IDBank Հայաստանի Պրեմիեր լիգայում գնալով ընգծվում է մրցաշարային աղյուսակի հետագա տեսքը։
Կարելի է ասել, որ առաջնության սկզբնամասն անցնում է առանց լուրջ անակնկալների։ Կայացած 5 տուրից հետո առաջատարը 11 միավորով «Փյունիկն» է։ «Ալաշկերտն» ու «Ուրարտուն» ունեն 10-ական միավոր։ Այս երկու թիմերին 9-ական միավորով հաջորդում են «Արարատ-Արմենիան», «Նոան» ու ԲԿՄԱ-ն։
6-րդ տուրում դժվար է որևէ խաղ որակավորել կենտրոնական, քանի որ չեմպիոնության գլխավոր հավակնորդները մրցելու են այն թիմերի հետ, որոնք առավելագույնը կարող են պայքարել մրցաշարային աղյուսակի ստորին հատվածում հնարավորինս բարձր տեղ գրավելու համար։
«Շիրակ» — «Ալաշկերտ»
Տուրի մեկնարկը կտրվի Գյումրիում։ Տեղի «Շիրակը» կընդունի Երևանի «Ալաշկերտին»։ Գյումրիի թիմն առաջին տուրում կամային վստահ հաղթանակի հասավ առաջնության նորեկ «Վեստ Արմենիայի» նկատմամբ՝ առավելության հասնելով 4։2 հաշվով: Հաղթական մեկնարկից հետո Գյումրիի թիմը Չարենցավանում նվազագույն հաշվով զիջեց «Վանին», այնուհետև սեփական հարկի տակ նույն հաշվով պարտվեց ԲԿՄԱ-ին, իսկ Աբովյանում 4 գոլ ընդունեց «Նոայից», որից հետո հրաժարական ներկայացրեց թիմի գլխավոր մարզիչ Էդգար Թորոսյանը։ Թիմի գլխավոր մարզչի պաշտոնում նշանակվեց Արսեն Հովհաննիսյանը։ Սա Հայաստանի ընթացիկ առաջնությունում մարզչական առաջին փոփոխությունն էր։
Վահե Գևորգյանի գլխավորած «Ալաշկերտն» առաջին տուրում «Փյունիկին» պարտվելուց հետո տպավորիչ խաղերի շարք անցկացրեց։ «Վեստ Արմենիային» 4։1 հաշվով հաղթելուց հետո «Ալաշկերտը» գոլազուրկ ոչ-ոքի խաղաց «Վանի» հետ՝ ունենալով գոլային բազմաթիվ հնարավորություններ։ Կորցրած միավորներից հետո Գևորգյանի թիմն ամբողջ զայրույթը թափեց ԲԿՄԱ-ի վրա՝ 4 անպատասխան գնդակ ուղարկելով բանակայինների դարպասը։ Նախորդ տուրում «Ալաշկերտը» 3։1 հաշվով հաղթեց «Նոային»։ Շարունակում է տպավորիչ խաղերի շարք անցկացնել թիմի նորեկ Լևան Կուտալիան։ Վրացի գոլահարը 5 խաղից հետո խփած 5 գոլով 2-րդն է ռմբարկուների ցուցակում։ Հետաքրքիր է, որ խփած ու բաց թողած գոլերի հարաբերակցությամբ Վահե Գևորգյանի թիմն ունի լավագույն արդյունքը։ Դեղինները 5 խաղում խփել են 11 գոլ ու բաց թողել 4-ը։
«Նոա» — «Արարատ»
Ընթացիկ առաջնությունում մեծ են սպասելիքները «Նոայից»։ Նոր սեփականատեր ունենալուց հետո թիմը շարունակում է զգալիորեն ուժեղացնել կազմը։ Վերջին օրերին երևանյան թիմին միացավ Հայաստանի հավաքականի կիսապաշտպան Հովհաննես Համբարձումյանը և 31-ամյա հոլանդացի հարձակվող Պաուլ Խլադոն, որը երևանյան թիմ է տեղափոխվել «Ֆորտունա Սիտարդից»։ ArmSport-ի տեղեկություններով ակումբում արմատական փոփոխություններ են, իսկ այս մրցաշրջանի համար թիմի առաջ մեկ խնդիր է դրված՝ դառնալ չեմպիոն։ Առաջին տուրում Ռոբերտ Արզումանյանի գլխավորած թիմը նվազագույն հաշվով հաղթեց «Վանին», այնուհետև զիջեց ԲԿՄԱ-ին (0։1): Երրորդ տուրում «Նոան» 2 անպատասխան գնդակ ուղարկեց գործող չեմպիոն «Ուրարտուի» դարպասը, այնուհետև 4։0 հաշվով հաղթեց «Շիրակին», իսկ նախորդ տուրում 1։3 հաշվով պարտվեց Վահե Գևորգյանի գլխավորած «Ալաշկերտին»։ Անցկացրած 5 խաղից հետո «Նոան» 9 միավորով 5-րդն է։
Երևանի «Արարատը» առաջին տուրում «Արարատ-Արմենիային» 1։3 հաշվով պարտվելուց հետո ոչ-ոքի խաղաց «Փյունիկի» հետ, այնուհետև Գագիկ Սիմոնյանի գլխավորած թիմը հաղթանակի հասավ «Վեստ Արմենիայի» ու «Վանի» նկատմամբ, իսկ նախորդ տուրում թիմը 0։2 հաշվով պարտվեց ԲԿՄԱ-ին։ Անցկացրած 5 խաղից հետո «Արարատը» 7 միավորով 7-րդն է։
«Վեստ Արմենիա» — «Ուրարտու»
Առաջնության նորեկը ոչ մի կերպ չի կարողանում իր առաջին միավորները վաստակել Պրեմիեր լիգայում։ Առաջին տուրում Խորեն Վերանյանի թիմը տպավորիչ խաղասկիզբ անցկացրեց՝ առաջին րոպեներին 2 գոլի առավելություն ստանալով «Շիրակի» նկատմամբ, սակայն Գյումրին ներկայացնող թիմը կարողացավ հաղթանակի հասնել 4։2 հաշվով։ Մյուս խաղերում առաջնության նորեկը պարտվեց «Ալաշկերտին» 1։4, նվազագույն հաշվով զիջեց «Արարատին», 1։4 հաշվով «Արարատ-Արմենիային», իսկ նախորդ տուրում 3 գնդակ ընդունեց «Փյունիկից»։ Հարկ է նշել, որ գոլերի մեծ մասը «Վեստ Արմենիան» բաց է թողել երկրորդ խաղակեսերում։ Մեր տեղեկություններով առաջիկայում մի քանի նորեկներ կհամալրեն թիմի կազմը։ Անցկացրած 5 խաղում «Վեստ Արմենիան» խփել է 4 և բաց թողել 16 գոլ։ Չնայած այս ցուցանիշին, Խորեն Վերանյանի թիմը կարող է խնդիրներ ստեղծել «Ուրարտուի» համար։
Գործող չեմպիոնը մրցաշրջանը մեկնարկեց հաղթելով ԲԿՄԱ-ին ու Արարատ-Արմենիային։ «Նոայից» 0։2 հաշվով կրած պարտությանը հաջորդեց «Փյունիկի» հետ ոչ-ոքին, իսկ նախորդ տուրում Գունկոյի գլխավորած թիմը Գյումրիում հաղթեց «Շիրակին»։ Առաջիկա խաղում «Ուրարտուն» կփորձի իր ակտիվին գումարել ևս 3 միավոր, սակայն «Վեստ Արմենիան» հատկապես «Փյունիկի» հետ վերջին խաղում ապացուցեց, որ պատրաստ են կռվել ցանկացած մրցակցի դեմ ու, եթե մարզական բախտն էլ լինի հյուրերի կողմը, հնարավոր է, որ լինեն անակնկալներ։ Անցկացրած 5 խաղում «Ուրարտուն» խփել է 7 գոլ, բաց թողել 5-ը և վաստակած 10 միավորով 3-րդ տեղում է։
