Երևանի «Դինամո» մարզադահլիճում ավարտին է մոտենում աշխարհի ու Եվրոպայի կրկնակի չեմպիոն, հունահռոմեական ոճի ըմբիշ Բենուր Փաշայանին նվիրված միջազգային հուշամրցաշարը, որին Հայաստանի և ևս 5 երկրի՝ Ռուսաստանի, Բուլղարիայի, Բելառուսի, Վրաստանի և Իրանի ներկայացուցիչ են մասնակցում:
Հայաստանի հավաքականը եզրափակչի 8 ներկայացուցիչ է ունեցել, որոնցից 3-ը կարողացել են ոսկե մեդալներ նվաճել: Չեմպիոնի կոչմանն արժանացել են 67 կգ քաշային Սլավիկ Գալստյանը, 72 կգ քաշային Շանթ Խաչատրյանը և 82 կգ քաշային Մաքսիմ Մանուկյանը:
Վերջինս երկու տարվա դադարից հետո վերադառալով ըմբշամարտի գորգ՝ եզրափակչում 5:3 հաշվով կամային հաղթանակ է տարել Ռուսաստանի ներկայացուցչի նկատմամբ՝ հաղթական միավորները վաստակելով գոտեմարտի վերջին վայրկյաններին փայլուն հնարքով:
Հուշամրցաշարի փոխչեմպիոններ են դարձել 55 կգ քաշային Ռոբերտ Կարապետյանը, 63 կգ քաշային Արթուր Մելքոնյանը, 67 կգ քաշային Հայկ Մելիքյանը, 72 կգ քաշային Արարատ Վարդերեսյանը, 77 կգ քաշային Աշոտ Կիրակոսյանը:
Բենուր Փաշայանի հուշամրցաշարը ընտրական է հունահռոմեական ոճի ըմբշամարտի Հայաստանի հավաքականի համար: Մրցաշարում ցույց տված արդյունքներով կձևավորվի Հայաստանի հավաքականը, որը սեպտեմբերին կմասնակցի 2024թ․ Փարիզի Օլիմպիական խաղերի համար վարկանիշային աշխարհի առաջնությանը: