ՀՀ կրթության, գիտության, մշակույթի և սպորտի նախարարությունը արձագանքել է մամուլում տարածված այն լուրերին, թե գերատեսչությունը պատշաճ ֆինանսական աջակցություն չի տրամադրել Հայաստանի պարալիմպիկ կոմիտեին՝ Գրետա Վարդանյանի մասնակցությունը ԱՄԷ-ի Դուբայ քաղաքում անցկացված պարածանրամարտի աշխարհի գավաթի փուլային խաղարկությունում ապահովելու նպատակով:
Մարզուհին տարբեր լրատվամիջոցների հետ զրույցում հայտնել էր, որ մրցումներին պարտքով է մեկնել. «Մոտավորապես մեկ միլիոն ու կեսի գումար էր անհրաժեշտ։ Ու ես մրցումներին գնացել եմ երկու օր ուշացումով, որովհետև մինչ էդ մենք գումար էինք հայթայթում։ Բացման արարողությանը չենք հասցրել, փակման արարողությանը չենք մնացել, որովհետև ամեն մի գիշերը էնտեղ հյուրանոցում գումար արժեր»,- Գրետա Վարդանյանի խոսքերն է փոխանցում «Ազատությունը»:
ՀՀ կրթության, գիտության, մշակույթի և սպորտի նախարարության և «Հայաստանի ազգային պարալիմպիկ կոմիտե» հասարակական կազմակերպության միջև 2022 թվականի հունվարի 24-ին կնքված N ՍՊԱՍ_37-2022 պայմանագրի համաձայն՝ կազմակերպությանն այս տարի պետության կողմից հատկացվել է 39 մլն 222 հազար դրամ՝ 9 միջոցառումների կազմակերպման, անցկացման, ինչպես նաև միջոցառումներին մասնակցության ապահովման համար:
Պայմանագրով հաստատված միջոցառումների շարքում ներառված է եղել Դուբայի աշխարհի գավաթի Fazza Championships միջոցառումը՝ 3 մլն 294 հազար դրամ բյուջեով: Կազմակերպությունը, սակայն, նախարարություն է ներկայացրել գրություն՝ խնդրելով թույլատրել ԱՄԷ–ի Դուբայ քաղաքում անցկացվելիք աշխարհի գավաթի հերթական խաղարկության փոխարեն մասնակցել Թբիլիսիում կայանալիք Եվրոպայի բաց, տարածաշրջանային առաջնությանը:
2022 թվականի օրացուցային պլանում և պայմանագրի հավելված N-1-ում Թբիլիսիում անցկացվելիք պարածանրամարտի Եվրոպայի տարածաշրջանային բաց առաջնությունն ընդգրկված չի եղել, սակայն Հայաստանի ազգային պարալիմպիկ կոմիտեն հույժ կարևոր է համարել պարածանրամարտի այդ առաջնությանը մարզիկների մասնակցությունը, հավաստիացրել է, որ վերոնշյալ առաջնությունը տարվա միակ վարկանիշայինն է, որին մասնակցելով՝ հավաքականի մարզիկները, հնարավոր է, ձեռք բերեն պարալիմպիկ խաղերի մասնակցության վարկանիշ: Հաշվի առնելով վերոգրյալը՝ որոշվել է ԱՄԷ-ի Դուբայ քաղաքում պարածանրամարտի աշխարհի գավաթի խաղարկության համար նախատեսված ֆինանսական միջոցներն ուղղել Թբիլիսիում օգոստոսին կայացած Եվրոպայի բաց առաջնության մասնակցությանը:
«Հայաստանի ազգային պարալիմպիկ կոմիտե» հասարակական կազմակերպության նախագահին տրված պաշտոնական պատասխանում նշվել է, որ Թբիլիսիում անցկացվելիք առաջնությունում վարկանիշ ձեռք բերելու պարագայում նախարարությունը կքննարկի նաև աշխարհի գավաթի խաղարկության մասնակցության համար լրացուցիչ ֆինանսավորման հարցը, ինչին կազմակերպությունը տվել է իր համաձայնությունը: Վերոնշյալ մրցմանը մեր մարզիկների մասնակցությունն ապահովվել է, սակայն վարկանիշ ձեռք չի բերվել»,- ասվում է ԿԳՄՍ նախարարության տարածած հաղորդագրության մեջ:
Հաշվի առնելով նաև այն, որ 2022 թվականին վերոնշյալ պայմանագրով կազմակերպության համար նախատեսված ֆինանսական միջոցներն արդեն իսկ սպառված են եղել, պարածանրամարտի աշխարհի գավաթի հերթական խաղարկության մասնակցության համար լրացուցիչ ֆինանսավորման հատկացումը նպատակահրամար չի համարվել՝ նկատի առնելով այն հանգամանքը, որ Դուբայի աշխարհի գավաթի Fazza Championships մրցաշարը վարկանիշային չի եղել:
Ինչ վերաբերում է Վրաստանի մայրաքաղաքում անցկացված պարածանրամարտի Եվրոպայի բաց առաջնությանը, ապա Հայաստանի ազգային պարալիմպիկ կոմիտեն ԿԳՄՍ նախարարություն է ներկայացրել այդ առաջնության մասնակցության հայտը և հիմնավորող փաստաթղթերը՝ ավելի քան 4 մլն դրամի չափով: Ծախսերի նախահաշվում ներառված են եղել 4 մասնակիցների (1 գլխավոր մարզիչ և 3 մարզիկ) մասնակցության վճարը՝ յուրաքանչյուրի համար 500 ԱՄՆ դոլարին համարժեք դրամ, 9 օրվա կացության և սննդի գումար՝ յուրաքանչյուրին օրական 150 ԱՄՆ դոլարին համարժեք դրամ, վիտամիններ և հավելյալ սնունդ, ինչպես նաև մարզական համազգեստ ձեռք բերելու համար` յուրաքանչյուրին 185 հազարական դրամ:
Համաձայն հայտի՝ օգոստոսի 30-ին «Հայաստանի ազգային պարալիմպիկ կոմիտե» հասարակական կազմակերպությանն է փոխանցվել 4 մլն 75 հազար դրամ, և կատարվել է պայմանագրի փոփոխություն:
