Ժիրայր Շաղոյանն օրերս վերադարձավ այնտեղ, որտեղից ամեն ինչ սկսվել էր. 2021 թվականին հենց ԲԿՄԱ-ի կազմում ցուցադրած տպավորիչ խաղի արդյունքում Շաղոյանը հրավիրվեց Հայաստանի ազգային հավաքական, նորամուտը նշեց ԱԱ 2022-ի ընտրական փուլի՝ Իսլանդիայի հավաքականի դեմ հաղթական խաղում և 6 հանդիպման մասնակցեց Ազգային թիմի կազմում՝ թողնելով բավականին լավ տպավորություն: Վերջին անգամ, սակայն, Շաղոյանն Ազգային թիմի մարզաշապիկը կրել է 2021 թվականի սեպտեմբերին:
21-ամյա ֆուտբոլիստը վարձավճարով է հանդես գալու ԲԿՄԱ-ի կազմում, նրա տրանսֆերային իրավունքները պատկանում են «Արարատ-Արմենիային»: Այս տեղափոխության վերաբերյալ որոշման, պատճառների, հետագա անելիքների և Հայաստանի ազգային հավաքական հրավիրվելու մասին ArmSport-ը զրուցել է ֆուտբոլիստի հետ։
-Սկսենք նրանից, թե ինչպես ստացվեց ԲԿՄԱ վերադարձդ։
-Ես ցանկացա վերադառնալ ԲԿՄԱ, քանի որ «Արարատ-Արմենիայում» այնքան խաղաժամանակ չէի ստանում, որքան ինձ հարկավոր է, որ հրավիրվեմ ազգային հավաքական։ Որպես երիտասարդ ֆուտբոլիստ՝ ես ինձ լավ չէի զգում այդքան քիչ խաղաժամանակ ստանալով, ինձ չի թվում, որ ես պիտի դաշտում հայտնվելու քիչ ժամանակ ստանամ՝ անկախ թիմի անունից։ Չնայած նրան, որ մարզիչները նոր էին ու չի բացառվում, որ խաղաժամանակս ավելանար, կարծում եմ՝ հենց այդպես էլ կլիներ, բայց «Արարատ-Արմենիայի» դեպքում մի փոքր այլ է․ քանի որ չեմպիոնության խնդիր կա, եթե մի խաղ լավ հանդես չգաս, հնարավոր է՝ 3-4 խաղ սպասես։ Իսկ ես մի տարի, կոպիտ ասած, կորցրել էի և չէի ուզում, որ այս տարի էլ նույնը կրկնվեր՝ ինչ-որ վատ խաղից հետո մի քանի խաղ ստիպված լինեի սպասել։
ԲԿՄԱ-ն ինձ միշտ շանս է տալիս, թեկուզ վատ խաղից հետո փորձել ավելի լավ խաղալ և դա ինձ ավելի է ոգեշնչում, որ ավելի լավ, ավելի վստահ հանդես գամ ու դաշտում ավելի հանգիստ լինեմ։
-Դու քեզ ԲԿՄԱ-ո՞ւմ ես տանը զգում, թե՞ «Արարատ-Արմենիայում»։
-Չեմ ուզում երկու թիմերի մեջ տարբերություն դնել, երկուսն էլ լավ թիմեր են, բայց ֆուտբոլիստի համար կարևորը խաղալն է, այդ պատճառով կարող ես քեզ ավելի հարմարավետ զգալ այն թիմում, որտեղ ավելի շատ ես խաղում։
-Վերջերս տեղեկություն էր տարածվել «Ջենոայի» հետաքրքրվածության մասին․ դու տեղյա՞կ ես դրանից։
-Տեղեկություն ունեցել եմ, բայց միայն խոսակցություններ են, հստակ ոչ մի բան չի եղել։
-Իսկ այլ ակումբներից առաջարկներ ունեցե՞լ ես։
-Մի քանի առաջարկ ունեցել եմ, բայց կոնկրետ ակումբների անունները չեմ կարող նշել։
-Իսկ կա՞ ակումբ, որտեղ երազում/ձգտում ես խաղալ։
-Փոքր հասակից երկրպագել եմ «Բարսելոնային» ու երազել այնտեղ հանդես գալ, բայց եվրոպական բոլոր բարձրակարգ թիմերում էլ, միանշանակ, կցանկանայի հանդես գալ։
-Ի՞նչ տվեց քեզ ազգային հավաքական հրավիրվելը, այնտեղ խաղալը։
-Երբ հայտնվում ես ազգային հավաքականում, քո կյանքում միանգամից մի քանի նպատակ է իրականանում։ Առաջինն այն է, որ դու փոքր ժամանակվանից սկսում ես ֆուտբոլով զբաղվել ու գալիս է մի տարիք, որ հասկանում ես՝ պիտի մի կողմ դնես այն ամենը, ինչը կխանգարի ֆուտբոլին կամ, գուցե, չխանգարի, ուղղակի ամեն ինչ չես կարող հասցնել ֆուտբոլի հետ։ Հասկանում ես, որ պիտի քեզ շատ բաներից զրկես, որոնք սովորական մարդիկ իրենց թույլ են տալիս, որպեսզի քեզ մոտ ամեն ինչ ստացվի, եթե ուզում ես բարձունքների հասնել ֆուտբոլում։
Հետո հավաքականում խաղալով՝ ներկայացնում ես եռագույնը, աշխարհում բոլորը, քո հարազատները քեզ են դիտում, և դու սրտանց ես անում այդ գործը՝ օգնելով քո ազգին, քո երկրին, որ այն ամբողջ աշխարհում ավելի ճանաչելի դառնա։ Հրաշալի զգացողություն է։
-Հետաքրքիր է, կայքերում, սոցցանցերում քո հասցեին ուղղված մեկնաբանություններին հետևո՞ւմ ես։
-Անձամբ ես չեմ հետաքրքրվում դրանով, բայց ինձ շատ են տեղյակ պահում, որ միևնույն հարցի շուրջ շատ են մեկնաբանությունները՝ թե հավաքական ինչո՞ւ չեմ հրավիրվում։ Բայց հիմա եկել եմ ԲԿՄԱ, որ այդ բոլոր հարցերի պատասխանները տամ, խաղաժամանակս այնքան լինի, որ հավաքական չհրավիրվելու խնդիր չլինի։
Պիտի ամենաբարձր մակարդակով յուրաքանչյուր խաղի դուրս գամ դաշտ ու ապացուցեմ, որ ես արժանի եմ հավաքական հրավիրվելուն։
-Որքա՞ն ժամանակ ես նախատեսում մնալ ԲԿՄԱ-ում։
-Առաջնության առաջին հատվածն այնտեղ կանցկացնեմ, դրանից հետո արդեն, կարծում եմ, իմ խաղից է կախված, թե հետագան ինչպես կլինի։ Չեմ կարող ասել, որ այս մեկ տարին այնտեղ եմ լինելու, առաջին հատվածից հետո պարզ կդառնա։
-Ի՞նչ շանսեր ունի թիմն այս մրցաշրջանում։
-Պայքարելու ենք միայն բարձր հորիզոնականների համար։
ՎԵՐՋԱԲԱՆԻ ՓՈԽԱՐԵՆ
-Ինչի՞ ես ձգտում ֆուտբոլում։
-Ձգտում եմ հասնել այնպիսի մակարդակի, որ կարողանամ երկար ժամանակ հանդես գալ մեծ ակումբներում և հավաքականին օգնեմ մասնակցել մեծ մրցաշարերի։
Ստելլա Բաբլոյան