Նոյեմբերի 9-ին կմեկնարկի Fastex Հայաստանի Պրեմիեր լիգայի 16-րդ տուրը:
Տուրի մեկնարկը կտրվի մարզային դերբիով: Չարենցավանում տեղի «Վանը» կմրցի Գյումրիի «Շիրակի» հետ:
Չարենցավանյան թիմն առաջնությունում տպավորիչ մեկնարկից հետո սկսեց միավորներ կորցնել: Հատկանշական է, որ «Վանն» իր առաջին պարտությունը կրեց միայն 5-րդ տուրում՝ Երևանում նվազագույն հաշվով պարտվելով «Արարատին»: Արթուր Ասոյանի գլխավորած թիմը վերջին 3 խաղերում պարտություն է կրել և 14 խաղից հետո վաստակած 17 միավորով 7-րդն է մրցաշարային աղյուսակում:
Գյումրիի «Շիրակը» շարունակում է անկայուն ելույթների շարքը: Հատկանշական է, որ թիմն ընթացիկ առաջնությունում խփել է ամենից քիչ գոլերը: 14 խաղում Գյումրիի թիմին միայն 8 անգամ է հաջողվել գրավել մրցակիցների դարպասը, բաց թողնելով՝ 22-ը: Վերջին 4 խաղերից 3-ում «Շիրակը» պարտություն է կրել և հաղթել է մեկում՝ Երևանում նվազագույն հաշվով առավելության հասնելով «Արարատի» նկատմամբ: Հաղթանակի դեպքում Գյումրիի թիմը միավորների քանակով կհավասարվի չարենցավանյան թիմին: Հետաքրքրաշարժ է, որ երկու թիմերի ճանապարհները խաչվել են նաև Գավաթի խաղարկությունում, և այս հանդիպումը գավաթային խաղից առաջ յուրօրինակ քննություն կլինի թիմերի համար: Գավաթի կիսաեզրափակիչ դուրս գալու համար թիմերի խաղը տեղի կունենա նոյեմբերի 24-ին:
«Ալաշկերտ» — «Ուրարտու»
Տուրի կենտրոնական խաղը կկայանա «Նաիրի» մարզադաշտում, որտեղ «Ալաշկերտը» կընդունի ընթացիկ առաջնության առաջատար «Ուրարտուին»: Դմիտրի Գունկոյի գլխավորած թիմը շարունակում է հաղթանակների շարքը: «Ուրարտուն» չի պարտվել վերջին 10 խաղում, որից 8-ում միայն հաղթանակ է տարել: Գունկոյի թիմը նաև ամենահուսալիներից է պաշտպանությունում, 15 խաղում թիմը բաց է թողել 9 գոլ և այս ցուցանիշով երկրորդ արդյունքն ունի: Ավելի քիչ՝ 7 գոլ բաց է թողել «Արարատ-Արմենիան», սակայն վերջինս մեկ խաղ պակաս է անցկացրել: Այդ խաղերում «Ուրարտուն» խփել է 29 գոլ, նույնքան խփած գոլ ունի նաև «Ալաշկերտը»: Կարեն Բարսեղյանի թիմը 15 խաղում բաց է թողել 17 գնդակ: Վերջին 7 խաղերից 6-ում «Ալաշկերտը» հաղթանակ է տարել և պարտվել է միայն «Արարատ-Արմենիային»:
Առաջին շրջանի խաղում թիմերը փոխանակել են մեկական գնդակ: Հետաքրքիր է, որ թիմերը իրար միջև կայացած վերջին 4 խաղերում չեն պարզել հաղթողին: Երկու անգամ գրանցվել է գոլազուրկ խաղ, երկու անգամ էլ 1:1 հաշիվ: «Ալաշկերտը» հաղթանակի դեպքում միավորների տարբերությունն առաջատարի հետ կհասցնի նվազագույնի:
«Արարատ» — «Լեռնային Արցախ»
«Արարատը» 3 անընդմեջ պարտությունից հետո հաղթանակ է տարել վերջին 2 խաղում: Արարատցիները նախ 2:0 հաշվով առավելության հասան «Վանի», այնուհետև 2:1 հաշվով «Նոայի» նկատմամբ: «Արարատը» անցկացրած 15 խաղում խփել է 10, բաց թողել՝ 15 գոլ:
«Լեռնային Արցախն» ընթացիկ առաջնության հայտնությունն է: Արտաշես Ադամյանի գլխավորած թիմն իսկական գլխացավանք է դարձել նույնիսկ առաջատարների համար: Թիմն ընթացիկ առաջնությունում աչքի է ընկնում ամուր պաշտպանությամբ և կարողանում է արագ հակագրոհներով անակնկալի բերել մրցակիցներին: Հատկանշական է, որ վերջին տուրում «Փյունիկը» միայն խաղավերջում կարողացավ ոչ-ոքի կորզել «Լեռնային Արցախից»: Առաջին շրջանում կայացած խաղում «Լեռնային Արցախը» «Արարատի» նկատմամբ հաղթանակի հասավ 2:1 հաշվով:
«Նոա» — «Արարատ-Արմենիա»
Ընթացիկ առաջնության միակ թիմը, որը դեռ չի վայելել հաղթանակի բերկրանքը՝ «Նոան» է: Ռոբերտ Արզումանյանի գլխավորելուց հետո թիմն աչքի է ընկնում հստակ խաղային ձեռագրով, սակայն հետնապահին դեռ չի բացավականացնում խաղակցվածությունն ու փորձառությունը: «Նոան» վատագույն ցուցանիշն ունի նաև բաց թողած գոլերի ցուցանիշով: 15 խաղում թիմը բաց է թողել 35 գոլ:
«Արարատ-Արմենիան» նոր թափ է հավաքել և վերջին 4 խաղերում միայն հաղթանակ է տարել` խփելով 15 գոլ, բաց թողնելով 2-ը: Խփած ու բաց թողած գնդակներով Վարդան Բիչախչյանի թիմն ունի լավագույն արդյունքը: 14 խաղում թիմը խփել է 31 գոլ, բաց թողել՝ 7-ը: Մեկնարկային տուրերում մի քանի անկայուն խաղերից հետո Բիչախչյանը, կարծես թե, գտել է իր թիմի հաջողության բանալին և հստակ մարտավարությամբ, հատկապես առջևի գծում ունենալով արագ ու որակյալ ֆուտբոլիստներ, կարողանում է դժվարություններ ստեղծել ցանկացած մրցակցի համար:
ԲԿՄԱ — «Փյունիկ»
Տուրի վերջին խաղում գործող չեմպիոն «Փյունիկն» արտագնա խաղ կանցկացնի ԲԿՄԱ-ի հետ: Եղիշե Մելիքյանի գլխավորած թիմն առաջնությունում մի շարք ոչ պարտադիր միավորներ կորցրեց, ինչի արդյունքում այժմ միավորներով բավականին զիջում է առաջատարին: Չմոռանանք նաև, որ գործող չեմպիոնը երկու խաղ պակաս է անցկացրել: Կոնֆերենցիաների լիգայի մրցաշարից դուրս մնալուց հետո Մելիքյանի թիմն ամբողջ ուշադրությունն արդեն կկենտրոնացնի առաջնության վրա:
Ռաֆայել Նազարյանի գլխավորած ԲԿՄԱ-ն վերջին 3 խաղերում պարտություն է կրել և չնայած դրան բանակայինները աչքի էին ընկնում կարգապահ խաղով ու կազմակերպված պաշտպանությամբ: Այդ խաղերում թիմը պարտվել է նվազագույն հաշվով և բոլոր դեպքերում գոլերը բաց է թողել խաղավերջում: Այս առումով կարելի է ենթադրել, որ գործող չեմպիոնը լուրջ դիմադրություն կունենա:
Մրցաշարային աղյուսակը 16-րդ տուրից հետո ունի հետևյալ տեսքը.
| # | Թիմեր | Խ | Հ | Ո | Պ | ԽԳ | ԲԳ | Մ |
|---|---|---|---|---|---|---|---|---|
| 1 |
Ուրարտու |
15 | 12 | 1 | 2 | 29 | 9 | 37 |
| 2 |
Ալաշկերտ |
15 | 10 | 3 | 2 | 29 | 17 | 33 |
| 3 |
Արարատ-Արմենիա |
14 | 10 | 1 | 3 | 31 | 7 | 31 |
| 4 |
Փյունիկ |
13 | 8 | 1 | 4 | 19 | 9 | 25 |
| 5 |
Լեռնային Արցախ |
15 | 5 | 4 | 6 | 14 | 15 | 19 |
| 6 |
Արարատ |
15 | 5 | 2 | 8 | 10 | 15 | 17 |
| 7 |
Վան |
14 | 4 | 5 | 5 | 12 | 18 | 17 |
| 8 |
Շիրակ |
15 | 4 | 2 | 9 | 8 | 22 | 14 |
| 9 |
ԲԿՄԱ |
15 | 1 | 4 | 10 | 11 | 26 | 7 |
| 10 |
Նոա |
15 | 0 | 5 | 10 | 10 | 35 | 5 |
