Զանգվածային լրատվության միջոցներում վերջին օրերին ակտիվորեն տարածվում է հեծանվորդ Ստեփան Գրիգորյանի շուրջ ստեղծված իրավիճակի վերաբերյալ տեղեկություններ առ այն, թե 2022 թվականի գարնանը Հայաստանի քաղաքացիություն ստացած 28-ամյա մարզիկը Հայաստանում խնդիրների առաջ է կանգնել՝ ստիպված լինելով միջազգային մրցաշարերի մասնակցությունն ու տեխնիկայի հետ կապված հարցերը հոգալ սեփական միջոցներով:
Vahesport.ru-ի միջոցով մարզիկն իր դժգոհություններն է հայտնել միջազգային մրցումներին սեփական միջոցներով գնալու, հավաքականի գլխավոր մարզչի և ֆեդերացիայի կողմից ոչ բարյացակամ վերաբերմունք ստանալու և խոչընդոտների հանդիպելու վերաբերյալ: Նա նշել է, որ սեփական միջոցներից 18 հազար եվրո է ծախսել՝ տարատեսակ մրցաշարերի մասնակցելու համար, որտեղ ներկայացրել է Հայաստանը:
Հայաստանի հեծանվային սպորտի ֆեդերացիան տեսանյութ է տարածել՝ հերքելով մարզիկի հնչեցրած մեղադրանքները:
«Հեծանվային սպորտի ֆեդերացիան մարզիկին տրամադրել է լիցենզիա և ամեն ինչ արել է, որպեսզի Ստեփան Գրիգորյանը կարողանա միջազգային մրցաշարերի, ապա նաև աշխարհի առաջնությանը մասնակցել: Ամեն ինչ արվել է ժամանակին: Ֆեդերացիան իրեն ֆինանս չի տրամադրել, քանի որ Ստեփանը տարվա կեսերին է համալրել Հայաստանի թիմի կազմը, և մեր բյուջեով նախատեսված բոլոր մրցումներն արդեն անցկացված են եղել: Ֆեդերացիան բոլոր ջանքերը գործադրեց, որ հովանավոր գտնենք Ստեփանի համար: Արտաշես Սարգսյանը ցանկություն հայտնեց աջակցելու և հովանավորելու Ստեփան Գրիգորյանին՝ իմանալով, որ հնարավոր է լավ արդյունքներ գրանցենք աշխարհի և Եվրոպայի առաջնություններում: Այնուհետև իր բոլոր մրցումներին մասնակցելու համար կազմվեց նախահաշիվ, և դրա հիման վրա Արտաշես Սարգսյանը խոստացավ կատարել բոլոր վճարումները»,- ասել է ֆեդերացիայի փոխնախագահը:
Ֆեդերացիայից խոստացել են, որ եթե Ստեփանը լավ արդյունքներ գրանցի, ապա ֆեդերացիան կշարունակի ֆինասավորում գտնել նրա համար, սակայն Հայաստանի հեծանվային սպորտի հավաքականի գլխավոր մարզիչ Արմեն Գյոզալյանի փոխանցմամբ՝ Եվրոպայի առաջնությունում մարզիկի արդյունքները սպասվածից թույլ են եղել:
Ստեփան Գրիգորյանը նաև նշել էր, որ իր մակարդակի հեծանվորդ Հայաստանում չի եղել: Արմեն Գյոզալյանն ընդգծում է՝ անկախությունից հետո հեծանվային պատմության մեջ երիտասարդների պայքարում ունեցել ենք աշխարհի կրկնակի արծաթե մեդալ՝ Մհեր Մկրտչյանը և Եվրոպայի չեմպիոն՝ Էդգար Ստեփանյանը, աշխարհի արծաթե ու բրոնզե մեդալակիրներ: Մինչև 23 տարեկաններում Էդգարը եղել է նորից Եվրոպայի չեմպիոն հեծանվահրապարակից: Լինելով Մ23 տարեկանների խմբում՝ Էդգարը մասնակցել է նաև մեծահասակների աշխարհի գավաթի խաղարկությանը և զբաղեցրել 2-րդ տեղը: Եվրոպայի մեծահասակների առաջնությունում էլ Էդգարը զբաղեցրել է 8-րդ հորիզոնականը, որը մրցանակային չէ, բայց շատ բարձր արդյունք է՝ հաշվի առնելով, որ եղել է 21 տարեկան:
Հեծանվային սպորտի ֆեդերացիայից նշել են, որ Ստեփան Գրիգորյանը նաև կարգապահական խախտումներ է թույլ տվել՝ առանց ֆեդերացիային տեղյակ պահելու մասնակցելով միջազգային մրցաշարերի:
