Ֆուտբոլային աշխարհում Եվրոպա լիգան, իսկ նախորդ մրցաշրջանից սկսած նաև Կոնֆերենցիաների լիգան համարվում են երկրորդական և երրորդական մրցաշարեր։ Բնականաբար, հին աշխարհի ակումբային ամենահեղինակավոր ֆուտբոլային մրցաշարին՝ Չեմպիոնների լիգային, ոչինչ չի հասնի, բայց հենց նախորդ մրցաշրջանը դարձավ բեկումնային։ Թեմային ավելի մանրամասն անդրադարձել էինք Եվրոպա լիգայի և Կոնֆերենցիաների լիգայի խմբային փուլի մեկնարկից առաջ։ Այս անգամ Armsport-ի ուշադրության կենտրոնում են մրցաշարերի փլեյ-օֆֆ փուլերը։
Եվրոպա լիգա և Կոնֆերենցիաների լիգա
Ինչպես ներկայացրել էինք վերոնշյալ հոդվածում, ՈՒԵՖԱ-ն արդեն սինխրոնացրել է բոլոր 3 մրցաշարերի՝ Չեմպիոնների լիգայի, Եվրոպա լիգայի և Կոնֆերենցիաների լիգայի խաղացանկը։ Կա միայն մի տարբերություն։ Երբ ՉԼ-ում ընթանում է 1/8 եզրափակիչը, մյուս 2 մրցաշարերում 2 փուլ է կայանում՝ 1/16-ը կամ, ինչպես ասում են, անցումայինը և բուն 1/8 եզրափակիչը։
Եվ այսպես, նախ վերհիշենք այն թիմերին, որոնք այս մրցաշարերում իրենց խմբերում զբաղեցրել են առաջին տեղերն ու առաջիկա 2 շաբաթվա ընթացքում անգործ են լինելու՝ սպասելով 1/16 եզրափակիչի խաղերի ավարտին։
Եվրոպա լիգա՝
«Արսենալ» (Անգլիա)
«Ֆեներբահչե» (Թուրքիա)
«Բետիս» (Իսպանիա)
«Յունիոն Սենտ Ժիլուա» (Բելգիա)
«Ռեալ Սոսյեդադ» (Իսպանիա)
«Ֆեյենորդ» (Նիդերլանդներ)
«Ֆրայբուրգ» (Գերմանիա)
«Ֆերենցվարոշ» (Հունգարիա)
- Եվրոպա լիգայի 1/8 եզրափակիչի վիճակահանությունը կկայանա փետրվարի 24-ին։ Վերոնշյալ թիմերին կմիանան 1/16 եզրափակիչի զույգերի հաղթողները։ Հանդիպումները նախատեսված են մարտի 9-ին և 16-ին։
Կոնֆերենցիաների լիգա
«Իստանբուլ Բաշակշեհիր» (Թուրքիա)
«Վեսթ Հեմ» (Անգլիա)
«Վիլյառեալ» (Իսպանիա)
«Նիցցա» (Ֆրանսիա)
«ԱԶ Ալկմար» (Նիդերլանդներ)
«Յուրգորդեն» (Շվեդիա)
«Սիվասպոր» (Թուրքիա)
«Սլովան Բրատիսլավա» (Սլովակիա)
- Կոնֆերենցիաների լիգայի 1/8 եզրափակիչի վիճակահանությունը կկայանա փետրվարի 24-ին։ Վերոնշյալ թիմերին կմիանան 1/16 եզրափակիչի զույգերի հաղթողները։ Հանդիպումները նախատեսված են մարտի 9-ին և 16-ին։
Մրցաշարերի փլեյ-օֆֆի անցումային փուլը (1/16 եզրափակիչը)
Հիմա արդեն կարող ենք անդրադառնալ 1/16 եզրափակիչում սպասվող դիմակայություններին։
⏳ Հանդիպումների ժամանակացույցը Եվրոպա լիգայում
16.02 ⏳ 21։45. «Այաքս» — «Ունիոն Բեռլին»
Ամստերդամի «Այաքսը» վերջին շրջանում զիջել է դիրքերը։ Ճիշտ է, թիմն անպարտելիության շարք ունի, բայց վերջերս հեռացրել է գլխավոր մարզիչ Ալֆրեդ Շրոյդերին։ Թիմը 3-րդ տեղում է Էրեդիվիզիում։ Նոր մարզիչը՝ Ջոն Հեյտինգան, մեծ ծավալի աշխատանք պետք է կատարի։
«Ունիոնը» կարող է օրինակ լինել ցանկացած թիմի համար։ Առանց աստղերի, առանց մեծ ներդրումների և մեգատրանսֆերների, թիմը ոտք է գցում ոչ միայն գերմանական թոփերի, այլ նաև Մյունխենի «Բավարիայի» հետ։
«Այաքսը» միտված է հարձակման, բայց պաշտպանությունում անփույթ է գործում։ «Ունիոնը», ընդհակառակը, բալանսավորված է թե՛ հարձակման, թե՛ պաշտպանության գծում։ Անչափ հետաքրքիր հանդիպում է սպասվում։
16.02 ⏳ 21։45. «Բարսելոնա» — «Մանչեսթեր Յունայթեդ»
Ո՛չ, սխալ չեք կարդում։ Այս զույգը ոչ միայն Եվրոպա լիգայում է, այլ նաև այսպիսի վաղ փուլում։ Ցավալի է, որ այս գրանդ ակումբներից մեկը դուրս է մնալու պայքարից։ Այս դիմակայությունը կարող էր զարդարել եզրափակիչը, բայց․․․
«Բարսելոնայի» մեջ «Մոուրինյուի հոգին է մտել»։ Վերջին 10 խաղերում թիմը 5 անգամ հաղթել է 1։0 հաշվով։ Փայլուն մարզավիճակում է դարպասապահ Մարկ Անդրե Տեր Շտեգենը։ «Բարսելոնան» քիչ գոլեր է խփում, հաղթում նվազագույն առավելությամբ ու ամենակարևորը՝ շատ քիչ է գոլեր բաց թողնում։ Չավիի թիմը վստահորեն գլխավորում է Լա լիգայի մրցաշարային աղյուսակը և կարող է կենտրոնանալ եվրագավաթային մրցաշարի վրա։ Հատկապես՝ նախորդ մրցաշրջանի ձախողումը, երբ թիմը քառորդ եզրափակիչում պարտվեց ապագա չեմպիոն «Այնտրախտին», կստիպի ֆուտբոլիստներին ավելի մոտիվացված գործել։
«Մանչեսթեր Յունայթեդը» կերպարանափոխվել է։ Դրա գլխավոր «մեղավորը» մարզիչ Էրիկ տեն Հագն է։ Մասնագետ, որը չի վախենում լուրջ փոփոխություններից, անկոտրում է և կարողանում է արդյունք ապահովել։ ՄՅՈւ-ն դուրս է եկել Անգլիայի լիգայի գավաթի եզրափակիչ, ԱՊԼ-ում 3-րդ տեղում է և, անկասկած, փորձելու է հնարավորինս առաջ գնալ Եվրոպա լիգայում։ Թիմը փայլուն մարզավիճակում է։ Մարկուս Ռեշֆորդը գոլ է խփում գրեթե յուրաքանչյուր խաղում։
Այս դիմակայությունում՝ հատկապես առաջին խաղում, շատ գոլեր սպասել պետք չէ։ Ավելի շատ տակտիկական պայքար կլինի։
16.02 ⏳ 21։45. «Զալցբուրգ» — «Ռոմա»
Բոլորովին տարբեր խաղաոճերի թիմեր են։ Ավստրիական «Զալցբուրգը» հայտնի է իր հարձակողական ֆուտբոլով, գեղեցիկ կոմբինացիաներով, երիտասարդ տաղանդներով, իսկ «Ռոման»՝ լրիվ հակառակը։ Պրագմատիկ, արդյունքի վրա կենտրոնացած խաղ։ Չմոռնանանք, որ թիմը գլխավորում է Ժոզե Մոուրինյուն։ Հենց այդ խաղաոճի շնորհիվ էլ «Ռոման» նախորդ մրցաշրջանում նվաճեց Կոնֆերենցիաների լիգայի գավաթը։ Տնային խաղում «Զալցբուրգը» լուրջ ճնշում կգործադրի, բայց հարց է, թե ինչպե՞ս կդիմադրի «Ռոման»։
16.02 ⏳ 21։45. «Շախտյոր»- «Ռեն»
Թերևս ամենաթույլ թիմերի պայքարն է։ «Շախտյորը» կորցրել է իր առաջատարին՝ Մուդրիկին։ Բայց անկախ այդ հանգամանքից, թիմը լուրջ հավակնություններ չունի։ Այո, ընդհանուր առմամբ վիճակը անհուսալի չէ, սակայն «Շախտյորին» մրցաշարի ֆավորիտների շարքին չենք կարող դասել։
«Ռենը» ֆրանսիական Լիգա 1-ում 6-րդ տեղում է, չի փայլում կայուն խաղով։
16.02 ⏳ 23։55. «Բայեր» — «Մոնակո»
Անչափ հետաքրքիր դիմակայություն է լինելու։ «Բայերը» գլխավորում է Խաբի Ալոնսոն։ Երիտասարդ մասնագետի կատարած աշխատանքն ակներև է։ «Բայերը» կարգավորել է գործերը Բունդեսլիգայում և Եվրոպա լիգայում փորձելու է լուրջ պայքար մղել։
«Մոնակոն» էլ այն թիմերից է, որը կառչում է բոլոր հնարավորություններից։ Թիմը Լիգա 1-ում 3-րդ տեղում է և այս խաղին լավ տրամադրությամբ է մոտենում, քանի որ նախորդ տուրում հաղթել է առաջատար ՊՍԺ-ին։
Երկու թիմերն էլ սիրում են հարձակողական ֆուտբոլը։ Կարող ենք գոլառատ և դիտարժան ֆուտբոլի ականատես լինել։
16.02 ⏳ 23։55. «Սևիլյա» — ՊՍՎ
«Սևիլյան», կարելի է ասել, կործանման եզրին է։ Երբեմնի հաջողությունները, երբ ակումբը 3 անգամ անընդմեջ նվաճել էր այս մրցաշարի գավաթը, անցյալում են։ Խորխե Սամպաոլիի գլխավորած թիմը Լա լիգայում պայքարում է տեղը պահպանելու համար։ Տեսականորեն, դա կարող է առավելություն լինել, երբ իսպանական ակումբը հասկանա, որ կորցնելու ոչինչ չկա։ «Սևիլյան» Լա լիգայի մրցաշարային աղյուսակում 12-րդ տեղում է, բայց վտանգավոր գոտուց առաջ է ընդամենը 4 միավորով։
ՊՍՎ-ն՝ Ռուս վան Նիստելռոյի գլխավորությամբ, լուրջ արդյունքներ չի գրանցում ընթացիկ մրցաշրջանում։ Թիմը 4-րդ տեղում է Էրեդիվիզիում։ Հոլանդական թիմերը, որպես կանոն, միշտ հարձակողական ֆուտբոլ են ցուցադրում։ ՊՍՎ-ն բացառություն չէ։ Այլ հարց է, թե ինչպես կկարողանա թիմը ցուցադրել այդ ֆուտբոլը հակաֆուտբոլ ցուցադրող «Սևիլյայի» հետ խաղում։
16.02 ⏳ 23։55. «Յուվենտուս» — «Նանտ»
«Յուվենտուսը» ոչ միայն դիմակայության, այլ նաև մրցաշարի ֆավորիտն է։ Ոչ ոք չէր սպասում, որ թուրինցիները դուրս կմնան ՉԼ-ից և կհայտնվեն այստեղ։ Վերջերս Իտալիայի առաջնության մրցաշարային աղյուսակում գահավիժելուց հետո կարող ենք վստահաբար ասել, որ «Յուվենտուսը» կրկնապատկված մոտիվացիա կունենա այս մրցաշարում։ Եվրոպա լիգայի հաղթողը Չեմպիոնների լիգայի հաջորդ մրցաշրջանի ուղեգիր է նվաճում։ Հաշվի առնելով, որ թուրինցիները դժվար թե Ա Սերիայում հայտնվեն լավագույն քառյակում, ապա հաջորդ տարի ՉԼ-ում խաղալու միակ շանսը Եվրոպա լիգան հաղթելն է։ Իսկ դա կարելի է անել միայն քայլ առ քայլ։ Եվ առաջին քայլը ֆրանսիական համեստ «Նանտի» արգելքը հաղթահարելն է։ «Նանտը» Լիգա 1-ում 12-րդ տեղում է։ Խփել է 26 և բաց թողել 28 գոլ։ Խաղամակարդակով զգալիորեն զիջում է իտալական թիմին։ Այստեղ երկու կարծիք լինել չի կարող․ «Յուվենտուսը» բացահայտ ֆավորիտ է։
16.02 ⏳ 23։55. «Սպորտինգ»- «Միտյուլան»
Ֆավորիտ է նաև «Սպորտինգը»։ Լիսաբոնյան թիմը կարգով գերազանցում է մրցակցին և պետք է նվազագույնը հաղթի տնային խաղում։ «Միտյուլանը» Դանիայի առաջնության մրցաշարային աղյուսակի միջին հատվածում է և վերջին 4 խաղերում հաղթանակ չի տարել։ Դժվար է պատկերացնել, թե ինչի շնորհիվ դանիական կողմը կկարողանա անակնկալ մատուցել լիսաբոնցիներին։
Բայց ֆուտբոլը շատ անշուք և ձանձրալի սպորտաձև կհամարվեր, եթե ամեն ինչ այսքան պարզ ու հեշտ կռահելի լիներ։ Անկասկած, լինելու են անակնկալներ։ Լինելու են ֆավորիտների ձախողումներ, հետնապահների սխրանքներ, պայքար և վիճելի պահեր։
⏳ Հանդիպումների ժամանակացույցը Կոնֆերենցիաների լիգայում
16.02 ⏳ 21։45. «Բրագա» — «Ֆիորենտինա»
16.02 ⏳ 21։45. «Բուդե Գլիմտ» — «Լեխ»
16.02 ⏳ 21։45. «Քարաբաղ» — «Գենտ»
16.02 ⏳ 21։45. «Տրաբզոնսպոր»- «Բազել»
16.02 ⏳ 23։55. ԱԵԿ — «Դնեպր 1»
16.02 ⏳ 23։55. «Լացիո» — «Կլուժ»
16.02 ⏳ 23։55. «Լուդոգորեց» — «Անդերլեխտ»
16.02 ⏳ 23։55. «Շերիֆ»- «Պարտիզան»
Պատասխան հանդիպումները նախատեսված են փետրվարի 23-ին։
Ցավալի է, որ Հայաստանի գործող չեմպիոն «Փյունիկը» այս թիմերի շարքում չէ։ Երևանյան ակումբը մոտ էր խմբից դուրս գալուն, բայց չկարողացավ հասնել այդ պատմական նվաճմանը։
Կոնֆերենցիաների լիգայի այս փուլում լուրջ ինտրիգներ չկան։ Ավելի հետաքրքիր զարգացումներ կարող ենք սպասել 1/8 եզրափակիչում։
Վերոնշյալ զույգերից հատկապես հետաքրքիր են իտալական թիմերի՝ «Ֆիորենտինայի» և «Լացիոյի» մասնակցությամբ հանդիպումները։ «Լացիոն», առհասարակ, կարող է մրցաշարի ֆավորիտ համարվել, չնայած, որ թիմի մարզական տնօրեն Իգլի Տարեն ժամանակին ծաղրել էր հարևան և ոխերիմ թշնամի «Ռոմային»՝ Կոնֆերենցիաների լիգայում խաղալու և հաղթելու համար։
Այնուամենայնիվ, այս մրցաշարը ծառայում է իր նպատակներին։ Բացի կոմերցիոն տեսանկյունից, այն նաև շանս է միջակ ակումբների համար։ Այնպիսի թիմերի, որոնք երբեք չէին կարող հաջողության հասնել Եվրոպա լիգայում կամ առավել ևս` Չեմպիոնների լիգայում։
Մրցաշարերի այս հիերարխիան լավագույնս դասակարգում է թիմերին՝ ըստ խաղամակարդակի։ Միջակ կամ ոչ թոփ ակումբները ևս ցանկանում են պայքարել եվրոպական մրցաշարի տիտղոսի համար։ Կոնֆերենցիաների լիգան տալիս է այդ հնարավորությունը։
Միհրան Ալեքսանյան
