Այս շաբաթ կկայանա Չեմպիոնների լիգայի 2023/24 մրցաշրջանի խմբային փուլի երրորդ տուրը։ A, B, C և D խմբերի հանդիպումները կկայանան երեքշաբթի, իսկ E, F, G և H խմբերինը՝ չորեքշաբթի։
Նախորդ նյութում անդրադարձանք առաջին 4 խմբերի հանդիպումներին, հերթը եկել է ծանոթանալու մյուս խմբերում տիրող իրավիճակին և առաջիկա հանդիպումներին։
E Խումբ
«Ատլետիկո» — 4 միավոր
«Լացիո» — 4 միավոր
«Ֆեյենորդ» — 3 միավոր
«Սելթիկ» — 0 միավոր
Երկու տուրից հետո կարող ենք ասել, որ այս խմբում ամեն ինչ միանշանակ չէ։ Նույնիսկ «Սելթիկը», որն իր ակտիվում դեռ միավոր չունի, կարող է լուրջ անախորժություններ մատուցել մրցակիցներին։ «Լացիոն» առաջին խաղում փրկվում է պարտությունից՝ («Ատլետիկոյի» հետ խաղում՝ 1-1), երկրորդում էլ հաղթանակ է կորզում ամենավերջին վայրկյաններին («Սելթիկի» հետ խաղում՝ 2-1)։ «Ատլետիկոն» երկակի տպավորություն է թողնում, մի կողմից իր ուժերի վրա վստահ թիմ է թվում, մյուս կողմից՝ ամենակարևոր պահերին կարող է կորցնել խաղի ռիթմը։ «Ֆեյենորդը» համառ է, պայքարում է մինչև վերջ, բայց այն տպավորությունն է, որ ինչ-որ բան այս թիմին անընդհատ պակասում է։ Այնպես որ, ունենք «ուրախ» խումբ, որի հանդիպումներում կարող է տեղի ունենալ ամեն ինչ, և մեկ րոպեում կարող է փոխվել ամբողջ խաղի արդյունքը․․․
20։45․ «Ֆեյենորդ»- «Լացիո»
23։00․ «Սելթիկ»- «Ատլետիկո»
F Խումբ
«Նյուքասլ» — 4
ՊՍԺ — 3
«Միլան» — 2
«Բորուսիա» — 1
Ամենաանկանխատեսելի խումբը շարունակում է այդպիսին էլ մնալ։ Այս տուրում մեզ սպասվում է երկու շատ հետաքրքիր դիմակայություն։ «Միլանը», որը կիրակի ցավալի պարտություն կրեց «Յուվենտուսից», կհյուրընկալվի ՊՍԺ-ին։ Վերջինս էլ, ՉԼ-ի նախորդ տուրում «Նյուքասլից» կրած ջախջախիչ պարտությունից հետո կարծես թե զարթնել է և աստիճանաբար լավ մարզավիճակ է ձեռք բերում։ Այնպես որ, Փարիզում սպասվում է թեժ հանդիպում։
Իսկ ահա խմբի առաջատար «Նյուքասլը», որը պարզապես հրաշալի մարզավիճակում է (վերջին մեկ ամսում 21 գոլ է խփել), Սենթ Ջեյմս Պարկում կընդունի Դորտմունդի «Բորուսիային»։ Վերջինիս լուրջ փորձություն է սպասվում, և հետաքրքիր է՝ կկարողանա՞ն «մեղուները» խայթել «կաչաղակներին»․․․
23։00․ ՊՍԺ- «Միլան»
23։00․ «Նյուքասլ»- «Բորուսիա»
G Խումբ
«Մանչեսթեր Սիթի» — 6 միավոր
«Լայպցիգ» — 3 միավոր
«Յանգ Բոյս» — 1 միավոր
«Ցրվենա Զվեզդա» — 1 միավոր
Այս խմբի մասին շատ չենք խոսի։ Կա բացահայտ երկու ֆավորիտ՝ «Մանչեսթեր Սիթի» և «Լայպցիգ», իսկ գլխավոր ինտրիգը թերևս երրորդ տեղի համար պայքարն է մյուս երկուսի միջև։ Ֆավորիտներն իրենց միջև առաջին հանդիպումն արդեն անցկացրել են նախորդ տուրում, ժամանակն է պարզապես միավորներ հավաքելու աութսայդերների հետ խաղերում։
23։00․ «Լայպցիգ»- «Ցրվենա Զվեզդա»
23։00․ «Յանգ Բոյս»- «Մանչեսթեր Սիթի»
H Խումբ
«Բարսելոնա» — 6 միավոր
«Պորտու» — 3 միավոր
«Շախտյոր» — 3 միավոր
«Անտվերպեն» — 0 միավոր
«Բարսելոնան» այս տուրում սեփական հարկի տակ կընդունի «Շախտյորին»։ Այն, որ կատալոնական ակումբը համարվում է ոչ միայն այս խաղում, այլ ընդհանրապես խմբի ֆավորիտը, գրեթե կասկած չի հարուցում։ Իսկ ահա գլխավոր ինտրիգը խմբի մեկն է՝ ո՞ր թիմը կնվաճի փլեյ-օֆֆի երկրորդ ուղեգիրը։ «Շախտյորն» ու «Պորտուն» այս պահին ունեն 3-ական միավոր, բայց առաջիկա տուրից (գումարած նաև հաջորդ տուրը, որտեղ մրցակիցները նույնն են) հետո աղյուսակում թիմերի միջև կարող է զգալի տարբերություն գոյանալ։
«Անտվերպենը» նախորդ տուրում 2-0 հաշվով հաղթում էր «Շախտյորին» առաջին խաղակեսից հետո, բայց արդյունքում պարտվեց հանդիպումը 2-3 հաշվով։ Փորձի պակասը նման բարձր կարգի մրցաշարում ասեց իր խոսքը։ Այս տուրում բելգիացիները կրկին սեփական հարկի տակ կխաղան արդեն «Պորտուի» հետ։ Հուսանք՝ «Անտվերպենի» մարզչական շտաբը լավ վերլուծել է նախորդ խաղի սխալները և նրանք այդպես հեշտ ձեռքից բաց չեն թողնի խաղի ընթացքում ձեռք բերածը․․․ Իհարկե, եթե «վիշապները» թույլ տան տանտերերին խաղի ընթացքում որևէ արդյունք գրանցել․․․
20։45․ «Բարսելոնա»- «Շախտյոր»
23։00․ «Անտվերպեն»- «Պորտու»
Վար Բաբայան