Հեծանվորդ Ստեփան Գրիգորյանն օրերս հայտարարել է, որ Հայաստանի հեծանվային սպորտի ֆեդերացիան իրեն լիցենզիա չի տրամադրել։ Հունվարի 6-ին Ստեփանը պետք է մասնակցեր Իսպանիայի Սան-Սեբաստյան քաղաքում մեկնարկող միջազգային մրցաշարին, բայց լիցենզիա չունենալու պատճառով մրցաշարին մասնակցել չի կարող:
«Չեմ ցանկանում անդրադառնալ այս թեմային: Կարծում եմ՝ մեկնաբանություններն անտեղի են»,- ArmSport-ի հետ զրույցում այս հարցի շուրջ որևէ մեկնաբանություն տալուց հրաժարվեց Հայաստանի հեծանվասպորտի հավաքականի գլխավոր մարզիչ, «Հեծանվային սպորտի օլիմպիական մանկապատանեկան մարզադպրոց» ՊՈԱԿ-ի տնօրեն Արմեն Գյոզալյանը:
«Մենք արդեն ունենք 2023 թվականի հաստատված ծրագիրը, շարունակելու ենք աշխատել այդ ծրագրով՝ ձգտելով առավելագույնին»,- հավելում է Գյոզալյանը, ըստ որի Հայաստանի հեծանվային սպորտի տարբեր տարիքի հավաքականների համար մարզական տարին կմեկնարկի Ծաղկաձորում փետրվարին կայանալիք ուսումնամարզական հավաքով:
Խոսելով հեծանվորդների առաջիկա ծրագրերի և անելիքների մասին՝ Գյոզալյանը մանրամասնում է. «Ուսումնամարզական հավաքից հետո կանցկացնենք Հայաստանի առաջնություններ, որոնց արդյունքներով կձևավորվի Հայաստանի հավաքական թիմը՝ տարբեր տարիքային խմբերում: Երիտասարդները հունիսին կմասնակցեն Եվրոպայի Մ23 տարեկանների առաջնությանը, ապա նաև Մ23 տարեկանների աշխարհի առաջնությանը: Օլիմպիական մանկապատանեկան փառատոնը կանցկացվի Սլովակիայում, որին ևս կմասնակցենք: Հագեցած տարի է լինելու: Պլանավորում ենք միջազգային մրցաշարեր, որոնց միջոցով կարողանանք ճիշտ նախապատրաստվել կարևոր մրցումներին»:
Նրա խոսքով՝ նախնական պայմանավորվածություններ են ձեռք բերվել Լեհաստանի հետ, որպեսզի մեր առաջատար հեծանվորդներն այնտեղ համատեղ ուսումնամարզական հավաք անցկացնեն տեղի մարզիկների հետ:
«Երիտասարդների պայքարում անցած տարի բավական հաջող հանդես եկան Վահե Վիրաբյանը, Խաչիկ Շարյանը և Ալեքս Արամայիսյանը, որոնցից մեծ սպասելիքներ ունենք: Միջազգային խոշոր մրցաշարերից առաջ հեծանվորդները դարձյալ ուսումնամարզական հավաքներ կանցկացնեն»,- նշում է Արմեն Գյոզալյանը:
Արմեն Գյոզալյանի փոխանցմամբ՝ վերոնշյալ մարզիկները կկարողանան մրցաշարերի մասնակցել նաև մեծահասակների պայքարում, թեև փետրվարին կայանալիք մեծահասակների Եվրոպայի առաջնությանը Հայաստանը ներկայացուցիչներ չի ունենա, քանի որ ժամանակի սղության պատճառով ԵԱ-ի համար նախապատրաստական փուլ հեծանվորդները չեն անցել:
