Կիոկուշին կարատեի Եվրոպայի 6-ակի չեմպիոն Արթուր Առուշանյանն այս օրերին Արցախում է, ասում է՝ չնայած ստեղծված իրավիճակին և Արցախը Հայաստանին կապող միակ ճանապարհի փակմանը, արցախցիներն անկոտրում են, շարունակում են մարզումներն ու լիահույս են իրավիճակի շուտափույթ հանգուցալուծման հարցում:
Առուշանյանն ArmSport-ի հետ զրույցում պատմում է՝ Արցախում Կիոկուշին կարատեի շուրջ 350 մարզիկ է մարզվում, աշխատում է 7 մարզիչ: Մարզումներն իրականացվում են Ստեփանակերտում և Ասկերանի շրջանի Այգեստան և Նորագյուղ համայնքներում:
«Բոլոր մարզիկները և մարզիչները տրամադրված են չտրվել սադրանքներին. խուճապի չմատնվել և չկոտրվել: Փորձում ենք լավատեսորեն տրամադրվել: Մարզվում ենք այնպես, կարծես ոչ թե ճանապարհն է փակ, այլ մենք մոտակա մրցումներին ենք նախապատրաստվում: Որոշ մրցումներ արդեն բաց ենք թողել, դա համարում ենք ֆորս-մաժորային իրավիճակ և անցնում ենք հաջորդ մրցաշարին կամ միջոցառմանը: Չկա հոգեբանական ճնշվածություն: Բոլորը մարզվում են: Վերաբերմունքն էլ մարզումների հանդեպ ավելի մարտական է»,- ասում է Արթուր Առուշանյանը:
Այդուհանդերձ, իրավիճակով պայմանավորված մարզիկները նաև որոշ խնդիրների են բախվում, մասնավորապես կապված էլեկտրաէներգիայի հովհարային անջատումների, գազի մատակարարման դադարեցումների հետ.
«Երբ հոսանք չի լինում, ծնողները ու մարզիկները դահլիճում միացնում են իրենց լապտերները, պարապում ենք վատ լուսավորության պայմաններում, բայց չենք ընկճվում: Երեխաների համար սա կարծես մի փուլ է, որն իրենք փորձում են հաղթահարել: Երբ ջեռուցում չի լինում, Ստեփանակերտի խմբերը կենտրոնանում են իմ դահլիճում, քանի որ այն առավել արևկող է, ու քանի որ մեծ թվով երեխաներ են միանգամից մարզվում, 60-70 հոգի կենտրոնանում է մի տեղում, բնական տաքություն է ապահովվում և ցուրտը չի զգացվում: Երեխաները կոփվում են և սովորում են նաև այդպիսի իրավիճակները հաղթահարել»:
Գազի մատակարարման դադարեցումը որոշակի խնդիրներ է առաջացնում նաև տրանսպորտային միջոցների համար, ինչի արդյունքում երեխաները երբեմն չեն կարողանում ներկայանալ մարզումներին. «Փորձում են այնպես անել, որ դա էլ խնդիր չստեղծի: Երեխաները մարզումից մեկ ժամ շուտ են դուրս գալիս տանից և ոտքով են գալիս պարապմունքի: 4-7 տարեկան երեխաների պարագայում ևս այդպես է: Ծնողները շատ լուրջ են վերաբերվում մարզումներին և ամեն ինչ անում են, որպեսզի երեխաները չբացակայեն»:
Արթուր Առուշանյանի խոսքով՝ Լաչինի միջանցքի փակման հետևանքով իր սաներից մեկը մնացել էր Հայաստանում՝ ընտանիքի անդամներից հեռու.
«Աղջիկների խմբից մի երեխա մնացել էր Հայաստանում: Մոտ մեկ շաբաթ առաջ վերադարձավ: Նրան ծափերով դիմավորեցինք դալիճում»,- պատմում է Արթուր Առուշանյանը:
Եվրոպայի վեցակի չեմպիոնը հունվարի 12-26-ը պետք է սեմինարներ անցկացներ Լեհաստանում, Ավստրիայում և Չիլիում: Կազմակերպիչների հետ բանակցությունների արդյունքում դրանք հետաձգվել են և կկայանան հաջորդ տարի: Առուշանյանի խոսքով՝ այս տարվա հետ կապված իրենց գլխավոր նպատակը նոյեմբերին կայանալիք աշխարհի առաջնությունն է, որին պետք է փորձեն անպայման մասնակցել և բարձր արդյունքներ գրանցել:
Հիշեցնենք՝ վերջերս Ստեփանակերտի Ստեփան Շահումյանի անվան հանրապետական մարզադաշտում արցախցի կարատեիստների մասնակցությամբ տեղի էր ունեցել ֆլեշմոբ՝ Արցախը Հայաստանին և ամբողջ աշխարհին կապող միակ ճանապարհի անհապաղ բացման պահանջով: Ֆլեշմոբին մասնակցել են Արցախում գործող կարատեի բոլոր ձևերի մարզիկները։
