Կոնֆերենցիաների լիգայի խմբային փուլում Երևանի «Փյունիկի» առաջիկա մրցակիցը կլինի Լիտվայի չեմպիոն «Ժալգիրիսը»։ Թիմերի միջև առաջիկա հանդիպումը կկայանա հոկտեմբերի 6-ին, Երևանում։
Նշենք, որ չորրորդ տուրում թիմերը կհանդիպեն արդեն Վիլնյուսում՝ հոկտեմբերի 13-ին։ Դե ինչ՝ ծանոթանանք մեր թիմի առաջիկա մրցակցին։
«Ժալգիրիսը» Լիտվայի ոչ միայն գործող չեմպիոնն է, այլ նաև, ընդհանրապես, ամենատիտղոսակիր ակումբը։ Վիլնյուսը ներկայացնող ակումբը նաև առաջինն է լիտվական ակումբներից, որը հանդես է գալիս եվրագավաթներում։
Այս մրցաշրջանում «Ժալգիրիսը», ինչպես «Փյունիկը», եվրագավաթային ոդիսականը սկսեց Չեմպիոնների լիգայից։ Նախ առաջին փուլում Վլադիմիր Չեբուրինի թիմը հաղթահարեց Կոսովոն ներկայացնող «Բալկանիի», իսկ հետո էլ ավելի ուժեղ մրցակցի՝ Շվեդիայի չեմպիոն «Մալմյոյի» արգելքը։ Իսկ ահա երրորդ փուլում նրանք զիջեցին սկանդինավյան մեկ այլ թիմի՝ նորվեգական «Բոդո Գլիմտին»։ Եվրոպայի լիգայի փլեյ-օֆֆում «Ժալգիրիսին» հաջողությունը ևս «չժպտաց»․ վիլնյուսյան ակումբը խմբային փուլի ուղեգիրը զիջեց բուլղարական «Լուդոգորեցին»։ Այդպիսով լիտվական ակումբը ստացավ Կոնֆերենցիաների լիգայի խմբային փուլի ուղեգիր, ի դեպ, ինչպես վերևում արդեն նշեցինք, առաջին անգամ Լիտվայի ակումբային ֆուտբոլի պատմության մեջ տեղի թիմը մասնակցում է եվրագավաթային հիմնական փուլին։
Հատկանշական է, որ «Փյունիկն» ու «Ժալգիրիսն» արդեն հանդիպել են եվրագավաթներում: Եվրոպա լիգայի 2013/14 մրցաշրջանի որակավորման 2-րդ փուլում մեր թիմը արտագնա խաղում 0-2 հաշվով պարտություն էր կրել, իսկ Երևանում կայացած հանդիպումն ավարտվել էր ոչ-ոքի՝ 1-1։
Ինչպես արդեն նշեցինք, «Ժալգիրիսը» Լիտվայի ամենատիտղոսակիր թիմն է։ Մայրաքաղաքային ակումբը, որը հիմնադվել է 1947 թվականին, ավագ տարիքի ֆուտբոլասերներին հայտնի է ԽՍՀՄ առաջնությունում իր ելույթներով (ակումբը սկզբից կրել է «Դինամո», հետո «Սպարտակ», իսկ 1962 թվականից՝ ներկայիս անունը)։ 1987 թվականին թիմը դարձել է նույնիսկ ԽՍՀՄ առաջնության բրոնզե մեդալակիր։
Անկախությունից հետո ակումբը դարձել է երկրի 9-ակի չեմպիոն (այդ ցուցանիշով զիջում է միայն «Կաունասին», որը 10 անգամ է դարձել չեմպիոն), 13 անգամ՝ երկրի գավաթակիր (սա ռեկորդ է), ինչպես նաև 7 անգամ՝ սուպերգավաթակիր։
Ներկայումս թիմի կազմը համալրված է ինչպես տեղացի ֆուտբոլիստներով, այնպես էլ լեգիոներներով։ «Ժալգիրիսի» ամբողջ կազմն ըստ Transfermarkt-ի կազմում է 6,8 մլն եվրո։ Այս ցուցանիշով լիտվական թիմը զիջում է մեր չեմպիոնին․ «Փյունիկի» ֆուտբոլիստների ընդհանուր տրանսֆերային արժեքը գնահատվում է 7,86 մլն եվրո։
«Ժալգիրիսի» ամենաթանկարժեք ֆուտբոլիստը գանացի կիսապաշտպան Ֆրենսիս Կյերեմեն է՝ 750 հազար եվրո։ Սերբ պաշտպան Նեմանյա Լյուբիսավլևիչի տրանսֆերային արժեքը կազմում է 525 հազար եվրո, իսկ լիտվացի կիսապաշտպան Օվիդիուս Վերբիկասինը՝ 450 հազար եվրո։ Համեմատության համար նշենք, որ «Փյունիկի» ամենաթանկարժեք ֆուտբոլիստները Կիրե Ռիստեվսկին, Ռոման Կարյասուկն ու Սերգեյ Վակուլենկոն են՝ 350 հազար եվրո տրանսֆերային արժեքով։
«Ժալգիրիսի» հիմնական դարպասապահը Էդմոնաս Գերտմոնասն է, ով նաև պարբերաբար ընդգրկվում է Լիտվայի հավաքականի հայտացուցակում, սակայն հավաքականում առաջին համարը չի։
Պաշտպանությունում հիմնականում խաղում են ավստրիացի Պավելիչն ու սերբ Լյուբիսավլևիչը՝ կենտրոնում, աջից՝ թիմի ավագ, 38-ամյա փորձառու ֆուտբոլիստ Սաուլիս Միկոլյունասը, իսկ ձախից՝ ֆրանսիացի Բոպեսուն կամ խորվաթ պաշտպան Մամիչը։
Կիսապաշտպանությունում հիմնականում հանդես են գալիս արգենտինացի Գորոբսովը, շվեյցարացի Բուֆը, Մոնտենեգրոյի ներկայացուցիչ Միլեչկովիչը, ֆրանսիացի Օուրեգան, Լիտվայի հավաքականի ֆուտբոլիստներ Կազլաուսկասը, Վերբիկասն ու Կուկլիսը, ինչպես նաև երիտասարդ Յուրասկևիչյուսը։ Իսկ թիմի առաջատարներից մեկը գանացի Կյերեմեն է։
Հարձակման գծում գերազանցապես տոն են տալիս լեգիոներները․ բրազիլացի Ռենան Օլիվեյրան թիմի գլխավոր գոլահարն է, իսկ նրա կողքին խաղում է նիգերիացի Օյեվուսին։ Նրանցից որևէ մեկին հարձակման գծում կարող է փոխարինել սերբ փորձառու հարձակվող Տադիչը:
Իսկ այս կոլեկտիվը գլխավորում է ղազախ մասնագետ Վլադիմիր Չեբուրինը (նախորդ տարվա հունվարից)։ Մասնագետն ավելի վաղ աշխատել է նաև լիտվական այլ թիմերում՝ «Սուդուվայում» և «Կրուոյայում»։ Իսկ ահա հայրենիքում 57-ամյա մասնագետը ժամանակին գլխավորել է Կարագանդայի «Շախտյորն» ու «Օկժետպեսը»։
«Կանաչ-սպիտակներն» իրենց տնային հանդիպումներն անցկացնում են Վիլնյուսի LFF մարզադաշտում, որը տեղավորում է 5000-ից քիչ ավել հանդիսական։
Ինչ վերաբերում է առաջիկա խաղին, ապա այս պահի դրությամբ «Փյունիկը» 4 միավորով երկրորդն է խմբում, իսկ «Ժալգիրիսը» և «Սլովանը» մեկական միավոր ունեն իրենց ակտիվում։ Լիտվական թիմը բոլորովին հեշտ մրցակից չէ, չնայած, ընդհանրապես, եվրագավաթային խմբային փուլում հեշտ մրցակիցներ չեն էլ լինում։ Սակայն նախորդ խաղում Եղիշե Մելիքյանի թիմը ցույց տվեց, որ կարող է ոչ միայն հավասար պայքարել, այլ նաև գերզանցել «թղթի վրա ֆավորիտ համարվող» թիմերին։ Այնպես որ, առաջիկա երկու խաղերից սպասելիքները մեծ են և երևանյան թիմը ի զորու է միավորների լավ պաշար հավաքել առաջիկա խաղերում․․․ հավատում ենք․․․ սպասում ենք․․․
Հիշեցնենք, որ «Փյունիկ»-«Ժալգիրիս» հանդիպումը կկայանա Վազգեն Սարգսյանի անվան Հանրապետական մարզադաշտում և կմեկնարկի 20։45-ին։
Վար Բաբայան