ԲԿՄԱ — «Արարատ-Արմենիա»
Բանակայինները դեռևս գերազանցում են սպասելիքները։ 5 խաղում Ռաֆայել Նազարյանի գլխավորած թիմը պարտվել է «Ուրարտուին» ու «Ալաշկերտին», հաղթանակի է հասել «Նոայի», ԲԿՄԱ-ի ու «Արարատի» նկատմամբ։
Առաջիկա խաղում Վարդան Մինասյանի գլխավորած թիմն անկասկած լուրջ խնդիրներ կունենա բանակայինների հետ խաղում։ 5 խաղում Մինասյանի թիմն արդեն 2 պարտություն ունի, իսկ այս խաղում միավորների կորուստը հետագայում կարող է ճակատագրական լինել «Արարատ-Արմենիայի» համար։ Հայաստանի կրկնակի չեմպիոնն ընթացիկ առաջնությունում պարտվել է սկզբունքային 2 մրցակիցներին՝ «Փյունիկին» ու «Ուրարտուին»։ ԲԿՄԱ-ի հետ խաղում թիմին կմինա նաև ընթացիկ առաջնության լավագույն ռմբարկու Յեննե Տենտոնըտ, որը որակազրկման պատճառով բաց էր թողել նախորդ հանդիպումը։ Վերջին խաղերում փայլուն է հանդես գալիս նաև Արթուր Սերոբյանը։ Երիտասարդ կիսապաշտպանը «Վանի» հետ խաղում դարձավ դուբլի հեղինակ, երկու անգամ էլ նրա հարվածից հետո մրցակցին փրկեց դարպասաձողը։
«Վան» — «Փյունիկ»
Տուրը կավարտվի Չարենցավանում։ Տեղի «Վանը» կընդունի «Փյունիկին»։ Նախորդ մրցաշրջանից հետո չարենցավանյան թիմից մի շարք ֆուտբոլիստներ են հեռացել։ Նման համեստ կազմով դժվար է պատկերացնել, որ Սևադա Արզումանյանի թիմը կարողանա պայքարել մրցանակային տեղերի համար, սակայն չարենցավանյան թիմը բազմիցս է ապացուցել, որ հատկապես սեփական հարկի տակ ամենևին էլ հեշտ մրցակից չէ։ Ընթացիկ մրցաշրջանում «Վանը» տարել է ընդամենը մեկ հաղթանակ՝ առավելության հասնելով «Շիրակի» նկատմամբ։ Չարենցավանյան թիմը ոչ-ոքի է խաղացել «Ալաշկերտի» հետ ու պարտվել «Նոային», «Արարատին» ու «Արարատ-Արմենիային»։
Գործող փոխչեմպիոնը եվրագավաթային պայքարից դուրս մնալուց հետո ամբողջ ուշադրությունը կենտրոնացրել է առաջնության վրա։ Եղիշե Մելիքյանի գլխավորած թիմը միակն է, որը դեռ պարտություն չի կրել ընթացիկ մրցաշրջանում։ «Ալաշկերտի» նկատմամբ հաղթանակին հետևեց ոչ-ոքի «Արարատի» ու «Ուրարտուի» հետ խաղերում, իսկ «Արարատ-Արմենիայի» (2։1) ու «Վեստ Արմենիայի» (3:0) հետ խաղերում Մելիքյանի թիմը վաստակեց երեքական միավոր։
6-րդ տուրից հետո մրցաշարային աղյուսակն ունի այսպիսի տեսք․
| # | Թիմեր | Խ | Մ |
|---|---|---|---|
| 1 |
Փյունիկ |
5 | 11 |
| 2 |
Ալաշկերտ |
5 | 10 |
| 3 |
Ուրարտու |
5 | 10 |
| 4 |
ԲԿՄԱ |
5 | 9 |
| 5 |
Արարատ-Արմենիա |
5 | 9 |
| 6 |
Նոա |
5 | 9 |
| 7 |
Արարատ |
5 | 7 |
| 8 |
Վան |
5 | 4 |
| 9 |
Շիրակ |
5 | 3 |
| 10 |
ՖԱ Վեստ Արմենիա |
5 | 0 |
