Կոնֆերենցիաների լիգայի 2023/24 թթ․ մրցաշրջանի որակավորման առաջին փուլի առաջին խաղում «Արարատ-Արմենիան» կմրցի Ալբանիան ներկայացնող «Էգնատիայի» հետ։
Հուլիսի 13-ին կայանալիք հանդիպման նախախաղային ասուլիսի ժամանակ «Արարատ-Արմենիայի» գլխավոր մարզիչ Վարդան Մինասյանը խոսել է թիմի կազմի, նախամրցաշրջանային փուլի և սպասվող տրանսֆերների մասին։
«Մեր թիմի վերջին խաղը, եթե չեմ սխալվում, եղավ հունիսի 5-ին, որից հետո 12 օր հանգիստ ունեցանք։ Ճիշտ է անհատական մարզումների ծրագիր ունեին ֆուտբոլիստները, բայց ընդհանուր թիմային աշխատանքը մենք սկսեցինք հունիսի 18-ից, չնայած մի քանի խաղացողներ մեզ ուշ միացան, որովհետև հավաքականի կազմում ֆուտբոլիստներ ունեինք։ Կարելի է ասել, որ 3 շաբաթ ինչ միասին աշխատում ենք։
Գիտեք, որ տարբեր պատճառներով թիմից հեռացել են 9-10 ֆուտբոլիստներ։ Այս պահին, կարող եմ ասել հստակ, եթե չհաշվենք դարպասապահ Արսեն Բեգլարյանին, մենք ունեն 2 նորեկ։ Դրա մասին ակումբն արդեն հայտարարել է։ Սպասում ենք, որ 2 նորեկ էլ կունենանք․ մեկ կենտրոնական պաշտպան, և մեկ հարձակվող։
Կարելի է ասել, որ մեր կոմպլեկտացիան դեռ 50 %-ով է, բայց շարունակական է լինելու, որովհետև մինչև սեպտեմտեր տրանսֆերային պատուհանը բաց է մեր մոտ։ Ինչ վերաբերում է այս 3 շաբաթներին, ապա գոհ ենք այն ամենից, ինչ հասցրեցինք անել։ Ունեցանք 2 ընկերական խաղ Երևանում, ևս 2 խաղ՝ Վրաստանում։ Ինչ որ թիմը ցույց տվեց և մենք տեսանք, այս պահին մեզ գոհացնում է։ Իհարկե, մենք այս ամենը պետք է զարգացնենք, որովհետև կարճ ժամանակ է անցել և կարելի է ասել, որ 50 %-ով սա նոր թիմ է։
Այս պահին մեզ միացել է մեկ կենտրոնական պաշտպան Բրազիլիայից և մեկ պորտուգալացի հարձակողական ոճի կիսապաշտպան։ Վերջինս ունիվերսալ ֆուտբոլիստ է։ Նորից կրկնեմ, մենք հետևալ ձևով ենք աշխատել․ մենք ուզում ենք ոչ թե քանակ, այլ որակ ենք ուզում։ Այդ առումով, այս 2 ֆուտբոլիստները մեզ գոհացնում են։
Մեզ համար նոր ֆուտբոլիստ հրավիրելը դրա համար է դժվարանում, որովհետև մենք ցանկանում ենք լավ ֆուտբոլիստներ հրավիրել։ Մեզ քանակ պետք չէ։ Սպասում ենք ևս մեկ կենտրոնական պաշտպանի և ևս մեկ հարձակվող է մեզ հարկավոր։ Գիտեք, որ մենք 4 հարձակվող ունեինք, բայց նրանցից 3-ն արդեն թիմում չեն։ Այս պահին միայն Էզան է մնացել թիմում։
Հիմա ակումբը բանակցում է 2 ֆուտբոլիստի հետ»,- ասել է Մինասյանը։
«Արարատ-Արմենիա» — «Էգնատիա» հանդիպումը կկայանա հուլիսի 13-ին՝ Ավանի ֆուտբոլի ակադեմիայի մարզադաշտում։ Խաղի սկիզբը՝ 19։00։
