Թոփ-5 լիգաներում 2022/23 մրցաշրջանն արդեն ավարտվել է և ժամանակն է ամփոփել ուժեղագույն լիգաների հետ կապված գլխավոր իրադարձությունները, թվերը փաստերը և այլն։
Այսօր մեր դիտակետում 5 առաջնությունների լավագույն ֆուտբոլիստներն են, բայց ոչ թե մեր կողմից ընտրված խաղացողների մասին խոսքը կգնա, այլ այն մարզիկների, որոնք պաշտոնապես ճանաչվել են լավագույնն իրենց առաջնություններում։
⚽ ԱՊԼ․ Էրլինգ Հոլանդ․ «Մանչեսթեր Սիթի»
«Մանչեսթեր Սիթիի» նորվեգացի հարձակվող Էրլինգ Հոլանդը հիանալի մրցաշրջան անցկացրեց ԱՊԼ-ում: 22-ամյա նորվեգացին արժանացել է միանգամից երկու մրցանակի՝ նա ճանաչվել է Պրեմիեր լիգայի մրցաշրջանի լավագույն խաղացող և Պրեմիեր լիգայի լավագույն երիտասարդ խաղացող։ Հոլանդը դարձավ Պրեմիեր լիգայի պատմության առաջին խաղացողը, ով մեկ մրցաշրջանում կարողացավ նվաճել այս երկու մրցանակները։
Բացի այդ, Հոլանդն այս մրցաշրջանում գերազանցեց բազմաթիվ ռեկորդներ ԱՊԼ-ում, որոնցից ամենակարևորը՝ մեկ մրցաշրջանում խփած գոլերի քանակով ռեկորդն է (36 գոլ)։ Եվ այս ամենին «երիտասարդ վիկինգը» հասել է ԱՊԼ-ում առաջին մրցաշրջանի ընթացքում․․․ Պարզապես ֆանտաստիկ է․․․
Ֆուտբոլիստը նաև այս տարի «Ոսկե գնդակի» մրցանակի գլխավոր ֆավորիտներից մեկն է։ Հետաքրքիր է՝ մրցանակը բաժին կհասնի Մեսսիի՞ն, որը դարձավ աշխարհի չեմպիոն Արգենտինայի հավաքականի հետ, թե՞ Հոլանդին, որն այս տարի իր թիմի հետ թրեբլ նվաճեց՝ դառնալով ամենաարդյունավետ ֆուտբոլիստը թոփ լիգաներում և Չեմպիոնների լիգայում։
⚽ Ա Սերիա․ Խվիչա Կվարացխելիա․ «Նապոլի»
Վրաստանի հավաքականի առաջատար Խվիչա Կվարացխելիան ճանաչվել է Ա Սերիայի 2022/23 մրցաշրջանի լավագույն Ֆուտբոլիստ։ Ինչպես մեր նախորդ հերոսը, նա ևս ճանաչվեց լավագույնն իր լիգայում այս առաջնությունում իր առաջին իսկ մրցաշրջանում։
Իտալիայի առաջնությունում իր դեբյուտային մրցաշրջանում «Նապոլիի» հարձակվողը 33 խաղում դարձել է 12 գոլի և 13 գոլային փոխանցման հեղինակ և օգնել է իր թիմին նվաճել չեմպիոնի տիտղոսը:
Նշենք, որ «Նապոլիի» ևս մեկ նորեկ՝ Կիմ Մին Ջեն, ճանաչվել է մրցաշրջանի լավագույն պաշտպան, իսկ թիմի հարձակվող Վիկտոր Օսիմհենը՝ առաջնության լավագույն ռմբարկու։
⚽ Բունդեսլիգա․ Ջուդ Բելինգհեմ․ «Բորուսիա»
Դորտմունդի «Բորուսիայի» կիսապաշտպան Ջուդ Բելինգհեմը, որը հաջորդ մրցաշրջանից կկրի «Ռեալի» մարզաշապիկը, ճանաչվել է Բունդեսլիգայի ավարտված մրցաշրջանի լավագույն ֆուտբոլիստ։
Նախորդ մրցաշրջանում 19-ամյա կիսապաշտպանը Բունդեսլիգայում անցկացրել է 31 հանդիպում՝ դառնալով 8 գոլի և 5 գոլային փոխանցման հեղինակ։ «Բորուսիան» մրցաշրջանն ավարտեց երկրորդ տեղում։
