Երբ 2022 թվականի օգոստոսին աստղային թենիսիստուհի Սերենա Ուիլյամսը հայտարարեց, որ պատրաստվում է ավարտել կարիերան՝ պրոֆեսիոնալ սպորտում անցկացրած 27 տարիներից հետո, նրա կարողությունը գնահատվում էր 260 միլիոն դոլար:
Ընդհանուր առմամբ, Սերենա Ուիլյամսն իր կարիերայի ընթացքում վաստակել է ավելի քան 450 միլիոն դոլար ՝ ներառյալ գովազդային և բիզնես նախագծերը: Այսօր Ուիլյամսը ոչ միայն ամենահարուստ թենիսիստուհին է, այլև իր եկամտի մակարդակով մյուս բոլոր մարզուհիներից, պատկերավոր ասած, մի քանի լուսային տարի առաջ է:
Ուիլյամսը մյուս կին մարզիկների համար ճանապարհ հարթեց դեպի բարձր վարձատրվող սպորտի աշխարհ, և այժմ նրա նմանները ավելի ու ավելի շատ կլինեն: Ինչպես օրինակ, թենիսիստուհի Նաոմի Օսական, ով Ուիլյամսին միացավ «Աշխարհի 50 ամենաբարձր վարձատրվող մարզիկների» ցուցակում և 2020 թվականից ի վեր, ըստ էության, գերազանցեց նրան իր տարեկան եկամուտով։
2022 թվականի ամենաբարձր վարձատրվող մարզուհիներից 8-ը վաստակել է ավելի քան 10 միլիոն դոլար՝ կրկնապատիկ ավելի, քան 2021 թվականին: Իսկ այս ցուցանիշը 10 միլիոն դոլարի նշաձողին առաջին անգամ է հասել 2008 թվականից ի վեր, երբ Forbes-ը սկսեց ներկայացնել այս վարկանիշը։
Այս տարի նոր անուններ են հայտնվել․ դահուկային սպորտից (Ֆրիսթայլ) Էյլին Գուն, թենիսիստուհիներ Էմմա Ռադուկանուն, Իգա Սվենտեկը և Քորի Գաուֆը։
Վարկանիշում ընդգրկված 10 ամենաբարձր վարձատրվող մարզուհիները 2022 թվականին ընդհանուր առմամբ վաստակել են 194 միլիոն դոլար (չհաշված հարկերը և գործակալության վճարները), ինչը 17 տոկոսով ավելի է, քան 2021 թվականին։ 51,1 միլիոն դոլար եկամուտով Օսական երրորդ տարին անընդմեջ առաջինն է, որին հաջորդում է Ուիլյամսը` 41,3 միլիոն դոլարով:
«Կարծում եմ՝ բոլորը հսկայական առաջընթաց են տեսնում կանանց սպորտի զարգացման և դրա հովանավորչության մեջ», – ասում է Elevate Sports Ventures-ի հաճախորդների սպասարկման գլխավոր մասնագետ Քեմերոն Վագները: «Դեռ շատ անելիքներ կան, բայց այսօր շատ բրենդներ սկսում են տեսնել կանանց սպորտի ներուժը՝ իրենց բիզնեսը գովազդելու համար»:
The Collective-ի գործադիր փոխնախագահ Թեյեր Լավիելն ասում է, որ միտումը փոխվել է 2019 թվականին: Այդ ժամանակ տղամարդկանց և կանանց սպորտում աշխատավարձերի ահռելի տարբերության մասին հարցը բարձրացրել է ԱՄՆ-ի կանանց ֆուտբոլի հավաքականը և դրանով ուշադրություն գրավել: COVID-19 ճգնաժամը նվազեցրել է տոմսերից ստացվող եկամուտը և վնասել հովանավորներին: Բայց հենց կանանց սպորտային լիգաներն էին, որ առաջինը վերադարձան խաղ՝ դրանով իսկ մեծացնելով հեռարձակումների դիտելիությունը, քանի որ համաճարակի ժամանակ մարզասերներն իրենց ամբողջ ժամանակն անցկացնում էին էկրանների առջև։
2022 թվականին Անգլիայում կայացած կանանց Սուպերլիգայի խաղերին երկրպագուների հաճախելիությունը 200%-ով ավելացել է նախորդ մրցաշրջանի համեմատ, ընդ որում գերմանական կանանց ֆուտբոլի՝ Բունդեսլիգայի հաճախելիությունը գերազանցել է նախորդ մրցաշրջանի ընդհանուր ցուցանիշը ընդամենը յոթ շաբաթվա ընթացքում:
