Մեկնարկում է Չեմպիոնների լիգայի 2023/24 մրցաշրջանի խմբային փուլը։ Նախորդ նյութերում անդրադարձել էինք E, F, G և H խմբերին։ Այսօր հերթը մյուս 4` A, B, C և D խմբերինն է։
A խումբ
⚽ 20․09 / 20։45․ «Գալաթասարայ»-«Կոպենհագեն»
⚽ 20․09 / 23։00․ «Բավարիա»-«Մանչեսթեր Յունայթեդ»
Էիիկ տեն Հագին հերթական գլխացավանքն է սպասվում․ բավական չէ, որ «Մանչեսթեր Յունայթեդի» գործերն ԱՊԼ-ում, մեղմ ասած, այդքան էլ լավ չեն ընթանում, ՉԼ-ում էլ մեկնարկելու են մրցաշարի գլխավոր ֆավորիտներից մեկի՝ «Բավարիայի» հետ խաղով։ Միգուցե նիդեռլանդացի մասնագետին հաջողվի թիմի երկրպագուների «սիրտը շահել» այս խաղո՞ւմ․․․ միգուցե․․․
«Բավարիան» իր հերթին այս ամառ լուծել է թիմի գլխավոր խնդիրը․ նրանք այժմ ունեն բարձրակարգ, աստղային կենտրոնական հարձակվող՝ ի դեմս Հարի Քեյնի։ Այժմ կազմի հետ կապված, բացի դարպասապահի դիրքից, թերևս, թիմը խնդիրներ չունի։
Համենայն դեպս «Մանչեսթեր Յունայթեդն» ու «Բավարիան» այս խմբի ֆավորիտներն են։ Անգլիական ակումբը, չնայած ներկայիս դժվարություններին, միևնույն է մնում է ահեղ ուժ՝ նամանավանդ «Գալաթասարայի» և «Կոպենհագենի» ֆոնին։ Վերջին երկուսն էլ կպայքարեն ԵԼ-ի ուղեգրի համար։ Դանիական ակումբին այս տարի թերագնահատել պետք չի, և այս թիմը կարող է դառնալ մրցաշրջանի գլխավոր բացահայտումներից մեկը, բայց միևնույն է, դժվար թե նրանց տեսնենք փլեյ-օֆֆում։
B խումբ
⚽ 20․09 / 23։00․ «Սևիլիա»-«Լանս»
⚽ 20․09 / 23։00․ «Արսենալ»-ՊՍՎ
«Արսենալն» այս խմբի ֆավորիտն է։ Իսկ ահա փլեյ-օֆֆի երկրորդ ուղեգրի համար համառ պայքար է սպասվում է։ Մի կողմից Եվրոպա լիգայի հաղթող «Սևիլիան» է՝ թիմ վերդարձած Սերխիո Ռամոսի գլխավորությամբ, մյուս կողմից ՊՍՎ-ն, որը բավականին ուժեղացրել է կազմը։ «Լանսն» էլ նվեր չէ ոչ մի ակումբի համար՝ չնայած մրցաշրջանից առաջ կորցրել է մի շարք առաջատարների։ Առաջին երկու-երեք տուրերից հետո, կարծում եմ` պարզ կդառնա՝ որ թիմն ինչի կարող է հավակնել խմբային փուլում։
«Արսենալը» ևս այս ամառ ուժեղացրել է թիմի կազմը, հատկապես՝ կիսապաշտպանության կենտրոնը՝ ի դեմս Դեկլան Ռայսի։ Թիմը նորից վերադարձել է Չեմպիոնների լիգա և այս մրցաշրջանում ունի լավ հնարավորություններ բավականին առաջ գնալու այս մրցաշարում։
C խումբ
⚽ 20․09 / 20։45․ «Ռեալ Մադրիդ»-«Յունիոն Բեռլին»
⚽ 20․09 / 23։00․ «Բրագա»-«Նապոլի»
Առաջին հայացքից այստեղ ամեն ինչ պարզ է․ «Ռեալն» ու «Նապոլին» խմբի ֆավորիտներն են, իսկ մյուս երկու թիմերը կպայքարեն երրորդ տեղի համար։ Բայց դա միայն առաջին հայացքից․․․ Եթե «Ռեալի» պահով գրեթե կասկած չկա, որ Անչելոտիի թիմը կապահովի փլեյ-օֆֆի ուղեգիր, ապա նույնն այս պահին դժվար է ասել «Նապոլիի» մասին։ Նեապոլիտանական թիմի խաղում վերջերս մի փոքր անկում է նկատվում, համենայն դեպս՝ հաշվի առնելով թիմի արդյունքները։
Չի բացառվում, որ ՉԼ-ի դեբյուտանտ «Յունիոնը» լուրջ մրցակցություն կպարտադրի իտալական ակումբին՝ հավակնելով ևս մեկ անակնկալ մատուցել, ինչպես դա արեց Բունդեսլիգայի նախորդ մրցաշրջանում։ «Բրագան» ևս հեշտ մրցակից չէ, թիմը տարեցտարի առաջընթաց է գրանցում, եվրագավաթներում մշտական հյուր է, ճիշտ է՝ հիմնականում Եվրոպա լիգայում, բայց միջազգային խաղերի փորձ թիմն, այնուամենայնիվ, ունի։ Այս խմբում ամեն ինչ միանշանակ չէ, ինչպես կարող է թվալ առաջին հայացքից․․․
D խումբ
⚽ 20․09 / 23։00․ «Բենֆիկա»-«Զալցբուրգ»
⚽ 20․09 / 23։00․ «Ռեալ Սոսյեդադ»-«Ինտեր»
«Ռեալ Սոսյեդադի» նորեկ Արսեն Զախարյանը ՉԼ-ի վիճակահանությունից առաջ հարցազրույցներից մեկում ասել էր, որ կցանկանար որպես մրցակից հանդիպել Մխիթարյանի հետ․․․ Նրա ցանկությունն իրականություն դարձավ․․․ «Ռեալ Սոսյեդադն» ու «Ինտերը» կհանդիպեն հենց մրցաշարի մեկնարկային տուրում։
Միլանյան ակումբը, որը նախորդ մրցաշրջանի եզրափակիչի մասնակիցն է և այս պահին գտնվում է գերազանց մարզավիճակում, միանշանակ D խմբի ֆավորիտն է։ Իսկ ահա երկրորդ ուղեգրի համար թեժ պայքար է սպասվում։ «Ռեալ Սոսյեդադը» և «Բենֆիկան» կարծես թե մի փոքր առավելություն ունեն այս պայքարում «Զալցբուրգի» նկատմամբ, բայց ավստրիական ակումբը բազմիցս ապացուցել է, որ «ամուր ընկույզ» է և միշտ պատրաստ է խնդիրներ առաջացնել մրցակիցներին։ «Բենֆիկան» իր հերթին եվրագավաթներում ավելի մեծ փորձ ունի, քան իսպանական ակումբը։ Նախորդ մրցաշրջանում «արծիվները» նույնիսկ հասան 1/4 եզրափակիչ, որտեղ զիջեցին հենց «Ինտերին»։ Բայց այս մրցաշրջանից առաջ պորտուգալական թիմը կորցրեց նախորդ մրցաշրջանի մի շարք հերոսների և այս պահին Պիրենեյան թերակղզու երկու ակումբների հնարավորությունները կարելի է գնահատել հավասար։
Եթե ամփոփենք, բացի F խմբից, որի մասին խոսել էինք նախորդ նյութում, գրեթե բոլոր խմբերում կան բացահատ ֆավորիտներ, իսկ որոշ խմբերում էլ լավագույն երկյակն ակնհայտ է։ Բայց Չեմպիոնների լիգան մեզ նաև սովորեցրել է, որ ամեն մրցաշրջանում նվազագույնը մեկ կամ երկու անակնկալ կարող է գրանցվել, դրամատիկ իրադարձությունների պակաս երբեք չի լինում․․․ Այնպես որ, ամենահետաքրքիրը դեռ առջևում է․․․ Վայելե՛ք ֆուտբոլը․․․
