Նոյեմբերի 3-ին՝ Վազգեն Սարգսյանի անվան «Հանրապետական» ստադիոնում «Փյունիկը» Կոնֆերենցիաների լիգայի խմբային փուլի վերջին տուրի շրջանակում հյուրընկալեց Շվեյցարիան ներկայացնող «Բազելին»:
Հանդիպումն ավարտվեց շվեյցարական թիմի հաղթանակով՝ 2-1 հաշվով։ Այս խաղի վերաբերյալ իր կարծիքն է հայտնել երևանյան թիմի գլխավոր մարզիչ Եղիշե Մելիքյանը․
«Շնորհավորում եմ «Բազելին» հաղթանակի կապակցությամբ։ Ուզում եմ շնորհակալություն հայտնել բոլորին։ Այսօր մինչև վերջին րոպեն երկրպագուները մեզ հետ էին, այդ աուրան շատ կարևոր է։
Տխուր եմ, որ չկա արդյունք, բայց հպարտ եմ, որ մեր թիմն ունի մինչև վերջին րոպեն պայքարելու ցանկություն։ Կաշխատենք մյուս տարի ուրախացնենք ձեզ։
Կարծում եմ՝ այս մրցաշրջանի, խաղերից երկուսում մեր պարտությունն արդարցի չէր։ Դասեր անպայման քաղելու ենք եվրագավաթային խաղերից։ Օրինակ, ժամանակին պատրաստվենք մրցաշարին՝ կազմի սելեկցիայի հետ կապված։ Հաջորդ անգամ մենք մինչև մրցաշրջանի մեկնարկը պատրաստ կլինենք այդ առումով»,- ասել է մարզիչը հետխաղյա մամուլի ասուլիսի ժամանակ։
Զուգահեռաբար ընթացող խաղում «Սլովանը» հաղթեց «Ժալգիրիսին» 2-1 հաշվով։ Այսպիսով, «Փյունիկն» այս կվարտետում զբաղեցրեց երրորդ տեղը։ 6 տուրից հետո այս խմբում թիմերը տեղակայվել են հետևյալ կերպ․
«Սլովան» – 11 միավոր
«Բազել» – 11 միավոր
«Փյունիկ» – 6 միավոր
«Ժալգիրիս» 5 միավոր
Կոնֆերենցիաների լիգայի խմբերում առաջին տեղ զբաղեցրած թիմերը նվաճում են 1/8 եզրափակչի, իսկ 2-րդ տեղ զբաղեցրած թիմերը՝ 1/16 եզրափակչի ուղեգիր։