ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանն ամփոփել է Երևանում ապրիլի 15-23-ն անցկացված ծանրամարտի Եվրոպայի առաջնությունը:
Անդրադառնալով հայ ծանրորդների մրցելույթներին՝ ԿԳՄՍ նախարարն ընդգծել է՝ հիացած է նրանց ցույց տված արդյունքներով. «Հպարտանում եմ մեր մարզիկներով և հիանում եմ նրանց ելույթներով: Ամբողջ թիմով՝ բոլորը մեկ մարդու պես, մեդալ նվաճեցին: Աղջիկները ևս հիանալի հանդես եկան: Մեդալային հաշվարկում մեծագույն առավելությամբ հաղթեցինք բոլորին և թիմային առաջին հորիզոնականը զբաղեցրինք: Ուզում եմ շնորհակալություն հայտնել մարզիչներին իրենց գրագետ, պրոֆեսիոնալ և հաշվարկված գործողությունների ու կատարած ահռելի աշխատանքի համար»:
ԿԳՄՍ նախարարի տեղակալն առանձնահատուկ կարևորում է նաև երկրպագուների աջակցությունը: Հիշեցնենք՝ մրցումային վերջին օրը՝ ապրիլի 23-ին, Կ. Դեմիրճյանի անվան մարզահամերգային համալիրում 4418 հանդիսական է ներկա եղել, ինչը ռեկորդային է ծանրամարտի Եվրոպայի առաջնությունների պատմության մեջ:
«Երկրպագուները հիանալի էին: Այսպիսի տրիբունաներն ի զորու են մարզիկներին մղելու հերոսության և տանելու դեպի ամենաբարձր գագաթներ: Շնորհակալություն մարզասերներին, որ մինչև վերջին պահը մնում էին ու ոգևորում էին մարզիկներին իրենց վանկարկություններով և ծափողջույններով: Ծանրամարտի այսպիսի առաջնություն, այսպիսի մարդաշատ տրիբունաներ Եվրոպան դեռ չէր տեսել: Վստահ եմ՝ եթե աշխարհի առաջնությունն էլ ընդունենք, էլի այսպես է լինելու, առանց կասկածի»:
Անդրադառնալով կազմակերպչական աշխատանքին՝ Կարեն Գիլոյանը շեշտել է՝ միջազգային հյուրերից միայն դրական արձագանքներ է լսել.
«Մեծագույն հպարտություն եմ ապրում, որ Հայաստանի Հանրապետությունն այս կարգի մրցաշարը կարողանում է անցկացնել ամենաբարձր մակարդակում և աշխարհին ապացուցում է, որ մենք հզոր ենք, ուժեղ ենք և առանց կասկածի կարող ենք ամենաբարձր կարգի առաջնություն անցկացնել: Մեր միջազգային գործընկերներն ու հյուրերը ևս հիացած էին. ոմանք այս առաջնությունը նաև Օլիմպիական խաղերի հետ էին համեմատում ու նրանք իրավացի էին»,- եզրափակել է Կարեն Գիլոյանը:
Հիշեցնենք՝ Հայաստանը թիմային հաշվարկում առաջին հորիզոնականն է զբաղեցրել ծանրամարտի Եվրոպայի առաջնությունում: Հայ ծանրորդները երկամարտում ընդհանուր առմամբ 13 մեդալ են նվաճել՝ 4 ոսկե, 4 արծաթե և 5 բրոնզե:
Ծանրամարտի Եվրոպայի 101֊րդ առաջնությանը եվրոպական 39 երկրի շուրջ 375 մարզիկ է մասնակցել: Խաղարկվել է մեդալների 20 հավաքածու՝ տղամարդկանց և կանանց 10-ական քաշային կարգերում: Եվրոպայի առաջնությունը վարկանիշային էր Փարիզի 2024 թվականի Օլիմպիական խաղերի համար: