Օրեր անց 21-րդ տուրով կմեկնարկի Fastex Հայաստանի Պրեմիեր լիգայի գարնանային հատվածը։ Տուրը կկայանա երեք խաղային օրով․ փետրվարի 27-ին, 28-ին և մարտի 1-ին։ Մինչ այս, սակայն, փետրվարի 24-ին կկայանա 13-րդ տուրից հետաձգված հանդիպում։
ArmSport-ն ամփոփել է, թե ինչ փոփոխություններով և ինչպիսի նախապատրաստական շրջանով են մեր թիմերը մոտենում մրցաշրջանի երկրորդ մասին։
«Ուրարտու»
Հունվարի 6-ից մարզումները վերսկսած «Ուրարտուն» մրցաշրջանի երկրորդ հատվածին նախ պատրաստվում էր սեփական մարզաբազայում, որի ընթացքում նաև ստուգողական հանդիպում անցկացրեց՝ մրցելով «Լեռնային Արցախի» հետ (3-0):
Հունվարի 16-ին ակումբը յուրօրինակ կերպով հայտարարեց տարվա առաջին տրանսֆերի՝ Արաս Օզբիլիսի մասին։ Օզբիլիսից հետո երևանյան թիմի կազմը համալրեցին նաև բրազիլացի պաշտպան Ռաֆայել դա Սիլվան, ֆրանսիացի հայտնի հարձակվող Յայա Սանոգոն, որը թերևս Գուֆրանից հետո, երկրորդ ամենահայտնի ֆուտբոլիստն է, որ հանդես է գալու մեր առաջնությունում, ուկրաինացի պաշտպան Իվան Զոտկոն, Բուրկինա Ֆասոյի ազգային հավաքականի կիսապաշտպան Դրամանե Սալուն և ռուսաստանցի հարձակվող Թեմուր Ջիկիան, որը թիմում կմնա մինչև մրցաշրջանի ավարտ՝ վարձակալական հիմունքներով։
Այս ընթացքում թիմից հեռացան բրազիլացի հարձակվող Դեյվիդի Բույուն, որը վարձավճարով էր այստեղ, և Համլետ Սարգսյանը, որը տեղափոխվեց ԲԿՄԱ։
Հունվարի 29-ից փետրվարի 13-ը «Ուրարտուն» ուսումնամարզական հավաք անցկացրեց ԱՄԷ-ում․ Դմիտրի Գունկոյի սաներն այնտեղ ստուգողական հանդիպումներ անցկացրեցին՝ մրցելով «Յունայթեդի» (4-2), Մոսկվայի «Լոկոմոտիվի» (0-1), Սանկտ Պետերբուրգի «Զենիթի» (0-1) և «Գալֆ Յունայթեդի» (7-2) հետ։
Հարկ է նշել, որ Մոսկվայի «Լոկոմոտիվի» դեմ խաղում «Ուրարտուի» կիսապաշտպան Սերգեյ Մկրտչյանը ծանր վնասվածք էր ստացել՝ ծնկի խաչաձև կապանների և միջային մենիսկի հետին եղջյուրի թեթև պատռվածք․ ֆուտբոլիստը 4-6 ամիս բաց կթողնի։
Նախքան ՀՊԼ երկրորդ հատվածի վերսկսումը Գունկոյի սաները Երևանում ևս երկու ընկերական խաղ անցկացրեցին՝ նվազագույն հաշվով հաղթելով «Լեռնային Արցախին» և 2-0՝ «Գանձասարին»։
ՀՊԼ մրցաշարային աղյուսակը գլխավորող «Ուրարտուն» գարնանային հատվածի առաջին խաղը կանցկացնի մարտի 1-ին՝ սեփական հարկի տակ ընդունելով Չարենցավանի «Վանին»։
«Ալաշկերտ»
«Ալաշկերտը» նախորդ տարին ավարտեց բեկումնային փոփոխություններով․ թիմի գլխավոր մարզչի պաշտոնը ստանձնեց Վահե Գևորգյանը, իսկ մի շարք խաղացողներ՝ այդ թվում Տիագո Կոելյոն, Վանգու Բատիստա Գոմեն, Ֆոֆանա Բեկոն, Սանտոսը, Բորիս Կադիոն, Բենիկ Հովհաննիսյանը, Կարապետ Մանուկյանը, Սարգիս Մեթոյանը, Բլադիմիր Դիասը, Դեու Դոսան, Ռոնալդ Կուելյարը, Լուկաս Վենտուրան և Կևին Ռեյեսը հեռացան թիմից:
Արդեն այս տարի թիմից հեռացան Անդրանիկ Ոսկանյանը, Արման Մելիքսեթյանը, Սերգեյ Ռևյակինը, Վահագն Այվազյանը, Ռումյան Հովսեփյանը և Բուրբանո Կաստիլյոն։
Թիմի կազմը համալրեցին ռուս պաշտպան Վիտալի Ուստինովը, Հայաստանի ազգային հավաքականի և «Արարատ-Արմենիայի» կիսապաշտպան Վբեյմար Անգուլոն՝ վարձակալությամբ, վենեսուելացի պաշտպան Դանիել Կարիլյոն, «Արարատ-Արմենիայի» բրազիլացի հարձակվող Ագդոն Մենեզեսը, որը ևս թիմում կմնա մինչև մրցաշրջանի ավարտ՝ վարձակալական հիմունքներով, կիսապաշտպան Արամ Քոչարյանը, սերբ հարձակվող Ուրոշ Նենադովիչը, էկվադորցի հարձակվող Յեյսոն Ռասինեսը, կիսապաշտպան Կարեն Նալբանդյանը, ղազախ կենտրոնական պաշտպան Տիմուր Ռուդոսելսկին, պաշտպան Սերոբ Գրիգորյանը, պաշտպան Արման Խաչատրյանը, խորվաթ պաշտպան Մատեո Մուժեկը, հարձակվող Արթուր Միրանյանը, դարպասապահ Սևակ Ասլանյանը, ուկրաինացի դարպասապահ Ռոման Միսակը և խորվաթ կիսապաշտպան Իվան Պեշիչը։
Հունվարի 7-ից «Ալաշկերտը» Երևանում վերսկսեց մարզումները, իսկ հունվարի 18-ից փետրվարի 14-ն ուսումնամարզական հավաք անցկացրեց Բելեկում, որտեղ ստուգողական հանդիպումներ անցկացրեց լեհական «Պոդբեսկիձիեի» (1-2), ռուսական «Ենիսեյի» (0-1), ուզբեկական «Նեֆթչիի» (1-0), ուկրաինական «Զարյայի» (2-0), ուզբեկական «Բուխարայի» (1-1) և ղազախական «Կիզիլ Ժարի» (2-0) հետ։
Երևան վերադառնալուց հետո «Ալաշկերտը» ևս մեկ ստուգողական խաղ անցկացրեց «Արարատի» հետ՝ հաղթելով 2-1 հաշվով։
Հարկ է նշել, որ «Ալաշկերտ» է վերադարձել թիմի նախկին ռմբարկու Միհրան Մանասյանը՝ ստանձնելով թիմի պետի պաշտոնը, իսկ ակումբի սպորտային տնօրեն է նշանակվել ռուս Նիկիտա Պոլուխինը, որն ավելի վաղ տարբեր պաշտոններ էր զբաղեցրել «Ուրարտուում» և «Նորավանքում»։
Այս ընթացքում «Ալաշկերտի» պաշտպան Ռոբերտ Նավոյանը զորակոչվել է բանակ։
Վահե Գևորգյանի սաները ՀՊԼ գարնանային հատվածը սկսում են 4-րդ հորիզոնականում, իսկ առաջին խաղը կանցկացնեն մարտի 1-ին՝ հյուրընկալվելով «Լեռնային Արցախին»։
«Վան»
Նախորդ տարվա ավարտին Չարենցավանը ներկայացնող թիմից հեռացան Արտյոմ Բիլին, Միլան Լալիչը, Գուտիերես Սիլվիոն, Ալիկ Հովհաննիսյանը, Չանբա Դաուրը և Կիրիլ Անտրոպովը։
Այս տարի ակումբի մարզչական շտաբում տեղի ունեցան փոփոխություններ․ գլխավոր մարզչի պաշտոնում նշանակվեց Ումբերտո Վիվիանին, որի հետ աշխատում է իսպանացի Նիկոլաս Օչանդոն։ Ակումբի սպորտային տնօրեն նշանակվեց Իսիդրո Բալտասարը։
Թիմից հեռացան կիսապաշտպան Շոթա Գվազավան, պաշտպան Ալան Տատաևը, Բոգդան Միցիկը, Մուբարակ Ահմեդը, Դավիթ Պապիկյանը, Էմանուել Միրեկուն, Գեղամ Հարությունյանը, Եվգենի Գրիցենկոն, Դավիթ Արշակյանը և Արթուր Ստեփանյանը։
Թիմի կազմը համալրեցին պաշտպան Արթուր Քարտաշյանը, Արման Մկրտչյանը, արգենտինացի պաշտպան Մանուել Մորելոն, Հասարակածային Գվինեայի կիսապաշտպան Ռենատու Բենգոն, կոլումբացի պաշտպան Խուան Դանիել Սիֆուենտես Վերգարան, դարպասապահ Դիեգո Զամորան, վենեսուելացի Ուիլսոն Բարրիոսը, պաշտպան Արմեն Մանուչարյանը, կիսապաշտպան Ռումյան Հովսեփյանը, գանացի Մոհամեդ Ֆաթաուն, Գեղամ Ղադիմյանը և Էմմանուել Պետրոսյանը։
