Մոտ մեկ ամիս առաջ «Նոան» հայտարարեց «Վիլլառեալի» հետ բացառիկ համագործակցության վերաբերյալ համաձայնագիր ստորագրելու մասին։
Այսօր՝ նոյեմբերի 11-ին, երևանյան ակումբն ասուլիս էր հրավիրել՝ ներկայացնելու իսպանական ակումբի հետ համագործակցության մանրամասները։ Ասուլիսին ներկա էին «Նոա» Հոլդինգի նախագահ Ռոման Գևորկյանը, «Վիլյառեալի» ինստիտուցիոնալ կապերի տնօրեն, լեգենդար Մարկոս Սեննան և «Նոայի» գործադիր տնօրեն Արթուր Սահակյանը:
«Մենք սկսում ենք «Վիլյառեալի» հետ համագործակցությունը, կփորձենք օգտագործել այդ ակումբի փորձը, մեթոդաբանությունը, և կարծում եմ, որ «Վիլյառեալի» ներկայացուցիչներն օգտակար կլինեն մեր ակումբին, կնպաստեն մեր ակումբի ու մեր ֆուտբոլի զարգացմանը: Կարծում եմ նաև, որ նրանք շատ պատրաստակամ են դա անել: Հուսով ենք, որ մեր միջև այս համագործակցությունը շատ բեղմնավոր կլինի»,-ասուլիսը սկսեց Ռոման Գևորկյանը:
Մարկոս Սենան, վերհիշելով Հայաստանի հետ կապված իր հուշերը, ընդգծեց, որ իր համար իսկապես շատ հաճելի է վերադառնալ այստեղ:
«Շատ լավ հուշեր ունեմ այս երկրի հետ կապված: Այդ հուշերից մեկը Իսպանիայի հավաքականի կազմում այստեղ Հայաստանի ընտրանու հետ խաղալն ու 2:1 հաշվով հաղթելն էր: Եվս մեկ հաճելի հուշ՝ երբ մենք Իսպանիայում խաղացինք Հայաստանի հավաքականի հետ ու հաղթեցինք 1:0 հաշվով, իսկ գոլի հեղինակը, ցավում եմ, բայց ես դարձա (ծիծաղում է՝ խմբ.): Եվ հիմա վերադարձել եմ Հայաստան, ու շատ լավ պատճառ կա դրա համար. «Վիլյառեալի» կազմում եմ վերադարձել, որովհետև մենք արդեն Արթուրի օգնությամբ ավարտին ենք հասցնում ակադեմիայի շուրջ մեր պայմանագիրն ու պայմանավորվածությունը: Շատ գոհ եմ և վստահ, որ համագործակցությունը շատ լավ կստացվի ու լավ արդյունքներ կգրանցենք: Մնում է միայն ստորագրությունը դնել պայմանագրի տակ ու վերջ:», — ասաց նա:
Արթուր Սահակյանը մանրամասնեց, որ իսպանացի գործընկերներն այս մի քանի օրն իրենց հետ են անցկացնելու և անձամբ ծանոթանալու են ակումբի ենթակառուցվածքներին:
Սահակյանը կետ առ կետ ներկայացրեց՝ ինչ է իրենից ենթադրում այս համագործակցությունը․
- Մենք բազմիցս նշել ենք, որ ունենք բավականին տաղանդավոր պատանի ֆուտբոլիստներ, սակայն որոշակի տարիքից սկսած նրանց մոտ ֆուտբոլային աճը կանգ է առնում: Նույնը կարող եմ նշել մարզիչների մասին, որոնք ՈՒԵՖԱ-ի և Ֆեդերացիայի հովանու տակ որոշակի արտոնագրման դասընթացների են մասնակցում, բայց ոչ միշտ են այդ ամենը կիրառում ակումբներում, որոնցում աշխատում են: Այժմ մենք կփորձենք որոշակի հսկողություն սահմանել:
- Պայմանագիրը նախատեսում է նաև փորձի փոխանակում՝ ինչպես ֆուտբոլիստների, այնպես էլ մարզիչների շրջանում: Առնվազն 7 ֆուտբոլիստ՝ լավագույն երեխաները, ամեն տարի կմեկնեն իսպանական ակումբ՝ փորձաշրջանի, ինչպես նաև ուսումնական դասընթացների: Ասում եմ 7, որովհետև այդքան է նախատեսված պայմանագրով, բայց եթե նրանց կողմից ընտրությունը յոթից ավելի լինի, մենք կֆինանսավորենք նաև նրանց: Նույնը վերաբերում է մարզիչներին, որոնց թիվն առնվազն երկուսն է լինելու:
- Բացի դրանից, մենք հնարավորություն ունենք օգտվելու «Վիլյառեալի» օնլայն-պլատֆորմից: Դա նրանց ակադեմիայի ամբողջ մարզումային ընթացքն է, բոլոր վերլուծությունները, թե ինչպես են մարզումներ անցկացնում, ինչպես են վերլուծում մարզումը, խաղերը և այլն: Կփորձենք մեր մարզիչներին ավելի բուռն ընդգրկել այդ պրոցեսի մեջ և կսկսենք նրանցից պահաջնել առավելագույնը:
Սահակյանի խոսքով՝ իրենք չեն ցանկանում միայն նմանվել «Վիլյառեալին», այլ ուզում են նրանց օգնությամբ կատարելագործել առավելությունները և ստեղծել «Նոա» ֆուտբոլային ակումբի փիլիսոփայությունը, իսկ ռազմավարությունը նախատեսում են առնվազն 3 տարով։
««Վիլյառեալը» միջազգային ասպարեզում բավականին մեծ աշխատանք է կատարում և գրեթե 30 տարբեր երկրների ակադեմիաների հետ համագործակցում է, ինչը շատ հաջող է ստացվում: Ինչպես նաև, շատ հաջող է խաղում նրանց առաջին թիմը, որը, ակադեմիայով պայմանավորված, շատ ուժեղ ֆունդամենտ ունի»,- նկատեց Սահակյանը՝ խոստանալով, որ իրենք բավականին բաց են լինելու բոլորի առաջ՝ ինչպես նաև այլ ակումբների հետ համագործակցության առումով. փորձելու են փորձի փոխանակում անել երկրի ներսում:
Ստելլա Բաբլոյան