Հայաստանի ազգային հավաքականի նախկին ֆուտբոլիստ, Եվրոպայում ՀՖՖ դեսպան Լևոն Պաչաջյանը ArmSport-ի հետ զրույցում ամփոփել է իսպանացի մասնագետ Խոակին Կապառոսի աշխատանքը Հայաստանի հավաքականի գլխավոր մարզչի պաշտոնում, ինչպես նաև խոսել է մեր ընտրանու ելույթների մասին․
«Կարծում եմ՝ Կապառոսի աշխատանքը և՛ դրական, և՛ բացասական կարելի է գնահատել Հայաստանի հավաքականի համար։ Սկզբում բոլորս շատ մեծ ոգևորություն ապրեցինք՝ նայելով Կապառոսի գլխավորությամբ մեր թիմի ելույթներին և գրանցած արդյունքներին, բայց դա չար կատակ խաղաց իր և մեր հավաքականի հետ։ Երեք խաղում անընդմեջ, ու շատ կարևոր խաղերում, հաղթանակներ տարանք, ու դա բնական է՝ դրական էր։ Թիմը ձեռագիր էր ձեռք բերել, կային համակարգային լուծումներ։ Դրական էր նաև այն, որ անընդհատ նոր անուններ էր առաջ բերում, նոր ֆուտբոլիստների համար շանս էր ստեղծում, հատկապես՝ երիտասարդների։ Ու սա ևս Կապառոսի աշխատանքի դրական կողմերից էր»,- ասում է Լևոն Պաչաջյանը։
Անդրադառնալով բացասական կետերին՝ Պաչաջյանն ընդգծում է․ «Այդպիսի լավ սկզբից հետո Կապառոսը չկարողացավ բռնել խաղի թելը, թիմին տրամադրել այնպես, որ այդ անկումը չլինի։ Բոլորս էլ հասկանում էինք, որ պարտություններ էլ կլինեն, բայց, ցավոք, դա շարունակական բնույթ կրեց ու մարզիչը չկարողացավ այդ ամենն ի մի բերել։ Պետք է նշեմ նաև կարգապահական խնդիրները, որոնք ժամանակ առ ժամանակ արտացոլվեցին խաղի ընթացքում, ու որոշ ֆուտբոլիստների կողմից եղան կոպիտ խախտումներ, որոնք ազդեցին խաղերի ելքերի վրա։ Դա ևս մարզչի խնդիրն է։ Նա չկարողացավ թիմի ներսում այնպիսի մթնոլորտ և կարգապահական վիճակ ստեղծել, որ անհատ խաղացողներն այդպիսի սխալներով չազդեն հավաքականի խաղի վրա։ Ցավոք, այդ ամենը հանգեցրեց նրան, որ ունեցանք այն, ինչ ունեցանք, և այն սպասումը, որ ունեինք, չարդարացավ։ Արդյունքում, ՀՖՖ-ն, միանգամայն տրամաբանորեն, չերկարաձգեց նրա հետ պայմանագիրը»։
Պաչաջյանի խոսքով՝ ՀՖՖ-ի կողմից հստակ առաջադրանք կար, որ հավաքականը պետք է պահպանի իր տեղը Ազգերի լիգայի B խմբում, ինչը չստացվեց, հավաքականը նաև խոշոր հաշիվներով պարտություններ կրեց և շատ տրամաբանական էր, որ այս 2-2,5 տարում չունենալով բավարար արդյունք՝ ՀՖՖ-ն որոշեց չշարունակել նրա հետ աշխատանքը․ «Ամեն դեպքում, միայն կարող եմ շնորհակալություն հայտնել Միստերին ու հաջողություն մաղթել նրան։ Իսկ հիմա պետք է սպասենք և տեսնենք՝ ՀՖՖ-ն ում կընտրի՝ որպես հավաքականի գլխավոր մարզիչ»։
Պաչաջյանը դեռևս չի ցանկանում քննարկել այն որակները, որ պետք է ունենա հավաքականի նոր գլխավոր մարզիչը․ «Դեռ չեմ ցանկանա քննարկել ապագա մարզչի որևէ տարբերակ։ Կարծում եմ՝ կարելի է սպասել Եվրո-2024-ի նախընտրական փուլի վիճակահանությանը, որը կկայանա հոկտեմբերին։ Դրանից հետո միայն կարելի է կարծիք կազմել։ Ինձ համար էլ է շատ հետաքրքիր, թե ՀՖՖ-ի ընտրությունն ում վրա է կանգնելու»։
Հայաստանի ազգային հավաքականի փորձառու ֆուտբոլիստը միայն հույս է հայտնում, որ հավաքականի նոր գլխավոր մարզիչը ևս մեծ տեղ կտա երիտասարդներին։ Առհասարակ, նոր երիտասարդ անուններ բացահայտելը Պաչաաջյանը Կապառոսի ուժեղ կողմերից է համարում․ «Իհարկե երիտասարդներին հրավիրելը, նոր անուններ բացահայտելը Կապառոսի ուժեղ կողմերից էր այս ընթացքում։ Ինձ համար դա չէր կարող ուրախալի չլիներ։ Հաշվի առնելով, որ հայկական ակումբներում շատ չեն հայ ֆուտբոլիստներն ու երիտասարդները լեգեոներների ներկայության պայմաններում շատ են տուժում՝ քիչ խաղաժամանակ ստանալով, Կապառոսին հաջողվեց նոր անուններ հայտնաբերել, օրինակ Ժիրայր Շաղոյանը և մի շարք այլ խաղացողներ։ Հուսով եմ՝ հավաքականի ապագա մարզիչը ևս մեծ տեղ կտա երիտասարդներին, քանի որ դժվար մրցաշրջաններում պետք է 23-25 ֆուտբոլիստ ունենանք մեր տրամադրության տակ»։
Երիտասարդ նոր անունների ֆոնին Կապառոսի օրոք մեր հավաքականը նաև «կորուստներ» ունեցավ։ Հենց նրա օրոք թիմի երկարամյա ավագ Հենրիխ Մխիթարյանը հայտարարեց միջազգային կարիերան ավարտելու մասին, Սարգիս Ադամյանն էլ վերջին խաղերում սկսեց չհրավիրվել Հայաստանի ազգային հավաքական։ Պաչաջյանի խոսքով՝ սա նորմալ գործընթաց է․
«Մարզիչն ունի իր տեսլականը, ընտրությունը, ուղղությունը և ինչ-որ պահի ինչ-որ ֆուտբոլիստներ կարող է չտեղավորվեն այդ քաղաքականության մեջ։ Վերջիվերջո, մարզիչն է որոշում․ եթե մարզիչը որոշել է ինչ-որ ֆուտբոլիստի չհրավիրել, դա իր անձնական տեսլականի հետ է կապված։
Ինչ վերաբերում է Մխիթարյանին, ապա նա առանձնահատուկ ֆուտբոլիստ է մեր հավաքականի համար։ Ես միշտ նշել եմ, որ Մխիթարյանը այլ մակարդակի ֆուտբոլիստ է՝ այլ որակներով՝ թե՛ խաղային, թե՛ մարդկային։ Եկավ մի պահ, որ Մխիթարյանը որոշեց իր տեղը զիջել ավելի երիտասարդներին։ Նա ամեն ինչ արել է հավաքականի համար, չունի ապացուցելու որևէ բան։ Դա իր որոշումն է, որը ես ինքս հարգում եմ։ Չնայած վաղաժամ էր այդ որոշումը, վստահ եմ՝ Մխիթարյանը դեռ երկար կարող էր օգուտ տալ հավաքականին, թեկուզ միայն հավաքականում իր ներկայությամբ։ Բայց ունենք այն, ինչ ունենք։ Պետք է առաջնորդվենք ըստ դրա»։
Լևոն Պաչաջյանն անդրադարձել է նաև մեր հավաքականի ներուժին։ Շատերի կարծիքով՝ Ազգերի լիգայի B խմբում հանդես գալուն մեր թիմը դեռևս պատրաստ չէր․
«Ինչպես ֆուտբոլում, այնպես էլ կյանքում, շատ ավելի հեշտ է հասնել որևէ բարձունքի, քան հետո այն պահել, կամ առավել ևս՝ ավելացնել։ Այդ գործընթացը շատ դժվար է տրվում ոչ միայն մարզիչներին, այլև ֆուտբոլիստներին և ֆեդերացիային։ Այս առումով մենք միշտ կաղել ենք։ Եթե նայենք վերջին 10 տարում մեր հավաքականի ելույթներին, ապա կտեսնենք, որ եղել են ժամանակներ, երբ շատ վառ արդյունքներ ենք ունեցել, մի քանի խաղ հաղթել ենք, հասել ենք ինչ-որ կետի, իսկ դրանից հետո շատ դժվար է եղել այդ հաջողությունը պահելը կամ քայլ առաջ կատարելը։ Դա մեծ խնդիր է մեզ համար։ Պետք է կարողանանք չգցել մակարդակը։
Խաղացողների կարգը, որակները պրոցես է․ այսպիսի մակարդակներում խաղալով ֆուտբոլիստները աճ են գրանցում, իրենց մակարդակն էլ է բարձրանում։ Կարծում եմ՝ մեր հավաքականը ներուժ ունի հենց Ազգերի լիգայի B խմբում մնալու համար։ Վստահ եմ դրանում։ Ցավոք, այստեղ էլ վերոնշյալ մտածելակերպն է առաջ գալիս, երբ որոշ ֆուտբոլիստներ ինչ-որ ժամանակահատվածում հաջողություններ են գրանցում, վառ հանդիպումներ են անցկացնում, իսկ դրանից հետո իրենց գլուխը կորցնում են և ընկնում են էյֆորիայի մեջ։ Մտածում են՝ վերջ, արդեն բարձունքում են, և երբեք այդտեղից չեն ընկնի։ Սա շատ սխալ մոտեցում է։ Կարծում եմ՝ բոլորը պետք է գիտակցեն, որ ամենադժվար ժամանակները սկսվում են այն պահից, երբ հաջողության ես հասնում և պետք է դա պահես»։
Հիշեցնենք, որ Հայաստանի հավաքականն Ազգերի լիգայի խմբային փուլի արդյունքներով B դիվիզիոնից նահանջել է C դիվիզիոն։ Եվրո-2024-ի խմբային փուլի վիճակահանությունը կկայանա հոկտեմբերի 9-ին` Ֆրանկֆուրտում: Հայաստանի ազգային հավաքականն ընդգրկվել է 3-րդ զամբուղում: Նույն զամբյուղում են նաև Ուկրաինայի, Իսլանդիայի, Նորվեգիայի, Սլովենիայի, Իռլանդիայի, Ալբանիայի, Չեռնոգորիայի, Ռումինիայի ու Շվեդիայի հավաքականները:
