Այս շաբաթ կկայանա Չեմպիոնների լիգայի 2023/24 մրցաշրջանի խմբային փուլի երրորդ տուրը։ A, B, C և D խմբերի հանդիպումները կկայանան երեքշաբթի, իսկ E, F, G և H խմբերինը՝ չորեքշաբթի։
Այս նյութում կանդրադառնանք առաջին 4 խմբերի, իսկ հաջորդ նյութում՝ մյուս խմբերի հանդիպումներին։
A Խումբ
«Բավարիա» — 6 միավոր
«Գալաթասարայ» — 4 միավոր
«Կոպենհագեն» — 1 միավոր
«Ման․ Յունայթեդ» — 0 միավոր
Նախ, նշենք, որ երրորդ և չորրորդ տուրերում կմրցեն նույն զույգերը՝ մեկ հանդիպում անցկացնելով տանը, իսկ մյուսը՝ մրցակցի հարկի տակ։ Դա վերաբերում է բոլոր խմբերի ներկայացուցիչներին։
«Բավարիան», ինչպես և սպասվում էր, խմբի առաջատարն է երկու տուրից հետո՝ տանելով երկու հաղթանակ։ Առաջիկա երկու խաղերը մյունխենյան թիմը կանցկացնի մրցաշարային աղյուսակի երկրորդ տեղը զբաղեցնող «Գալաթասարայի» (4 միավոր) հետ։ Տուխելի թիմին հեշտ հանդիպումներ չեն սպասվում, բայց միևնույն է, «Բավարիան» մնում է ֆավորիտ այս դիմակայությունում և ակնկալվում է, որ հենց առաջիկա այս հանդիպումների արդյունքում էլ թիմը կերաշխավորի փլեյ-օֆֆի ուղեգիր։ Իսկ ահա «Մանչեսթեր Յունայթեդը» դեռևս միավոր չի վաստակել, և առաջիկա մրցակիցը «Կոպենհագենն» է։ Վերջինս նախորդ տուրում «Բավարիայի» հետ խաղում ապացուցեց, որ «ամուր ընկույզ» է, և, բնականաբար, ՄՅՈՒ-ին ևս հեշտ հանդիպումներ չեն սպասվում դանիացիների հետ։ Համենայն դեպս, Տեն Հագի թիմը նահանջելու տեղ այլևս չունի, և միավորների յուրաքանչյուր կորուստ կարող է թանկ նստել մանկունիանցիների վրա։ Իսկ դանիական թիմն իր հերթին չի պատրասվում այս խաղարկությունում լինել միայն հանդիսատեսի դերում, այնպես որ, այս դիմակայությունում սպասվում է համառ և անզիջում պայքար։
20։45․ «Գալաթասարայ»- «Բավարիա»
23։00․ «Մանչեսթեր Յունայթեդ»- «Կոպենհագեն»
B Խումբ
«Լանս» — 4 միավոր
«Արսենալ» — 3 միավոր
«Սևիլիա» — 2 միավոր
ՊՍՎ — 1 միավոր
Այս խմբում տպավորում է «Լանսը», որն, ի դեպ, 4 միավորով առաջատարն է։ «Սևիլիայի» հետ ոչ-ոքին և «Արսենալի» նկատմամբ հաղթանակը չենք կարող զուտ պատահականություն համարել, թիմն իսկապես լավ տպավորություն է թողնում իր խաղով, չի վախենում կարգով ավելի բարձր մրցակիցներից։ Իսկ առաջիկա մրցակիցը ՊՍՎ-ն է, որն ընդամենը մեկ միավոր ունի երկու խաղից հետո։ Մի կողմից նիդեռլանդական թիմը նման է «Լանսին»՝ խաղում է համարձակ, մյուս կողմից՝ ֆրանսիական թիմի հետ համեմատած ցուցադրում է ինչ-որ տեղ անփույթ ֆուտբոլ։ «Լանսին» կարելի է ֆավորիտ համարել այս դիմակայությունում, և ֆրանսիացիներն առաջին հերթին պետք է հասկանան, որ սա աղյուսակի վերնամասում ամրապնդվելու իրենց լավագույն հնարավորությունն է, և պետք է փորձեն առավելագույնը քաղել առաջիկա երկու խաղից։ Բայց ՊՍՎ-ն էլ միավոր բաժանողի դերում չի պատրաստվում լինել, այնպես որ Լանսում ու Էյնդհովենում կայանալիք խաղերը թեժ են լինելու։ Մյուս խաղում կհանդիպեն «Արսենալը» և «Սևիլիան»․ իմ կարծիքով՝ ֆավորիտն այս զույգում լոնդոնյան թիմն է, բայց անդալուսցիների հետ խաղերը բավականին բարդ կլինեն լոնդոնցիների համար՝ նամանավանդ առաջիկա խաղը, որը կկայանա Իսպանիայում։