Բելինգհեմն այսօրվա մեր հերոսների ցանկում ամենաերիտասարդն է և նա ևս մեկ քայլ առաջ կատարեց՝ տեղափոխվելով համաշխարհային գրանդ։ Հաջորդ մրցաշրջանում մենք արդեն կհետևենք նրա ելույթներին Լա լիգայում և, միգուցե, ականատեսն ենք ևս մեկ համաշխարհային աստղի վերելքին՝ դեպի ֆուտբոլային էլիտայի երկնակամար։
⚽ Լիգա 1․ Կիլիան Մբապե․ ՊՍԺ
ՊՍԺ-ի հարձակվող Կիլիան Մբապեն չորրորդ անգամ անընդմեջ ճանաչվել է ֆրանսիական Լիգա 1-ի լավագույն ֆուտբոլիստ։ Ֆրանսիացի հարձակվողն այս մրցանակը ստացել է 2019, 2021 և 2022 թվականներին (2020 թվականին համաճարակի պատճառով մրցանակաբաշխություն չի եղել):
Բացի այդ, նա 5-րդ անգամ անընդմեջ դարձավ Լիգա 1-ի լավագույն ռմբարկու (2019/20 մրցաշրջանում կիսել է առաջին տեղը Բեն Յեդերի հետ)։ Ֆրանսիայի առաջնությունում Մբապեն ամեն ինչի արդեն հասել է, դարձել է նաև փարիզյան ակումբի պատմության ամենաարդյունավետ ֆուտբոլիստը, գերազանացել բոլոր հնարավոր ռեկորդները և ցուցանիշները․․․ Միգուցե ժամանա՞կն է նոր արկածների հետևից գնալուն․․․
Հիմա չենք խոսի վերջին օրերի իրադարձությունների մասին․ վստահ եմ՝ բոլորս արդեն կուշտ ենք նրա ապագայի հետ կապված տարաբնույթ նորություններից․․․ Բայց եկեք չբացառենք այն հնարավորությունը, որ այսօրվա մեր մյուս հերոսի՝ Բելինգհեմի հետ միասին նրանք կարող են նոր էջ բացել Ռեալի պատմության գրքում․․․ Հետաքրքիր է՝ իրադարձությունների նման զարգացման դեպքում ո՞վ կդառնա Լա լիգայի հաջորդ մրցաշրջանի լավագույն ֆուտբոլիստը․․․
⚽ Լա Լիգա․ Մարկ-Անդրե տեր Շտեգեն․ «Բարսելոնա»
Իսկ մինչ Բելինգհեմի արդեն կայացած և Մբապեի հավանական տեղափոխությունը, Լա լիգան առանց նրանց էլ հարուստ է թոփ ֆուտբոլիստներով, և այստեղ ևս որոշվել է մրցաշրջանի լավագույնը։ Եթե նախորդ 4 լիգաներում մրցաշրջանի լավագույններն են ճանաչվել բավականին երիտասարդ ֆուտբոլիստներ, ապա իսպանական լիգայում լավագույնը փորձառու ֆուտբոլիստ է։
«Բարսելոնայի» դարպասապահ Մարկ-Անդրե տեր Շտեգենը ճանաչվել է Լա լիգայի 2022/2023 մրցաշրջանի լավագույն խաղացող։ Հիշեցնենք, որ գերմանացի դարպասապահն առաջնության ընթացքում գերազանցել է «Բարսելոնայի» ռեկորդը՝ Լա լիգայի մեկ մրցաշրջանում «չոր» հանդիպումների քանակով։ Տեր Շտեգենը մասնակցել է Լա լիգայի բոլոր 38 խաղերին և դրանցից 26-ում անառիկ է պահել սեփական դարպասը: Այսպիսով, Տեր Շտեգենը գերազանցել է Կլաուդիո Բրավոյի ռեկորդը, ով 2014/2015 մրցաշրջանում 23 անգամ էր դարպասն անառիկ պահել:
Ահա և այս մրցաշրջանի լավագույն ֆուտբոլիստները թոփ-5 լիգաներում։ Եկեք մտապահենք նրանց՝ մեկ տարի անց վերադառնալու պայմանով։ Հետաքրքիր է՝ այս հնգյակից ո՞ւմ նորից կտեսնենք հաջորդ ամառ լավագույնների ցանկում․․․