ՖԻՖԱ-ն անցյալ շաբաթ հայտարարել է, որ սկիզբ է տալիս կանանց Աշխարհի ակումբային գավաթ մրցաշարին։ Դրանից առաջ զեկույց էր հրապարակվել, որ կանանց ֆուտբոլի լիգաների 77%-ը տիտղոսային հովանավոր է ունեցել 2022 թվականին: Համեմատության համար՝ 2021 թվականին թիմերի միայն 66%-ն է ունեցել հովանավոր։
Այնուամենայնիվ, 2022 թվականի 10 ամենաբարձր վարձատրվող մարզուհիների ցուցակում ֆուտբոլիստուհիներ ընդգրկված չեն։
Forbes-ի «2022 թվականի ամենաբարձր վարձատրվող մարզուհիների» վարկանիշն արտացոլում է օրացուցային տարվա ընթացքում ստացված եկամուտները։ «Խաղադաշտից» ստացած եկամուտների տվյալները ներառում են բազային աշխատավարձը, բոնուսները և մրցանակային գումարները՝ կլորացված մինչև 100,000 դոլար: «Դաշտից դուրս» եկամտի տվյալները, որոնք կլորացված են մինչև 500,000 դոլար, որոշվում են ոլորտի մասնագետների հետ հարցազրույցներով և արտացոլում են հովանավորներից ստացված տարեկան կանխիկ եկամուտը․ պայմանագրեր, լիցենզավորում, հրապարակային ելույթներ, ինչպես նաև դրամական եկամուտ ցանկացած բիզնեսից։
Forbes-ը չի ներառում ներդրումային եկամուտները, բայց ներառում է մարզիկների կողմից վաճառված բաժնետոմսերից ստացված գումարները: Forbes-ի տվյալներից հանված չեն հարկերը և գործակալության վճարները։
1. Նաոմի Օսակա
Սպորտը՝ թենիս
Տարիքը՝ 24 տարեկան
Երկիրը՝ Ճապոնիա
Ընդհանուր եկամուտը՝ 51,1 մլն դոլար, որից «խաղադաշտում»՝ 1,1 մլն, «խաղադաշտից դուրս»՝ 50 մլն
Տարվա մեծ մասը Օսակային խանգարում էին վնասվածքները: Նա նաև կորցրեց զգալի հովանավորչական աջակցություն, երբ FTX-ը սնանկության դիմում ներկայացրեց նոյեմբերին՝ իրենց համագործակցության մասին հայտարարելուց ընդամենը ութ ամիս անց: Բայց Նաոմի Օսակայի հովանավորչական պայմանագրերի պորտֆելը դեռ լավագույններից է. Forbes 2022-ի վարկանիշի միայն վեց մարզիկ է վաստակել ավելի քան 50 միլիոն դոլար «խաղից դուրս»:
2. Սերենա Ուիլյամս
Սպորտը՝ թենիս
Տարիքը: 41
Երկիրը՝ ԱՄՆ
Ընդհանուր եկամուտը՝ 41,3 մլն դոլար, որից «խաղադաշտում»՝ 0,3 մլն, «խաղադաշտից դուրս»՝ 41 մլն
Երկու ամիս անց այն բանից հետո, երբ Vogue-ի իր սյունակում Ուիլյամսը խոսեց սպորտից հեռանալու մասին, TechCrunch-ի համաժողովում ասաց, որ «թոշակի չի անցել», և որ թենիս վերադառնալու հավանականությունը «շատ մեծ է»: Նույնիսկ եթե սպորտում ընդմիջումը պարզվի, որ ժամանակավոր էր, միևնույն է նա դրանից մեծ օգուտ քաղեց ՝ կազմակերպելով ելույթների մի ամբողջ շարք, որոնք շահույթ էին բերում: Ուիլյամսը նաև ունի իր սեփական վենչուրային ընկերությունը, որը ներդրումներ է կատարում ավելի քան 70 ստարտափներում: Բացի այդ, նա 2022 թվականին հիմնել է տեղային ցավազրկողների վաճառքով զբաղվող ընկերություն։
3․Էյլին Գու
Սպորտը՝ Ֆրիսթայլ (դահուկային սպորտ)
Տարիքը՝ 19 տարեկան
Երկիրը՝ Չինաստան
Ընդհանուր եկամուտը՝ $20,1 մլն դոլար, որից «խաղադաշտում»՝ $0,1 մլն, «խաղադաշտից դուրս»՝ $20 մլն