23։00․ «Լանս»- ՊՍՎ
23։00․ «Սևիլիա»- «Արսենալ»
C Խումբ
«Ռեալ» — 6 միավոր
«Նապոլի» — 3 միավոր
«Բրագա» — 3 միավոր
«Յունիոն» — 0 միավոր
«Ռեալն» այս տուրում պետք է որ դժվարություններ չունենա Լիսաբոնում և իր ակտիվում գրանցի երեք միավոր։ Մրցաշարի գլխավոր անհաջողակներից մեկը՝ Բեռլինի «Յունիոնը», սեփական հարկի տակ կընդունի «Նապոլիին», որը նախորդ տուրում ցավալի պարտություն կրեց մադրիդյան ակումբից։ Այս դիմակայութունից շատ բան է կախված է այս խմբում, և դիտարկենք երկու հնարավոր սցենար․
1․ «Նապոլին» օգտվում է նման բարձր կարգի մրցաշարում բեռլինցիների փորձի պակասից և, հաշվի առնելով այն փաստը, որ «Բրագան» միավորներ է կորցնելու «Ռեալի» հետ խաղում, ամրապնդվելու է երկրորդ տեղում։
2․ Կամ էլ՝ «Յունիոնը» դադարելու է խաղավերջում խաղի թելը կորցնելու իր սովորությունից և փորձելու է առաջին միավորները վաստակել ՉԼ-ում։ Այս դեպքում գերմանական թիմը նոր ինտրիգ կմտցնի փլեյ-օֆֆի ուղեգրի համար պայքարում։
23։00․ «Բրագա»- «Ռեալ»
23։00․ «Յունիոն»- «Նապոլի»
D Խումբ
«Ինտեր» — 4 միավոր
«Ռեալ Սոսյեդադ» — 4 միավոր
«Զալցբուրգ» — 3 միավոր
«Բենֆիկա» — 0 միավոր
Այս խմբում ֆավորիտները, ինչպես և սպասվում էր, շարունակում են մնալ «Ինտերն» ու «Ռեալ Սոսյեդադը»։ Միլանցիներն այս տուրում կընդունեն ավստրիական թիմին և այստեղ ֆավորիտն իհարկե ակնհայտ է։ Մյուս խաղում «Բենֆիկան» սեփական հարկի տակ կընդունի «Ռեալ Սոսյեդադին», բայց այս խաղում չէի շտապի երեք միավորը նախօրոք հանձնել իսպանացիներին։ «Արծիվները», չնայած մրցաշարում անհաջող մեկնարկին, ի զորու են համառ պայքար պարտադրել բասկերին, այնպես որ այս խաղում ամեն ինչ միանշանակ չէ։
Ընդհանրապես, այս խմբում պատկերը հետևյալն է․ ունենք երկու թիմ, որոնք գտնվում են հրաշալի մարզավիճակում և շարունակում են առաջընթաց գրանցել դեռ նախորդ մրցաշրջանի երկրորդ կեսից սկսած։ Խոսքն «Ինտերի» ու «Ռեալ Սոսյեդադի» մասին է։ Ունենք երկու թիմ, որոնց մասին կարող ենք ասել լրիվ հակառակը․ և՛ «Զալցբուրգը», և՛ «Բենֆիկան» նախորդ մրցաշրջանի համեմատ փոքր-ինչ թույլ տեսք ունեն։ Բայց, միևնույն է, երկու թիմերին էլ թերագնահատել պետք չէ, առջևում դեռ 4 տուր է, և չգիտես, թե ինչ կարող է պատահել այդ խաղերում․․․
20։45․ «Ինտեր»- «Զալցբուգ»
23։00․ «Բենֆիկա»- «Ռեալ Սոսյեդադ»
Վար Բաբայան
