Այս շաբաթ կկայանան Չեմպիոնների լիգայի 2022/23 մրցաշրջանի խմբային փուլի երկրորդ տուրի հանդիպումները։ Մեզ սպասվում են մի շարք հետաքրքիր հանդիպումներ, որոնց մասին էլ այսօր կխոսենք։
⚽ Լևանդովսկին վերադառնում է Մյունխեն
«Բավարիա»-«Բարսելոնա»․․․ Այս տուրի կենտրոնական հանդիպումը։ Անչափ հետաքրքիր հանդիպում է սպասվում Մյունխենում։ «Բավարիան» առաջվա «Բավարիան» չէ, և մենք նկատի չունենք, որ թիմը փոխվել է բացասական իմաստով, նույնիսկ հակառակը, վեկտորն ուղղված է դեպի դրականը, բայց «Բարսելոնան» էլ այլևս վերջին տարիների «Բարսելոնան» չէ, և այս դեպքում խոսքը 100 տոկոսանոց դրական առաջընթացի մասին է։ Սպասել մյունխենցիների միանշանակ դոմինանտություն այս անգամ պետք չէ․ կատալոնացիները ի զորու են հավասար պայքար մղել Նագելսմանի թիմի դեմ, ինչու և ոչ, նույնիսկ երեք միավոր վաստակել (միգուցե ոչ այս խաղում, այլ՝ պատասխան դիմակայությունում)։
Բացի այդ, մյունխենցիների վերջին տարիների լավագույն գոլահարը՝ Լևանդովսկին, արդեն Չավիի ճամբարում է, ինչը ևս լրացուցիչ ինտրիգ է հաղորդում այս դիմակայությանը։ Ռոբերտն արդեն իսկ մրցաշրջանի մեկնարկում ապացուցում է իր բարձր մակարդակն ու շարունակում թարմացնել անձնական վիճակագրությունը։ ՉԼ-ի նախորդ խաղում դարձավ հեթ-տրիկի հեղինակ։ Այնպես որ Լևայի նախկին թիմակիցներին հեշտ 90 րոպե չի սպասվում։
Նույնը կարելի է ասել նաև «Բարսելոնայի» համար․ «Բավարիան» պարզապես ֆանտաստիկ արագ ու ճկուն ֆուտբոլ է ցուցադրում, գտնվում է լավ մարզավիճակում, և թիմի արդյունքները ներքին առաջնությունում պետք չէ դիտարկել որպես ցուցանիշ․ այն տպավորությունն է, որ մյունխենցիները կես ոտքով են խաղում առաջնությունում, իսկ ՉԼ-ում նրանք բավականին լուրջ են տրամադրված․․․
Իսկ ահա Մխիթարյանի «Ինտերին» ավելի թեթև ուղևորություն է սպասվում Չեխիա, որտեղ միլանցիները կհանդիպեն տեղի «Վիկտորիային»։ Այս տուրում Ինձագիի թիմը լավ հնարավորություն ունի առաջին միավորները վաստակելու մրցաշարում։
⚽ Փոթերը՝ Չելսիում
Նախորդ շաբաթվա գլխավոր իրադարձություններից մեկը տեղի ունեցավ Լոնդոնում։ «Չելսին» փոխեց գլխավոր մարզչին։ Իհարկե, հասկանալի է, որ դրա պատճառը «Դինամոյից» կրած պարտությունը չէր, մարզչի հետ կապված իրավիճակն ավելի խորն արմատներ ունի, բայց ինչևէ, այսօր դրա մասին չենք խոսում, դա քննարկման առանձին թեմա է։ Տուխելին թիմի ղեկին կփոխարինի Գրեմ Փոթերը։
Մարզչական փոփոխությունը գրեթե միշտ դրական է անդրադառնում թիմի վրա, համենայն դեպս՝ սկզբնական շրջանում։ Փոթերը անգլիական մարզչական դարբնոցի թերևս լավագույն ներկայացուցիչներից մեկն է այս պահին, թեև նրա աշխատելաոճն ու տակտիկական մտահղացումները բոլորովին տարբերվում են դասական անգլիական դպրոցի հիմքերից։ Սպասում ենք, որ առաջիկա խաղերում «արիստոկրատների» արդյունքները կբարելավվեն, նամանավանդ, որ Փոթերի դեբյուտային խաղում մրցակիցը գրանդ ակումբ չէ, այլ «Զալցբուրգը»․․․
⚽ Հոլանդը կշարունակի՞ նոր ռեկորդներ գրանցել
Եվս մեկ ինտրիգ էլ սպասվում է Մանչեսթերում․ Գվարդիոլայի թիմը, որը գտնվում է հիանալի մարզավիճակում, կհյուրընկալի ճգնաժամի մեջ գտնվող «Բորուսիային»։ Հատկանշական է, որ ինչպես Լևանդովսկին, այս խաղում էլ Հոլանդը կհանդիպի իր նախկին խաղընկերներին։ Թվում է, որ խմբային փուլը Պեպի թիմին շատ հեշտ է տրվելու, և «քաղաքաբնակներին» այս խմբում ոչ մի թիմ ի զորու չէ նվազագույնը գոնե խնդիրներ առաջացնել․․․
Բայց այս ամենը միակ ինտրիգը չէ։ Հոլանդը գրեթե ամեն խաղից հետո նվազագույնը մեկ ռեկորդ կամ ցուցանիշ է գրանցում, և հետաքրքիր է` այս անգամ ի՞նչ շեմ կհաղթահարի Էրլինգը․․․ Նամանվանդ, ինչպես վերևում նշեցինք արդեն, մրցակիցներն այս խմբում ամենաահեղը չեն, և թե մանչեսթերյան թիմի, թե անձամբ Հոլանդի համար լավ պայմաններ են «ստեղծված» վիճակագրությունը բարելավելու համար։
⚽ Ժամանակն է միավոր վաստակելու
Սակայն «Բորուսիան» միակ թիմը չէ, որ գտնվում է ճգնաժամում։ Նման կարգավիճակում են նաև «Յուվենտուսը», և․․․ «Լիվերպուլը»։ Երկու թիմերն էլ անհաջող են մեկնարկել ՉԼ-ում (նաև առաջնությունում)՝ պարտվելով իրենց խմբերում հիմնական մրցակիցներին։ Ժամանակն է, որ Կլոպն ու Ալեգրին ինչ-որ բան փոխեն, սկսեն դուրս գալ այս իրավիճակից։ Չնայած, Կլոպի մոտ խնդիրներն ավելի շատ կապված են վնասվածք ունեցող ֆուտբոլիստների մեծ թվի հետ․ նշենք, որ երեկ հայտնի դարձավ, որ Ռոբերտոսոնը ևս բաց կթողնի առաջիկա հանդիպումները։
Մերսիսայդցիներն այս տուրում կհանդիպեն «Այաքսին», իսկ թուրինցիները՝ «Բենֆիկային»։ Մրցակիցներն, այսպես ասած, հեշտ հաղթահարելի չեն․ երկու թիմերն էլ հաջող են մեկնարկել ՉԼ-ի նոր մրցաշրջանում, այնպես որ, եթե այս անգամ էլ գրանդները սայթաքեն, հետո բավականին դժվար է լինելու պայքարել խմբից դուրս գալու համար։
⏳ 2-րդ տուրի ժամանակացույցը
13․09/ 20։45 «Վիկտորիա»-«Ինտեր»
13․09/ 20։45 «Սպորտինգ»-«Տոտենհեմ»
13․09/ 23։00 «Լիվերպուլ»-«Այաքս»
13․09/ 23։00 «Պորտու»-«Բրյուգե»
13․09/ 23։00 «Բայեր»-«Ատլետիկո»
13․09/ 23։00 «Բավարիա»-«Բարսելոնա»
13․09/ 23։00 «Մարսել»-«Այնտրախտ»
14․09/ 20։45 «Միլան»-«Դինամո»
14․09/ 20։45 «Շախտյոր»-«Սելթիկ»
14․09/ 23։00 «Ռեյնջերս»-«Նապոլի»
14․09/ 23։00 «Չելսի»-«Զալցբուրգ»
14․09/ 23։00 «Ռեալ»-«Լայպցիգ»
14․09/ 23։00 «Մանչեսթեր Սիթի»-«Բորուսիա»
14․09/ 23։00 «Կոպենհագեն»-«Սևիլյա»
14․09/ 23։00 «Յուվենտուս»-«Բենֆիկա»
14․09/ 23։00 «Մաքաբի»-ՊՍԺ