Էյլինը ծնվել և մեծացել է Սան Ֆրանցիսկոյում, սակայն միջազգային մրցումներում ներկայացնում է Չինաստանը և Պեկինի Օլիմպիական խաղերում նվաճել է երկու ոսկե և մեկ արծաթե մեդալ։ Էյլին Գուն սովորում է Սթենֆորդի համալսարանում, աշխատում է որպես մոդել, համագործակցում է Red Bull-ի, Therabody-ի և Louis Vuitton-ի, ինչպես նաև չինական Mengniu Dairy և JD.com ընկերությունների հետ։
4․Էմմա Ռադուկանու
Սպորտը՝ թենիս
Տարիքը՝ 20 տարեկան
Երկիրը՝ Մեծ Բրիտանիա
Ընդհանուր եկամուտը՝ 18,7 մլն դոլար, որից «խաղադաշտում»՝ 0,7 մլն, «խաղադաշտից դուրս»՝ 18 մլն
2021 թվականին 18-ամյա Ռադուկանուն նվաճեց թենիսի ԱՄՆ-ի բաց առաջնության հաղթողի տիտղոսը, ինչի շնորհիվ ստացավ բազմաթիվ հովանավորչական առաջարկներ ՝ Nike-ից, British Airways-ից, Dior-ից, Evian-ից, HSBC-ից, Porsche-ից, Tiffany-ից և Vodafone-ից։ 2022 թվականին թեև մենախաղի համաշխարհային վարկանիշում նրա հորիզոնականը 10-րդից իջել է 80-րդ, այնուամենայնիվ Ռադուկանուն դեռևս հետաքրքրում է գովազդատուներին։ SponsorUnited-ի վերջին զեկույցը ցույց է տվել, որ սոցիալական ցանցերում նրա գրառումներն ամենաբարձր ներգրավվածությունն ունեն՝ համեմատած մյուս թենիսիստուհիների հետ:
5․ Իգա Սվենտեկ
Սպորտը՝ թենիս
Տարիքը՝ 21 տարեկան
Երկիրը՝ Լեհաստան
Ընդհանուր եկամուտը` 14,9 մլն դոլար, որից «խաղադաշտում»` 9,9 մլն, «խաղադաշտից դուրս»` 5 մլն
Սվենտեկն այս տարի հաղթել է Ֆրանսիայի բաց առաջնությունում եւ ԱՄՆ-ի բաց առաջնությունում ՝ մենախաղում նվաճելով «Մեծ սաղավարտի» միանգամից երեք տիտղոս: Նա զբաղեցրեց առաջին տեղը ինչպես թենիսի համաշխարհային վարկանիշում, այնպես էլ այն մարզուհիների շարքում, ովքեր ստացել են տարվա ամենամեծ մրցանակային գումարները։ Սենտիկը համագործակցում է Asics-ի և PZU-ի հետ, իսկ 2022 թվականի սեպտեմբերին պայմանագիր է կնքել IMG-ի հետ ։
6․ Վինուս Ուիլյամս
Սպորտը՝ թենիս
Տարիքը՝ 42 տարեկան
Երկիրը՝ ԱՄՆ
Ընդհանուր եկամուտը՝ $12,1 մլն դոլար, որից «խաղադաշտում»՝ $0,1 մլն, խաղադաշտից դուրս՝ $12 մլն
Ուիլյամսը 2022 թվականին խաղացել է ընդամենը չորս մրցաշար և պարտվել է յուրաքանչյուր խաղում, սակայն, այնուամենայնիվ, ստացել է հատուկ հրավեր Ավստրալիայի բաց առաջնությանը մասնակցելու համար։ Ուիլյամսը աշխարհում զբաղեցնում է 1007-րդ տեղը, սակայն հովանավորության պայմանագրեր է կնքում։ Պատճառը սպորտից դուրս նրա համբավն է։ Ուիլյամսը նաև պահանջված խոսնակ է. 2022 թվականին նա ելույթ է ունեցել ավելի քան 30 անգամ և ամեն անգամ դրա համար վեցանիշ գումար է ստացել։
7․ Քորի Գաուֆ
Սպորտը՝ թենիս
Տարիքը՝ 18 տարեկան
Երկիրը՝ ԱՄՆ
Ընդհանուր եկամուտը՝ 11,1 մլն դոլար, որից «խաղադաշտում»՝ 3,1 մլն, «խաղադաշտից դուրս»՝ 8 մլն
Գաուֆը գրեթե հաղթեց Ֆրանսիայի բաց առաջնությունում ՝ եզրափակիչ դուրս գալով ինչպես մենախաղերում, այնպես էլ զուգախաղերում: Շատ մարզական փորձագետներ կարծում են, որ նրա հաղթանակը «Մեծ սաղավարտի» մրցաշարում ժամանակի հարց է: Վերջերս Գաուֆը պայմանագիր է կնքել New Balance-ի հետ, որը, ենթադրաբար, ուղեկցվել է աշխատավարձի բարձրացմամբ։ Նրա արտադպրոցական եկամուտները կարող էին նույնիսկ ավելի բարձր լինել, եթե չլիներ նրա գործակալ Ալեսանդրո բարել Դի Սանտ Ալբանոյի և նրա ծնողների չափված մոտեցումը։
