Երևանի Կարեն Դեմիրճյանի անվան մարզահամերգային համալիրում կայացել է ՀՀ վաստակավոր մարզիչ, ֆիզիկական կուլտուրայի և սպորտի պատվավոր աշխատող Լյովա Վարդանյանին նվիրված Մ23 տարեկանների ազատ ոճի ըմբշամարտի միջազգային հուշամրցաշարը, որին 8 երկրի շուրջ 130 ներկայացուցիչներ են մասնակցել:
Հուշամրցաշարն անցկացվել է Երևանի քաղաքապետարանի և Հայաստանի ըմբշամարտի ֆեդերացիայի աջակցությամբ:
Երկրորդ անգամ անցկացվող հուշամրցաշարին մասնակցել են ըմբիշներ Մոլդովայից, Բելառուսից, Իրանի Իսլամական Հանրապետությունից, Վրաստանից, Հնդկաստանից, Բահրեյնից, Ռուսաստանից և Հայաստանից: Եզրափակչում Հայաստանն ունեցել է 4 ներկայացուցիչ, որոնցից 2-ը՝ Առաքել Մովսեսյանը (57 կգ) և Էդիկ Հարությունյանը (61 կգ) նվաճել են ոսկե մեդալները:
Լյովա Վարդանյանի հուշամրցաշարի հաղթողներ են ճանաչվել նաև Ռուսաստանի ներկայացուցիչ Դալգատ Աբդուլկադիրովը (65 կգ), բելառուս Նիկիտա Դմիտրիևը (70 կգ), ռուսաստանցիներ Մագոմեդ Կարդանովը (74 կգ), Մագոմեդ Աբդուլկադիրովը (79 կգ), Ալան Նայֆոնովը (86 կգ), Վրաստանի ներկայացուցիչ Անդրե Մարգիշվիլին (92 կգ), բելառուս Վլադիսլավ Կազլովը (97 կգ) և իրանցի Պաուլադի Ամիրալին (125 կգ):
Ազատ ոճային ըմբիշ, 57 կգ քաշային Առաքել Մովսեսյանն արժանացել է նաև հատուկ մրցանակի՝ հաշվի առնելով այն, որ Լյովա Վարդանյանը մարզական կարիերայի ընթացքում հանդես է եկել հենց այդ քաշային կարգում: Մրցանակը երիտասարդ ըմբիշին հանձնել է Լյովա Վարդանյանի որդին՝ միջազգային կարգի մրցավար Ավետիք Վարդանյանը:
Առաքելի խոսքով՝ եզրափակչում հաղթանակը շատ բարդ տրվեց իրեն. «Մրցակիցս շատ փորձառու ըմբիշ էր, երկու անգամ նախկինում գոտեմարտել էինք իրար հետ: Մեկ անգամ ես էի հաղթել, մեկ անգամ՝ նա: Լարվածությունը շատ էր, ու խանգարում էր ինձ, բայց կարողացա հավաքվել ու հաղթանակի հասնել: Շատ ուրախ եմ այդ առիթով»:
Մրցաշարի եզրափակիչներին հետևել և պարգևատրման արարողությունն իրականացրել են ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանը, Երևանի փոխքաղաքապետներ Տիգրան Ավինյանը, Գևորգ Սիմոնյանը, ներկայացուցիչներ Հայաստանի ազգային օլիմպիական կոմիտեից, Հայաստանի ըմբշամարտի ֆեդերացիայից և այլ կառույցներից:
ԿԳՄՍ նախարարի տեղակալ Կարեն Գիլոյանը, բարձր գնահատելով ըմբշամարտի նվիրյալ Լյովա Վարդանյանի վաստակը, կարևորել է նմանօրինակ հուշամրցաշարերի անցկացումը՝ որպես հարգանքի տուրք անվանի մասնագետի հիշատակին:
«Լյովա Վարդանյանն, իսկապես, երախտավոր է և շատ մեծ ավանդ ունի հայկական ըմբշամարտի հաջողություններում՝ որպես մարզիկ, մարզիչ ու նաև մրցավար: Շատ լավ է, որ նրա հիշատակը նաև այսպես են ոգեկոչում: Շատ լավ մրցում է ստացվել բազմաթիվ թիմերի մասնակցությամբ: Հուսանք՝ այն կդառնա ավանդական և աստիճանաբար իր հարգը կբարձրացնի»,- ասել է Կարեն Գիլոյանը:
Միջազգային կարգի մրցավար Ավետիք Վարդանյանի խոսքով` մրցաշարը որակական առումով կարելի է ստացված համարել, քանի որ այս անգամ այն բավական ուժեղ կազմ էր հավաքել.
«Կարծում եմ՝ լավ մրցաշար էր: Շատ լավ թիմեր էին հավաքվել, որոնց կազմերում աշխարհի ու Եվրոպայի երիտասարդական առաջնությունների հաղթողներ ու մրցանակակիրներ կային: Տարեցտարի կարելի է ավելի ուժեղացնել մրցաշարը և դրա աշխարհագրությունը: Ինչ վերաբերում է հայ մարզիկների ելույթներին, կարծում եմ, մերոնք վատ հանդես չեկան»:
Նշենք՝ մինչև 23 տարեկան ըմբիշները նախապատրաստվում են Եվրոպայի երիտասարդական առաջնությանը, որը կկայանա Ռումինիայի մայրաքաղաք Բուխարեստում մարտի 13-19-ը: