«Փյունիկի» գլխավոր մարզիչ Եղիշե Մելիքյանն ակումբի մամուլի ծառայության հետ զրույցում անդրադարձել է Հայաստանի ֆուտբոլի ֆեդերացիայի պաշտոնական էջերում վերջերս հրապարակված ԲԿՄԱ-ի գլխավոր մարզիչ Ռաֆայել Նազարյանի ու ՀՖՖ նախագահի խորհրդական, ֆուտզալի Հայաստանի հավաքականի գլխավոր մարզիչ Ռուբեն Նազարեթյանի հարցազրույցներում հնչեցված հայտարարություններին։
«Ես շատ եմ ափսոսում, որ պարոն Սողոմոնյանի նման անձնավորության հասցեին վիրավորանքներ ու սպառնալիքներ են հնչեցնում: Այս թեմայով չեմ ցանկանում ոչինչ ասել: Ժամանակը կտա բոլոր հարցերի պատասխանները, մանավանդ, որ գործը հասցվել է դատարան: Չնայած այդ հանգամանքին, զսպվածությունն ու հարգանքը բացակայում են ֆեդերացիայի ներկայացուցիչների մոտ: Ես ամբողջ սրտով սիրում եմ «Փյունիկն» ու ինձ համարում եմ «փյունիկցի», և դրա առաջին պատճառը հենց պարոն Սողոմոնյանն է: Մի մարդ, որը նվիրված ծառայում է հայկական ֆուտբոլին ու դրա զարգացմանը:
Շատերն ասում են, որ իմ համարձակ խոսքերը կարող են հանգեցնել նրան, որ Հայաստանի հավաքականի դռները փակվեն իմ առջև։ Սակայն դա ինձ չի կանգնեցնի ու վախեցնի արտահայտել իմ կարծիքը։ Հիմա իմ դիրքորոշումն եմ հայտնում, քանի որ բարձրաձայնվել են հարցեր, որոնք վերաբերում են իմ աշխատանքին:
Նախևառաջ, ԲԿՄԱ-ի գլխավոր մարզիչը փաստեց, որ Գրենիկ Պետրոսյանը մեր մոտ չի խաղում: Դա իրականությանը չի համապատասխանում: Նա «Փյունիկում» մասնակցել է 16 հանդիպման, որից 3-ը` Եվրոպայում: Գրենիկ Պետրոսյանը վերջին տեղում գտնվող թիմից եկել է Հայաստանի չեմպիոնի թիմ, որտեղ մրցակցությունը բարձր մակարդակի վրա է: Ես հնարավորին չափով նրան դրսևորվելու հնարավորություն եմ տվել, այո՜, երբեմն նաև գնացել եմ ռիսկի: Որպես մասնագետ հայտարարում եմ, որ Եվրոպայում խաղադաշտում նրա անցկացրած 30 րոպեն հավասարազոր է ԲԿՄԱ-ում 5 խաղում մեկնարկային կազմում հայտնվելուն: Նա այս 6 ամսվա ընթացքում ահռելի փորձ է ձեռք բերել` խաղալով նման մակարդակի վրա ու հանդերձարանը կիսելով չեմպիոնների հետ:
Ինչ վերաբերում է մինի ֆուտբոլի մարզչի հայտարարություններին մեծ ֆուտբոլի վերաբերյալ, որ նման բյուջե ունենալու պարագայում նա կարող էր ակումբին դուրս բերել Չեմպիոնների լիգայի խմբային փուլ, պարզապես կասեմ, որ ամպագոռգոռ հայտարարությունները ձեզ չեն կարող դարձնել բարձրակարգ կամ հաջողակ մարզիչ: Նման խոսքերը ոչ թե բնորոշում են մեզ, այլ իրենց: «Փյունիկը» Հայաստանի գործող չեմպիոնն է, որը իմ գլխավորությամբ այս տարի բարձրացրեց հայկական ակումբային ֆուտբոլի մակարդակը ու պատվով ներկայացավ եվրոպական մրցաշարերում․ սա փաստ է, ոչ թե «եթե»-ով կազմված նախադասություն: Այդ ժամանակ էլ` երբ պետք էր գործով մեզ աջակցել, մեր խաղերը հետաձգելու խնդրանքներին ընդառաջ չգնացիք: Մինչև օրս ոչ մի բացատրություն չենք լսել այս մասով, ինչո՞ւ մեր խաղերը չհետաձգեցիք»,-եզրափակել է Մելիքյանը։
Արթուր Սողոմոնյանի հարցազրույցը՝ այստեղ
ՀՖՖ պատասխանը՝ Արթուր Սողոմոնյանի հարցազրույցին՝ այստեղ
Ռաֆայել Նազարյանի պատասխանը՝ այստեղ
Ռուբեն Նազարեթյանի պատասխանը՝ այստեղ։
