Ֆուտբոլիստ Հարվի Սարաջյանի համար «Օրլանդո Սիթիում» հայտնվելը պարզապես կարիերայի հերթական քայլը չէր․ այն մանկության երազանքի իրականացումն է․․․
Օրերս հյուսիսամերիկյան MLS-ի կանոնավոր առաջնության շրջանակում «Օրլանդոն» հաղթել է «Տորոնտոյին» 3-0 հաշվով։ Հաղթող թիմի կազմում գոլերից մեկը հեղինակել է Հարվի Սարաջյանը, որն առաջինն էր ֆուտբոլիստի համար MLS-ում։ Նա խաղադաշտ էր դուրս եկել 80-րդ րոպեին՝ փոխարինելով Մարիո Պաշալիչին, իսկ երկու րոպե անց աչքի ընկել գոլով։ Գոլերից մեկն էլ իր ակտիվում գրանցել է Անտուան Գրիզմանը, ևս մեկ անգամ աչքի է ընկել Անգուլոն։
«Սա հրաշալի է։ Սա անհավանական պահ է ինձ համար։ Ես երկար ժամանակ աշխատել եմ դրա համար՝ խաղալով B թիմում, քրտնաջան աշխատելով և հնարավորություններ ստանալով առաջին թիմում։ Ես իսկապես շնորհակալ եմ Դայքին գոլային փոխանցման համար, բայց այո, ես պարզապես պետք է շարունակեմ աշխատել և ևս մի քանի գոլ խփեմ»,- հանդիպումից հետո ասել Հարվին։
21-ամյա վինգեր Սարաջյանը 7 հանդիպում է անցկացրել MLS-ի այս մրցաշրջանում, ընդհանուր առմամբ 71 րոպե անցկացնելով խաղադաշտում։ «Օրլանդոյի» երկրորդ թիմի կազմում, MLS Next Pro լիգայում նա անցկացրել է 14 հանդիպում՝ դառնալով 5-ական գոլի ու գոլային փոխանցման հեղինակ։ Հարվին Ֆլորիդան ներկայացնող ակումբին է միացել 2025 թվականի դեկտեմբերին, MLS-ի դրաֆթում 5-րդ համարով ընտրվելուց հետո, Հյուսիսային Կարոլինայի «Վեյկ Ֆորեսթ» թիմից։ Հարվին ծնվել է 2005 թվականի հունվարի 26-ին, Ֆլորիդայում, Նեյփլս քաղաքում։
Երբ նա ընդամենը 10 տարեկան էր, առաջին անգամ ներկա է եղել պրոֆեսիոնալ ֆուտբոլի հանդիպման՝ «Օրլանդո Սիթի» -«Չիկագո Ֆայր» խաղին։ Հանդիպումը տեղի էր ունենում «Camping World Stadium»-ում և հանդիպման կեսից հետաձգվել էր հորդառատ անձրևի պատճառով, սակայն փոքրիկ Հարվիի հիշողության մեջ մնացել են երկրպագուների երգերը, ինչպես նաև «Օրլանդոյի» աստղեր Կակայի և Կայլ Լարինի խաղը․․․ 11 տարի անց Սարաջյանն արդեն նույն մարզադաշտում է՝ որպես «Օռլանդո Սիթիի» ֆուտբոլիստ։
«Առաջին MLS-ի խաղս «Օրլանդոյի» հանդիպումն էր «Camping World»-ում։ Անիրական զգացողություն է վերադառնալ այստեղ, բայց հիմա արդեն այս մարզաշապիկով և այս ակումբի տարբերանշանը կրելով», — պատմել է ֆուտբոլիստը ակումբի մամուլի ծառայությանը։
Սարաջյանը 2026 թվականի MLS SuperDraft-ում ընտրվել է 5-րդ համարով հենց «Օրլանդո Սիթիի» կողմից։ Ընդամենը 43 օր էր անցել այն պահից, երբ նա ավարտել էր մրցաշրջանը «Ուեյք Ֆորեսթում», մինչև պրոֆեսիոնալ ֆուտբոլիստ դառնալը։ Եվս 25 օր անց նա արդեն մասնակցում էր «Օրլանդոյի» նախամրցաշրջանային հավաքին։
«Սա երազանքի իրականացում է։ Իմ ընտանիքը տարիներ շարունակ երազել է տեսնել, թե ինչպես եմ պրոֆեսիոնալ ֆուտբոլ խաղում նման մարզադաշտում»,- ասել է Սարաջյանը։
Նախկինում նորեկների մեծ մասը պայմանագիր էր կնքում մի քանի շաբաթ տևած նախամրցաշրջանային հավաքից հետո, երբ մարզիչները գնահատում էին նրանց ֆիզիկական պատրաստվածությունն ու տակտիկական գիտելիքները։ Սակայն Սարաջյանը պաշտոնապես պայմանագիր կնքեց մարզաբազայում առաջին մարզումն անցկացնելուց ընդամենը չորս օր անց։ Սա «Օրլանդոյի» մարզչական շտաբի և սկաուտական բաժնի վստահության ցուցադրություն էր, որ այն, ինչ նրանք տեսել էին նախադրաֆթային գործընթացում, բավարար էր ֆուտբոլիստին բարձրագույն մակարդակում խաղալու պատրաստ համարելու համար։
«Հուզիչ է։ Ես անչափ շնորհակալ եմ մարզչական շտաբին աջակցության համար և պատրաստվում եմ օգտագործել յուրաքանչյուր հնարավորություն, որը նրանք ինձ կտան, ու անել առավելագույնը»,- նշել է Սարաջյանը։
21-ամյա ֆուտբոլիստը հիմնականում հանդես է գալիս վինգերի դիրքում։ Նա հատկապես սիրում է ձախ եզրից տեղափոխվել կենտրոն՝ օգտագործելով աջ ոտքը։ Սարաջյանի խոսքով՝ իր ուժեղ կողմերից են մեկ-մեկի դեմ խաղը, պաշտպաններին շրջանցելը, տուգանային հրապարակ փոխանցումներ կատարելը և գոլեր խփելը։
Եվ վերջում, նորից հիշենք՝ 10 տարեկանում նա պարզապես տրիբունայից էր հետևում «Օռլանդո Սիթիի» խաղին, իսկ 11 տարի անց նա արդեն այդ թիմի մարզաշապիկով գոլ է խփում MLS-ում՝ խաղալով Անտուան Գրիզմանի հետ նույն թիմում։
