հավակնոտ և գրավիչ էր: Ճանաչելով Վարդգես Վարդանյանին՝ գիտեի, որ ամեն ինչում ցանկանում է արդյունք ստանալ, առաջ գնալ, և դա անում է ոչ միայն խոսքով, այլև՝ գործով: Սա արդեն նկատելի է: «Նոան» արդեն ձեռք է բերել Էջմիածնի ֆուտբոլի ակադեմիան, ծրագրեր կան այնտեղ նոր մարզադաշտ կառուցելու՝ իր ենթակառուցվածքներով, ընդ որում, հանդերձարանների վերանորոգումն արդեն մեկնարկել էր: Մեր երկրում քիչ է լինում, երբ ներդրողներն անմիջապես ձեռք են բերում ենթակառուցվածքները, ոչ թե՝ վարձակալում, ու սկսում են այն զարգացնել: Այնպես, որ այս հանգամանքը կարևոր էր ու գրավիչ՝ ակումբին միանալու հարցում: Ծրագրեր կային նաև թիմն ուժեղացնելու՝ հրավիրելով նոր խաղացողների: Մի խոսքով, առաջարկը բավականին լավն էր, միանգամից համաձայնվեցի»,- պատմում է Արթուր Ոսկանյանը:
Մասնագետի խոսքով՝ «Նոայի» ղեկավարությունը նախատեսում է Էջմիածնում կառուցել տնային մարզադաշտ, ակադեմիան էլ արդեն հանդիսանում է ակումբի սեփականությունը:
«Ամեն առումով սկսեցինք ուժեղացնել թիմը: Առաջին կարևոր քայլն Ալեքսանդր Թադևոսյանին ակումբի մարզչական շտաբում ընդգրկելն էր, այնուհետև հրավիրեցինք իսպանացի փորձառու մասնագետի, ֆիզիկական պատրաստության մարզիչ՝ Իսպանիայից, մարզչի օգնական, որը պորտուգալացի է: Դարպասապահների մարզիչ Ռոման Բերեզովսկին էլ մեծ սիրով համաձայնեց միանալ մեր թիմին ու հիմա աշխատում են Գևորգ Կասպարովի հետ: Առաջիկայում նոր համալրումներ ևս կունենանք: Աշխատանքն ընթացքի մեջ է. թիմի կառուցման փուլում ենք: Կունենանք նոր խաղացողներ, մեծ թափով պետք է գործի ակադեմիան:
Այս ամենը ես միշտ շատ եմ կարևորել ֆուտբոլում: Այնպես ստացվեց, որ իմ ցանկություններն ու անելիքները համընկան ղեկավարության տեսլականի և հնարավորությունների հետ: Ամեն ինչ արվում է թե՛ ֆուտբոլիստների, թե՛ մարզիչների, թե՛ ակադեմիայի համար: Հիմա ամենակարևորն այն է, որ կարողանանք նաև արդյունք ապահովել: Ունենք լավ թիմ, ու վստահ եմ՝ ապագայում շատ ավելի մրցունակ և ուժեղ ենք լինելու: «Նոան» ստեղծում է այնպիսի թիմ, որը հայկական ֆուտբոլում լինելու է մրցանակային տեղերի ու չեմպիոնության հիմնական հավակնորդներից մեկը: Այդ ճանապարհին ենք: Կան բոլոր հնարավորությունները: Ուրախ եմ, որ միացել եմ այս թիմին: Աշխատում ենք՝ առաջ գնալու համար»,- նշում է Արթուր Ոսկանյանը:
«Նոայի» ելույթների և ցույց տված խաղի մասին
Սեպտեմբերի վերջից «Նոային» է միացել իսպանացի գլխավոր մարզիչ Կառլոս Ինարեխոսը: 39-ամյա մասնագետը մարզչական կարիերայի ընթացքում աշխատել է Սաուդյան Արաբիան, Իրանը, Կիպրոսը, Ջիբրալթարը, Ֆրանսիան և Ուկրաինան ներկայացնող ակումբներում: Ինարեխոսի գլխավորությամբ «Նոան» Հայաստանի Պրեմիեր-լիգայում արդեն 5 հանդիպում է անցկացրել, որոնցում տարել է 4 հաղթանակ և կրել 1 պարտություն:
Արթուր Ոսկանյանի խոսքով՝ խաղից խաղ կա տարբերություն, ընդ որում, «Նոան» դեռևս լիովին ցույց չի տալիս այն խաղը, որը մարզչական շտաբը ցանկանում է.
«Մեր նպատակը մեկն է՝ ստեղծել մի թիմ, որը հավասար պայքար կմղի մեր առաջնության ուժեղագույն թիմերի հետ և կլինի չեմպիոնության հավակնորդներից մեկը: Փորձելու ենք համալրվել նոր ֆուտբոլիստներով և մասնագետներով, որոնք կօգնեն մեզ այդ ճանապարհին»,- ասում է Արթուր Ոսկանյանն ու ընդգծում՝ թիմ են հրավիրելու փորձառու և ինտելեկտուալ խաղացողների և նրանց կողքին խաղալու հնարավորություն են տալու հայ երիտասարդ ֆուտբոլիստներին:
«Եթե լեգիոներ ենք հրավիրում, ապա պետք է լինեն այնպիսի խաղացողներ, որոնցից մեր երիտասարդները կկարողանան ինչ-որ բան սովորել: Փորձառու խաղացողների կողքին դաշտ ենք դուրս բերում նաև մեր երիտասարդ տղաներին: Օրինակ, «Շիրակի» հետ խաղում փոխարինման մտավ Գոռ Աբրահամյանը, որը ծնվել է 2005 թվականին: Այս գործընթացը շարունակական է լինելու»,- նշում է Արթուր Ոսկանյանը:
Մարզումներին ու խաղերին ևս թիմի կողքին լինելու մասին
Արթուր Ոսկանյանը մարզչական կարիերայի ընթացքում աշխատել է Հայաստանի մինչև 17, 19 և մինչև 21 տարեկանների հավաքականներում: Նա 2016/17 թվականներին գլխավորել է նախկին «Բանանց» (ներկայում «Ուրարտու») ակումբը:
«Նոայում» էլ, թեև ընդգրկված է ղեկավար կազմում, մասնակցում է թիմի մարզումային գործընթացներին, իսկ խաղերին գտնվում է տեխնիկական գոտում, քանի որ նաև մարզչական PRO արտոնագիր ունի:
«Ինձ թիմի լիարժեք մասն եմ համարում՝ թե՛ ֆուտբոլիստների, թե՛ մարզիչների կողքին: Բոլորս մեկ նպատակի համար ենք աշխատում՝ ստեղծել ուժեղ ու մրցունակ թիմ և հասնել մեր առջև դրված խնդիրներին»,- եզրափակում է Արթուր Ոսկանյանը:
