Կոնֆերենցիաների լիգայի որակավորման երկրորդ փուլի պատասխան խաղում Հայաստանի չեմպիոն «Ուրարտուն» ընդունել էր Ռումինիայի չեմպիոն «Ֆարուլին»։ Հանդիպումն ավարտվեց ռումինական թիմի հաղթանակով, իսկ «Ուրարտուն» ավարտեց ելույթները եվրագավաթային մրցաշարերում։
Հետխաղային ասուլիսի ժամանակ «Ուրարտուի» գլխավոր մարզիչ Դմիտրի Գունկոն խոսել է խաղի մասին։
«Մենք 2 տարբեր խաղակեսեր անցկացրեցինք։ Առաջին կեսում և 2-րդ սկզբում նույնիսկ վերահսկում էինք խաղը։ 2 գոլ խփեցինք, ամեն ինչ մեր օգտին էր, բայց ցավոք մեր եվրագավաթային մրցաշրջանն ավարտվեց։ Իհարկե, ամբողջ պատասխանատվությունը վերցնում եմ ինձ վրա։ Սա ինձ համար էլ էր առաջին փորձը եվրագավաթներում։
Առաջին կեսում և չեմ հիշում, որ սխալներ թույլ տված լինենք։ Մրցակիցը իրական գոլային պահեր չի ունեցել առաջին կեսում։
Երկրորդ կեսում, բնականաբար ստանդարտի ժամանակ սխալ կար։ Հետո 2։2 հաշվի ժամանակ մենք պետք է գոլ խփեինք և նետվել էինք առաջ։
Մենք բոլոր խաղերում առաջ էինք անցնում հաշվի մեջ, բայց հետո գոլ էինք բաց թողնում։ Իհարկե, մենթալ առումով խնդիրներ կային։
Չէի ասի, որ 60-րդ րոպեից հետո թիմը կանգնում է։ Դրա ապացույցն է Բոսնիայում կայացած խաղը։ Այսօր էլ կանգ չէինք առել։
Իմ կարծիքով՝ այսօր առաջին կեսը շատ հետաքրքիր էր։ Մենք Ռումինիայի չեմպիոնին կարողացանք թույլ չտալ գոլային պահեր ստեղծել մեր դարպասին առաջին կեսում։
Կրկնում եմ, որ ամբողջ պատասխանատվությունը մարզչական շտաբի՝ հատկապես ինձ վրա է։ Մենք կվերլուծենք խաղը։ Չեմ ուզում հիմա դրական կամ բացասական կետեր նշել»,- ասել է Գունկոն։