8․ Սիմոնա Բեյլիս
Սպորտը՝ մարմնամարզություն
Տարիքը՝ 25 տարեկան
Երկիրը՝ ԱՄՆ
Ընդհանուր եկամուտը՝ $10 մլն դոլար, որից «խաղադաշտում»՝ $0 մլն, «խաղադաշտից դուրս»՝ $10 մլն
Բեյլիսը եզակի օլիմպիական մարզիկ է, ով պահանջված է նաև ոչ օլիմպիական տարիներին: 2022 թվականին նա նկարահանվել է Super Bowl-ի գովազդում՝ ծրագրային ապահովման մշակմամբ զբաղվող BMC ընկերության համար, ինչպես նաև Subway-ի և Powerade-ի նոր գովազդներում: Զուգահեռաբար թողարկել է սպորտային հագուստի Athleta հավաքածուն։ Նա նաեւ ձեռք է բերել Axonius ընկերության բաժնետոմսերի փաթեթը, որը զբաղվում է կիբերանվտանգությամբ։ Իսկ հուլիսին, ֆուտբոլային աստղ Մեգան Ռապինոյի հետ միասին, Բեյլիսը ստացավ Ազատության նախագահական մեդալ՝ ԱՄՆ բարձրագույն քաղաքացիական մրցանակը։
9․ Ջեսիկա Պեգուլա
Սպորտը՝ թենիս
Տարիքը՝ 28 տարեկան
Երկիրը՝ ԱՄՆ
Ընդհանուր եկամուտը՝ 7,6 մլն դոլար, որից «խաղադաշտում»՝ 3,6 մլն, «խաղադաշտից դուրս»՝ 4 մլն
Պեգուլան՝ միլիարդատեր Buffalo Bills-ի սեփականատերեր Թերի և Քիմ Պեգուլաների դուստրը, դեռ չի հասել «Մեծ սաղավարտի» մրցաշարերի կիսաեզրափակիչ, սակայն նա մրցաշրջանն ավարտել է ամենաբարձր վարկանիշ ունեցող ամերիկացի թենիսիստուհիների ցուցակի երրորդ տեղում՝ 4 հորիզոնականով առաջ անցնելով Քորի Գաուֆից։ Պեգուլան մաշկի խնամքի միջոցների բրենդի սեփականատեր է, իսկ GSE Worldwide գործակալության հետ պայմանագիր ստորագրելուց հետո, հավանաբար, կստանա հովանավորչական առաջարկներ Adidas-ից, Yonex-ից և Ready Nutrition-ից:
10․ Մինջի Լի
Սպորտը՝ գոլֆ
Տարիքը՝ 26 տարեկան
Երկիրը՝ Ավստրալիա
Ընդհանուր եկամուտը՝ 7,3 միլիոն դոլար, որից «խաղադաշտում»՝ 4,8 միլիոն դոլար, «խաղադաշտից դուրս»՝ 2,5 միլիոն դոլար
Վերջին հինգ տարիներին Լին մշտապես հայտնվել է LPGA-ի՝ ԱՄՆ կանանց պրոֆեսիոնալ գոլֆի ասոցիացիայի «պաշտոնական դրամական ցուցակի» առաջին տասնյակում։ 2022 թվականին նա 3,8 միլիոն դոլար եկամուտով զբաղեցրել է երկրորդ տեղը՝ մասամբ հունիսին ԱՄՆ-ի կանանց գոլֆի բաց առաջնությունում տարած հաղթանակի շնորհիվ․ դա նրա կարիերայի՝ առաջնությունում տարած երկրորդ խոշոր հաղթանակն էր: Նա ստացել է $1 մլն բոնուս՝ շահելով Aon Risk Reward Challenge-ը։ Բացի այդ, Aon-ը (դա բրիտանական ֆինանսական ընկերություն է) նրա հովանավորների թվում է՝ Հարավկորեական Hana Bank-ի և հագուստ արտադրող WAAC ընկերության հետ միասին ։
ԱՄՆ-ի հավաքականի ֆուտբոլիստուհիներ Ալեքս Մորգանն ու Մեգան Ռապինոն Forbes-ի հրապարակած վարկանիշում կիսում են 19-րդ տեղը:
Նրանք գրանցել են 5․7 մլն դոլար տարեկան եկամուտ, որից 0․7 մլն դոլարը վաստակել են խաղադաշտում, իսկ 5 մլն դոլարը դրանից դուրս։
Աղբյուրը՝ Forbes.ru
Թարգմանությունը՝ Armsport-ի
