Այս շաբաթ ավարտվում է ակումբային ֆուտբոլում աշխարհի ամենահեղինակավոր մրցաշարի՝ Չեմպիոնների լիգայի խմբային փուլը։
Փլեյ-օֆֆի մասնակիցների կեսից ավելին արդեն հայտնի է, սակայն որոշ խմբերում ամեն ինչ դեռ պարզ չէ, և խմբային փուլի վերջին տուրը շա՜տ թեժ է լինելու․․․ Դե ինչ՝ լցրեք ձեր տաք թեյը կամ սուրճը, և միասին առաջիկա մի քանի րոպեն կքննարկենք 8 խմբերում տիրող իրավիճակը։
⚽ A խումբ
1. «Նապոլի» — 15 միավոր
2. «Լիվերպուլ» — 12
3. «Այաքս» — 3
4. «Ռեյնջերս» — 0
Այս խմբում ամեն ինչ պարզ է․․․ դե՝ համարյա պարզ է։ «Նապոլին» և «Լիվերպուլը» արդեն փլեյ-օֆֆում են, մնում է պարզել՝ ով է առաջինը։ Իտալական ակումբին առաջին տեղը պահպանելու համար բավարար է ընդամենը խոշոր հաշվով չպարտվել (4 և ավել գնդակի տարբերությամբ) Կլոպի թիմին, ինչը, կարծում ենք, քիչ հավանական է։ Իսկ ահա երրորդ տեղը, որն ապահովում է Եվրոպա լիգայի փլեյ-օֆֆի ուղեգիր, ամենայն հավանականությամբ բաժին կհասնի «Այաքսին»։
⏳ 01/11․ 00։00․ «Լիվերպուլ»-«Նապոլի»
⏳ 01/11․ 00։00․ «Ռեյնջերս»-«Այաքս»
⚽ B խումբ
1. «Բրյուգե» — 10 միավոր
2. «Պորտու» — 9
3. «Ատլետիկո — 5
4. «Բայեր» — 4
Գիտե՞ք այս խմբում ինչն է հետաքրքիր․ այս կվարտետից պայքարը շարունակում են ոչ թոփ-5 լիգաների թիմերը, այն դեպքում, որ այդ լիգաներից երկու ներկայացուցիչ կա՝ «Ատլետիկոն» և «Բայերը»։ Այս թիմերն էլ կպայքարեն Եվրոպա լիգայի ուղեգրի համար, և, ըստ իս, ավելի մեծ շանսեր ունի գերմանական ակումբը, որը սեփական հարկի տակ կընդունի այս մրցաշրջանի գլխավոր բացահայտումը համարվող «Բրյուգեին»։ Իսկ ահա «Ատլետիկոյի» համար այդքան էլ հեշտ չի լինի արտագնա խաղում, քանի որ «Պորտուն», չնայած դուրս է եկել արդեն փլեյ-օֆֆ, բայց կփորձի միավորներ վաստակել՝ խմից առաջին տեղով դուրս գալու համար։
⏳ 01/11․ 21։45․ «Պորտու»-«Ատլետիկո»
⏳ 01/11․ 21։45․ «Բայեր»-«Բրյուգե»
⚽ C խումբ
1. «Բավարիա» — 15 միավոր
2. «Ինտեր» — 12
3. «Բարսելոնա» — 4
4. «Վիկտորիա» — 0
Այն խմբերից մեկն է, որտեղ ամեն ինչ պարզ է։ Մյունխենցիներն ու միլանցիները փլեյ-օֆֆում են, կատալոնացիները ևս՝ բայց Եվրոպա լիգայի, իսկ «Վիկտորիայի» երկրպագուները, անկախ ամենից, գոհ են, քանի որ ամեն տարի չէ, որ նման համաշխարհային աստղերի կարող են տեսնել իրենց մարզադաշտում․․․
⏳ 01/11․ 00։00․ «Բավարիա»-«Ինտեր»
⏳ 01/11․ 00։00․ «Վիկտորիա»-«Բարսելոնա»
⚽ D խումբ
1. «Տոտենհեմ» — 8 միավոր
2. «Սպորտինգ» — 7
3. «Այնտրախտ» — 7
4. «Մարսել» — 6
Իսկ այս խումբը նախորդի հակապատկերն է՝ այստեղ ոչինչ պարզ չէ, թիմերի միջև մաքսիմում մեկ միավորի տարբերություն է․․․ այնպես որ, այսօր Մարսելում ու Լիսաբոնում երեկոն գերթեժ է լինելու․․․ «Տոտենհեմին» և «Սպորտինգին» այսօր նույնիսկ ոչ-ոքին ձեռք կտա փլեյ-օֆֆ դուրս գալու համար, իսկ մյուսներին պետք է միմիայն հաղթանակ։ Կարճ ասած, ամեն ինչ շատ խառն է, և այդպիսով՝ ավելի հետաքրքիր։
⏳ 01/11․ 00։00․ «Մարսել»-«Տոտենհեմ»
⏳ 01/11․ 00։00․ «Սպորտինգ»-«Այնտրախտ»
⚽ E խումբ
1. «Չելսի» — 10 միավոր
2. «Միլան» — 7
3. «Զալցբուրգ» — 6
4. «Դինամո Զ․» — 4
Եվս մեկ խումբ, որը հարուստ է ինտրիգներով․ այս քառյակում միայն մեկ բան է հայտնի՝ «Չելսին» փլեյ-օֆֆում է ու․․․ ու վերջ։ Մյուս ուղեգիրն ու ԵԼ-ի ուղևորը դեռ հայտնի չէ։ Լոնդոնում զագրեբցիները կփորձեն կրկնել առաջին տուրի սենսացին՝ ԵԼ-ի ուղեգրին տիրելու համար, իսկ Միլանում իսկական կորրիդա է սպասվում․ Պիոլիի «մատադորները» կընդունեն զալցբուրգյան «ցլերին»․․․ Միլանյան թիմին այս խաղում ոչ-ոքին ևս կբավարարի, բայց չեմ կարծում, որ ավստրիացիները համաձայն են այս տարբերակին․․․
⏳ 02/11․ 00։00․ «Չելսի»-«Դինամո»
⏳ 02/11․ 00։00․ «Միլան»-«Զալցբուրգ»
⚽ F խումբ
1. «Ռեալ» — 10 միավոր
2. «Լայպցիգ» — 9
3. «Շախտյոր» — 6
4. «Սելթիկ» — 2
⏳ 02/11․ 21:45․ «Ռեալ»-«Սելթիկ»
⏳ 02/11․ 00։00․ «Շախտյոր»-«Լայպցիգ»
Մի փոքր նման է նախորդ խմբին։ «Ռեալը» կփորձի լուրջ մոտենալ «Սելթիկի» հետ խաղին, քանի որ, չնայած արդեն ապահովել է ուղեգիրը ՉԼ-ի գարնանային հանդիպումներին, բայց դեռ որոշված չէ առաջին տեղի հարցը։ Իսկ ահա «Լայպցիգին» պետք է չպարտվել «Շախտյորին»` հաջորդ փուլ դուրս գալու համար, հակառակ դեպքում, եթե հանքափորները հաղթեն, ապա նրանք կշարունակեն պայքարը փլեյ-օֆֆում, քանի որ երկու թիմերի առաջին դիմակայությունում դոնեցկյան թիմը հաղթել էր 4-1 հաշվով։ Եվս մեկ ինտրիգային հանդիպում մեր դիտակետում․․․
⚽ G խումբ
1. «Մանչեսթեր Սիթի» — 11 միավոր
2. «Բորուսիա Դ» — 8
3. «Սևիլիա» — 5
4. «Կոպենհագեն» — 2
⏳ 02/11․ 00։00․ «Մանչեսթեր Սիթի»-«Սևիլիա»
⏳ 02/11․ 00։00․ «Կոպենհագեն»-«Բորուսիա»
Տեսնո՞ւմ եք մրցաշարային աղյուսակը։ Վերջ, այդպես էլ կմնա թիմերի դասավորվածությունը վերջին տուրից հետո։ Ու այս խմբում ինտրիգների բացակայության կրակի վրա յուղ լցնելով ասեմ, որ Հոլանդն էլ չի խաղալու, այսինքն՝ նոր ռեկորդների մասին ևս կարող ենք մոռանալ։ Անցանք․․․
⚽ H խումբ
1. ՊՍԺ — 11 միավոր
2. «Բենֆիկա» — 11
3. «Յուվենտուս» — 3
4. «Մակքաբի» — 3
Եթե մրցաշրջանի սկզբում ասեին, որ թուրինյան գրանդը վերջին տուրում «Մակքաբիի» հետ պայքարելու է Եվրոպա լիգայի ուղեգրի համար, շատերը երևի թե կծիծաղեին․․․ բայց Ալեգրիի համար իրավիճակը հիմա հեչ էլ ծիծաղելու չէ․․․ «Յուվենտուսը» վերջին 9 տարվա մեջ առաջին անգամ չի խաղա ՉԼ-ի փլեյ-օֆֆում, իսկ Եվրոպա լիգայի ուղեգիրն էլ դեռ հարցականի տակ է․․․ Համենայն դեպս, կարելի է ակնկալել, որ սեփական հարկի տակ թուրինցիները կփորձեն ամեն ինչ անել ՊՍԺ-ին հաղթելու համար՝ ոչ միայն ԵԼ-ի ուղեգրի համար, այլ պարզապես՝ գլուխը բարձր մրցաշարից հեռանալու համար։
⏳ 02/11․ 00։00․ «Յուվենտուս»-ՊՍԺ
⏳ 02/11․ 00։00․ «Մակքաբի»-«Բենֆիկա»
⚽ Մրցաշարի ամենաարդյունավետ ֆուտբոլիստները
1․ Կիլիան Մբապե․ ՊՍԺ — 6 գոլ
2․ Մոհամեդ Սալահ․ Լիվերպուլ — 6 գոլ
3․ Էրլինգ Հոլանդ․ Ման․Սիթի — 5 գոլ
4․ Ռոբերտ Լևանդովսկի․ Բարսելոնա — 5 գոլ
Գոլային փոխանցումներով առաջատարը «Լիվերպուլի» հարձակվող Դեգու Ժոտան է, ով 4 անգամ օգնել է թիմակիցներին գրավել մրցակցի դարպասը։
Վար Բաբայան