Գերմանիայում բնակվող հայ բռնցքամարտիկ Լեոն Հարտը (Լևոն Հակոբյանը) պատրաստվում է իր հերթական մենամարտին։ Հոկտեմբերի 28-ին գերմանական Բիլեֆելդ քաղաքում 35-ամյա բռնցքամարտիկը WBC միջմայրցամաքային գոտու պաշտպանության ու IBF Եվրոպայի չեմպիոնական գոտու տիտղոսի համար կմրցի ֆրանսիացի Ժան-Ժակ Օլիվիերի հետ։
Կարևորագույն մենամարտին հայ բռնցքամարտիկը նախապատրաստվում է նոր մարզչական շտաբի հետ։
«Վերջին տարիներին չեմ ունեցել կոնկրետ մեկ մարզիչ: Մարզվել եմ իմ սիրողական բռնցքամարտի մարզիչի օգնությամբ։ Այս մենամարտի կարևորությունն էր պատճառը, որ պահանջում էր շատ լուրջ պատրաստվածություն։ Հիմա մարզվում են փորձառու Ուլի Վեգների գլխավորությամբ։ Նա լավագույններից մեկն է Գերմանիայում։ Վեգները նաև Արթուր Աբրահամի մարզիչն է եղել»,-ասաց Հարտը։
Բռնցքամարտիկի խոսքով հիմա ինքը գտնվում է գերազանց մարզավիճակում․
«Մարզավիճակս շատ լավ է։ Սպարինգային վերջին շաբաթն եմ անցկացնում, մինչև հիմա ամեն ինչ լավ է անցել։ Ուրբաթ օրը վերջին սպարինգը կանցկացնեմ։ Քաշի հետ խնդիրներ չունեմ, վերջին շաբաթը կմարզվեմ ավելի թեթև գրաֆիկով, քանի որ 12 շաբաթ շատ ծանր մարզումներ եմ անցկացրել։ Մենամարտից առաջ օրգանիզմը մի փոքր հանգստի կարիք ունի»,-նշում է հայ բռնցքամարտիկը։
Լեոն Հարտի խոսքով սա իր կարիերայի ամենակարևոր մենամարտն է, քանի որ հաղթանակի դեպքում շանս կունենա մենամարտել աշխարհի չեմպիոնի գոտու համար։ Խոսելով մրցակցի մասին հայ բռնցքամարտիկն ասաց․
«Տեխնիկապես ուժեղ բռնցքամարտիկ է։ Ինձ համար երևի անհարմար մրցակից է, բայց ուսումնասիրել ենք թույլ կողմերը։ Աշխատել ենք ու կարծում եմ, որ կկարողանամ ռինգում ցույց տալ ամեն ինչ»։
Մենամարտը կայանալու է Գերմանիայի Բիլեֆելդ քաղաքի ամենահայտնի մարզահամալիրներից մեկում, որը տեղավորում է 4500 հանդիսական։
Այդ երեկո կարճ մենահամերգով հանդես է գալու նաև գերմանացի հայտնի ռեփերներից մեկը։ Բռնցքամարտիկի խոսքով՝ սպասվում է, որ մարզահամալիրում ազատ տեղեր չեն լինելու։
«Տոմսերի կեսն արդեն վաճառվել է։ Ռինգում սպասում ենք շատ հայտնի մարդկանց։ Արթուր Աբրահամը նույնպես ներկա է լինելու։ Հույս ունեմ նաև, որ շատ հայեր կլինեն։ Մեր քաղաքում շատ հայեր են ապրում»,-ասաց Հարտը։