«Վանը» մրցաշրջանի նախապատրաստության ընթացքում ընկերական խաղեր անցկացրեց Հայաստանում՝ «Միկայի» (4-1), երկու անգամ «Նոայի» (1-1), (2-2), երկու անգամ ԲԿՄԱ-ի (1-0), (0-1) և «Արարատի» (3-3) հետ։
«Վանի» համար մրցաշրջանի երկրորդ հատվածը կսկսվի փետրվարի 24-ին․ 13-րդ տուրից հետաձգված խաղում թիմը կմրցի «Փյունիկի» հետ։
«Արարատ»
Երևանի «Արարատը» մրցաշրջանի գարնանային հատվածի պատրաստությունը սկսեց հունվարի 10-ից՝ սեփական մարզաբազայում և արտասահմանյան հավաքի չմեկնեց։
Թիմում այս տարի ելույթները չեն շարունակի Ռոբերտ Դարբինյանը, Ալիյու Իսահը, Գևորգ Արաբյանը և իվուարցի Դիմիտրի Լեգբոն, որը տեղափոխվեց ֆիննական «Ինտեր»։
Թիմի կազմը համալրեցին իվուարցի Մուհամեդ Լամին Կոնեն, նիգերիացի Իբեհ Ռանսոմ Ջիդեչուկվուն, բուլղարացի հարձակվող Գեորգի Բաբալիևը, Ֆրանսիայի և Կոմորյան կղզիների քաղաքացի Կասիմ Հաջին, սերբ պաշտպան Դուշան Միյիչը, ռուս դարպասապահ Սերգեյ Ռևյակինը, կիսապաշտպան Պետրոս Աֆաջանյանը, հարձակվող Ալեքսանդր Տեր-Թովմասյանը, կիսապաշտպան Էրիկ Ազիզյանը, պաշտպան Արման Հովհաննիսյանը։ Թիմի հետ պայմանագիրը երկարաձգեց Սերոբ Գալստյանը։
«Արարատը» նախապատրաստական փուլում ստուգողական խաղեր անցկացրեց՝ մրցելով «Շիրակի» (2-2), ԲԿՄԱ-ի (3-2), «Նոայի» (3-3), «Վանի» (3-3) և «Ալաշկերտի» (1-2) հետ։
Հարկ է նշել, որ մրցաշրջանի գարնանային հատվածի մեկնարկային երկու տնային հանդիպումներն «Արարատը» չի կարողանա անցկացնել Վազգեն Սարգսյանի անվան «Հանրապետական» մարզադաշտում՝ հավաքականի հանդիպումներին ընդառաջ այնտեղ կատարվող նախապատրաստական աշխատանքների հետ կապված: Թիմը կխաղա Աբովյանում։
«Արարատը», որը ՀՊԼ մրցաշարային աղյուսակի 6-րդ տեղում է, մրցաշրջանի երկրորդ հատվածի առաջին խաղը կանցկացնի փետրվարի 27-ին՝ տանն ընդունելով «Արարատ-Արմենիային»։
«Նոա»
«Նոան» գարնանային հատվածի նախապատրաստությունը սկսեց հունվարի 12-ից և արտասահմանյան հավաք չունեցավ։
Այս ընթացքում թիմից հեռացան կիսապաշտպան Կարեն Նալբանդյանը, Դրամանե Սալուն և դարպասապահ Անատոլի Այվազովը։
Թիմի կազմը համալրեցին պաշտպան Երջանիկ Ղուբասարյանը, պաշտպան Արսեն Գալստյանը, ֆրանսիացի հարձակվող Ալեքսանդր Լովեն, պաշտպան Սերգեյ Մուրադյանը և հոլդինգի մաս կազմող հունգարական «Դեբրեցենի» նիգերիացի հարձակվող Փիթեր Օլավալեն ու ռումինացի դարպասապահ Ռաուլ Բալբարաուն՝ վարձակալությամբ։
Ակումբի բժշկական շտաբը գլխավորեց 27-ամյա մասնագետ Նորայր Գասպարյանը։
«Նոան» նախապատրաստական փուլում ստուգողական հանդիպումներ անցկացրեց «Արարատ-Արմենիայի» (4-0), երկու անգամ «Վանի» (1-1), (2-2), «Արարատի» (3-3), «Վեստ Արմենիայի» (3-5), ԲԿՄԱ-ի (1-1) և «Փյունիկի» (1-3) հետ։
Հարկ է նշել, որ այս տարի «Նոայի» տնային մարզադաշտը կլինի Աբովյանի «Քաղաքային» մարզադաշտը, որի լուսավորության համակարգի շնորհիվ թիմն արդեն մրցակիցներին կարող է հյուրընկալել նաև երեկոյան ժամերին։
ՀՊԼ մրցաշարային աղյուսակը եզրափակող «Նոան»՝ մրցաշրջանի երկրորդ հատվածը կմեկնարկի փետրվարի 27-ին՝ հյուրընկալվելով ԲԿՄԱ-ին։
Ստելլա Բաբլոյան
