Մեկնարկում է Չեմպիոնների լիգայի 2023/24 մրցաշրջանի խմբային փուլը։ E և F խմբերին արդեն անդրադարձել ենք նախորդ նյութում, իսկ հիմա հերթը G և H խմբերինն է։
🏆 G խումբ
⚽ 19․09 / 20։45․ «Յանգ Բոյս»-«Լայպցիգ»
⚽ 19․09 / 23։00․ «Մանչեսթեր Սիթի»-«Ցրվենա Զվեզդա»
Մրցաշարի գործող չեմպիոն «Մանչեսթեր Սիթիին» բաժին է հասել ոչ ամենաբարդ խումբը։ Այս խմբում կա երկու բացահայտ ֆավորիտ․ բացի Գվարդիոլայի թիմից մյուս ֆավորիտը «Լայպցիգն» է։ Իսկ ահա մյուս երկու թիմերը՝ «Յանգ Բոյսն» ու «Ցրվենա Զվեզդան», միմյանց միջև կխաղարկեն Եվրոպայի լիգայի փլեյ-օֆֆի ուղեգիրը, որը ստանում է ՉԼ-ի խմբային փուլում երրորդ տեղը գրաված թիմը։ «Լայպցիգի» հիմնական կազմի մոտ կեսը փոփոխության է ենթարկվել, բայց դրանից թիմն իր ուժեղ որակները չի կորցրել։ Հատկապես, շատ տպավորիչ է Չավի Սիմոնսի խաղը, որը դարձել է գերմանական թիմի առաջատարներից մեկը։ Բունդեսլիգայում, կարծես թե, նոր աստղ է հասունանում․․․
Ինտրիգներն այս խմբում այդքան էլ շատ չեն, բայց կնշեմ երկուսը․
✔ Կկարողանա՞ «Լայպցիգը» ռևանշի հասնել խաղերից մեկում «Ման․Սիթիի» նկատմամբ՝ նախորդ մրցաշրջանի փլեյ-օֆֆում կրած ջախջախիչ պարության համար։
✔ Որքա՞ն գոլ կխփի Հոլանդը խմբային փուլում ու ի՞նչ նոր ռեկորդներ կգրանցի։
🏆 H խումբ
⚽ 19․09 / 23։00․ «Բարսելոնա»-«Անտվերպեն»
⚽ 19․09 / 23։00․ «Շախտյոր»-«Պորտու»
Իսպանիայի չեմպիոն «Բարսելոնային», համեմատած նախորդ տարվա հետ, բաժին է հասել բավականին հեշտ խումբ։ «Բավարիայի» ու «Ինտերի» փոխարեն նրանք այս մրցաշրջանում կխաղան «Շախտյորի», «Պորտուի» և «Անվերպենի» հետ։ Ամենայն հարգանքով այս թիմերի հանդեպ, նշենք, որ կատալոնացիները պետք է որ առանց լուրջ խնդիրների դուրս գան այս խմբից։
Երկրորդ ուղեգրի համար ֆավորիտը, թերևս, «Պորտուն» է, որին վերջին տարիներին հաճախ ենք տեսնում փլեյ-օֆֆում։ «Շախտյորն» այն ահեղ մրցակիցը չէ, որը տարիներ շարունակ խնդիրներ էր առաջացնում մրցակիցներին՝ մի քանի անգամ դուրս գալով նաև փլեյ-օֆֆ։ Այժմ թիմը համալրված չէ աստղային լեգիոներներով, բայց այնպես էլ չէ, որ թիմի կազմում չկան ֆուտբոլիստներ, որոնք կարող են եղանակ ստեղծել։ Թիմի հիմնական կորիզը Ուկրաինայի հավաքականի ֆուտբոլիստներ են, կան փորձառու Չիգրինսկին, Ռակիցկին, Ստեպանենկոն, այնպես որ, այս թիմը կարող է ազդել մրցակիցների նյարդերի վրա։ «Անտվերպենը» հանելուկ է․ այս թիմը կա՛մ կարող է մեզ զարմացնել խմբային փուլում, կա՛մ էլ կլինի միավորներ բաժանողի դերում։ Այս թիմում ևս կան մի շարք հետաքրքիր խաղացողներ․ փորձառու Դե Լաետը, Ալդերվեյրելդն ու Յանսենը, երիտասարդ Էկելենկամպն ու Վերմիրենը․․․ Ինչևէ, թե ինչ է ներկայացնում իրենից բելգիական ակումբը միջազգային հարթակում, կիմանանք շատ շուտով։