«Փյունիկ» ֆուտբոլային ակումբը Կոնֆերենցիաների լիգայի 2-րդ փուլի՝ շվեդական «Կալմարի» հետ խաղից առաջ հայտարարություն էր տարածել՝ հայտնելով, որ Հայաստանի ֆուտբոլի ֆեդերացիան մերժել է թիմի՝ հանդիպումն Աբովյանի մարզադաշտից Վ․ Սարգսյանի անվան Հանրապետական մարզադաշտ տեղափոխելու խնդրանքը: ArmSport-ն այս թեմայով հարցում էր ուղարկել Հայաստանի ֆուտբոլի ֆեդերացիա՝ հասկանալու համար՝ ի՞նչ հիմքով է ֆուտբոլի ֆեդերացիան մերժել «Փյունիկի» խնդրանքը:
ՀՖՖ պատասխանը ներկայացնում ենք ստորև՝
«Փյունիկ» ֆուտբոլային ակումբը նամակով դիմել է Հայաստանի ֆուտբոլի ֆեդերացիային ս.թ. հուլիսի 23-ին: Հայաստանի ֆուտբոլի ֆեդերացիան պատասխանել է «Փյունիկ» ՖԱ նամակին հուլիսի 25-ին՝ նշելով, որ Վազգեն Սարգսյանի անվան «Հանրապետական» մարզադաշտը չի կարող տրամադրվել «Փյունիկ» ՖԱ-ին մի քանի պատճառով:
Նախ, 2023 թ. մարտի 1-ին Հայաստանի ֆուտբոլի ֆեդերացիան պայմանագրեր է կնքել այդ պահին Fastex Հայաստանի Պրեմիեր Լիգայի առաջին 4 հորիզոնականները զբաղեցնող ակումբների՝ «Ուրարտուի», «Փյունիկի», «Արարատ-Արմենիայի», «Ալաշկերտի» հետ առ այն, որ Վազգեն Սարգսյանի անվան Հանրապետական մարզադաշտում Չեմպիոնների Լիգայի առաջին երկու փուլի հանդիպումները կարող է անցկացնել միայն Fastex Հայաստանի Պրեմիեր Լիգայի 2022/2023 մրցաշրջանի չեմպիոն թիմը: Նույն պայմանագրերից մեկում, մասնավորապես, ամրագրված է, որ չեմպիոն չդառնալու դեպքում «Փյունիկը» ՈՒԵՖԱ Կոնֆերենցիաների լիգայի որակավորման առաջին երկու փուլերի հանդիպումները պետք է անցկացնի Աբովյանի Վահագն Թումասյանի անվան մարզահամալիրում:
Վերոնշյալը ոչ միայն ամրագրված է Հայաստանի ֆուտբոլի ֆեդերացիայի և «Փյունիկ» ՖԱ միջև կնքված պայմանագրով, այլև դեռևս 2023 թ. մարտի 31-ին հաստատվել է, իսկ հունիսի 9-ին վերահաստատվել է ՈՒԵՖԱ-ի կողմից, քանի որ «Փյունիկ» ՖԱ-ն, որպես ՈՒԵՖԱ-ի Կոնֆերենցիաների լիգայի առաջին երկու փուլերի հանդիպումների անցկացման տնային մարզադաշտ, ՈՒԵՖԱ-ին ներկայացրել է Աբովյանի Վահագն Թումասյանի անվան մարզահամալիրը:
Հայաստանի ֆուտբոլի ֆեդերացիան նամակում նաև նշել է, որ այդ պահին Վազգեն Սարգսյանի անվան «Հանրապետական» մարզադաշտում ընթանում էին նախապատրաստական աշխատանքներ, որպեսզի այն կարողանա հավուր պատշաճի ընդունել ՈՒԵՖԱ-ի Կոնֆերենցիաների լիգայի երրորդ փուլի հանդիպումները, եթե հայկական մեկ կամ մի քանի ակումբ նվաճի այդ փուլի ուղեգիր:
«Ավելացնենք, որ ՈՒԵՖԱ Կոնֆերենցիաների Լիգայի երկրորդ փուլի հանդիպումը Վազգեն Սարգսյանի անվան «Հանրապետական» մարզադաշտում անցկացնելու խնդրանքով Հայաստանի ֆուտբոլի ֆեդերացիային դիմել էր նաև ՖԱ «Ալաշկերտը»: Նույն հիմնավորմամբ Հայաստանի ֆուտբոլի ֆեդերացիան Վազգեն Սարգսյանի անվան «Հանրապետական» մարզադաշտը չի տրամադրել նաև «Ալաշկերտ» ՖԱ-ին: «Ալաշկերտի» դեպքում ՈՒԵՖԱ-ն թույլատրել է ՈՒԵՖԱ Կոնֆերենցիաների լիգայի երկրորդ փուլի հանդիպումն անցկացնել Աբովյանի Վահագն Թումասյանի անվան մարզահամալիրում»,- ասվում է ՀՖՖ-ի՝ ArmSport-ին ուղարկված պատասխան նամակում:
