Հուլիսի 27–ին մեկնարկեց ֆուտբոլի Հայաստանի 31–րդ առաջնությունը։ Մինչև առաջին տուրի խաղերին անդրադառնալը հետհայաց գցենք նախորդ մրցաշրջաններին։
2002 թվականից ի վեր 2–րդ անգամ Հայաստանի առաջնությունը սկսվեց 10 թիմով, որը մասնակից թիմերի առավելագույնն է վերջին 20 տարում։ 2002 թվականին Հայաստանի առաջնությունն անցկացվեց 12 թիմով, դրանից հետո մասնակից թիմերի քանակը դարձավ 8։ 2016/17 մրցաշրջանում առաջնության մասնակից թիմերի քանակը հասավ նվազագույնի՝ առաջնությանը մասնակցեց 6 թիմ։ Նույնքան թիմ մասնակցեց նաև հաջորդ մրցաշրջանին, իսկ 2018/19 մրցաշրջանն անցկացվեց 9 թիմով։ 2019/20 մրցաշրջանը սկսվեց 10 թիմով, սակայն առաջնության ընթացքում ելույթները դադարեցրեց «Երևանը», ինչի արդյունքում առաջնությունն ավարտվեց 9 թիմով։ 2020/21 մրցաշրջանը սկսվեց 9 թիմով, սակայն այն նույնպես նախորդի պես ավարտվեց ավելի քիչ թիմով։ Այս անգամ մրցաշրջանը չավարտեց «Լոռին»։ Նախորդ մրցաշրջանը սկսվեց և ավարտվեց 9 թիմով, սակայն առաջնության ավարտից հետո հայտնի դարձավ, որ գավաթակիր «Նորավանքը» չի մասնակցի գալիք մրցաշրջանին։
ՀՖՖ-ն Պրեմիեր լիգայի ուղեգիր շնորհեց «Շիրակին» ու «Լեռնային Արցախին», արդյունքում, 2022/23 մրցաշրջանը սկսվեց 10 թիմով, մնում է միայն հավատալ, որ մրցաշրջանի ընթացքում ականատես չենք լինի վերջին տարիներին «սովորական» դարձած երևույթին, ու նույնքան թիմով կավարտվի մրցաշրջանը՝ որքանով սկսվել է։
Առաջին տուր
Տուրի մեկնարկը տրվեց Վայքում, որտեղ առաջնության նորեկ «Լեռնային Արցախն» ընդունեց Չարենցավանի «Վանին»: Այս խաղում խփվեց ընդամենը մեկ գոլ: Խաղավերջում տանտերերը կարող էին հասնել հաջողության, սակայն «Վանի» դարպասապահը հետ մղեց նշանակված 11 մետրանոցը: Հիմնական ժամանակի վերջին րոպեին 11 մետրանոցի հարվածի իրավունք ստացան հյուրերը, որը դիպուկ իրացրեց Էդգար Մովսեսյանը՝ խփելով նոր մրցաշրջանի առաջին գոլը:
Տուրի գոլառատ խաղը տեղի ունեցավ Արմավիրում, որտեղ «Ալաշկերտը» 4:3 հաշվով հաղթեց «Նոային»: Խաղասկզբում Ադամս Ֆրայդին առաջ մղեց տանտերերին։ 13-րդ րոպեին Աննան Մենսահը հավասարեցրեց հաշիվը, իսկ 4 րոպե անց Արտակ Եդիգարյանը, հստակ իրացնելով 11 մետրանոցը, հաշիվը դարձրեց 1։3։ Երկրորդ կեսում «Նոան» կարողացավ բեկել խաղի ընթացքը։ Նախ Պետրոս Աֆաջանյանը կրճատեց հաշվի տարբերությունը, իսկ հիմնական ժամանակի ավարտից 7 րոպե առաջ Դրամանե Սալուն հաշիվը դարձրեց 3։3։ 94–րդ րոպեին «Ալաշկերտի» հաղթական գոլը խփեց Տիագո Գալվաոն։ Երևանի «Արարատը» «Հանրապետական» մարզադաշտում Ռազմիկ Հակոբյանի գոլի շնորհիվ նվազագույն հաշվով հաղթեց «Փյունիկին»: Հարկ է նշել, որ Հայաստանի գործող չեմպիոնը հանդես էր գալիս երկրորդ կազմով։
Ուշադրության էր արժանի խաղից հետո «Փյունիկի» գլխավոր մարզիչ Եղիշե Մելիքյանի մամուլի ասուլիսը։ Մարզիչը նշեց, որ դիմել էին ՀՖՖ՝ առաջին տուրի հանդիպումը հետաձգելու խնդրանքով, սակայն մերժում էին ստացել։
«Խաղի մասին չեմ ուզում խոսել։ Ուզում եմ իրավիճակի մասին խոսել, որովհետև շատ ջղայնացած եմ։ Առաջին հերթին շնորհավորում եմ «Արարատին»։ Նրանք արժանի էին հաղթանակի։ Նրանք այս հարցի հետ կապ չունեն։ Հարցն այլ է։ Մենք բոլորս պետք է ոչ թե խոսքով, այլ գործով ապացուցենք, որ հայկական ֆուտբոլի մասին մտածում ենք։ Մենք խնդրել էինք, որ այս խաղը չլիներ, քանի որ կարևոր հանդիպում ունենք ամսի 3-ին և ի վիճակի չէինք անցկացնել այս խաղը։ Մեր դեմ հարցը դրվեց, որ խաղը պետք է կայանա, որովհետև իրենք այդպես են ուզում։ Չգիտեմ՝ ինչո՞ւ են այդպես ուզում, պարզապես այդպես էին որոշել։ Եթե որոշող էիք, անցյալ տարի «Ալաշկերտի» 4 խաղերը չհետաձգեիք։ Այդ «ջոկողություններից» շատ եմ նեղվում»,- ասել է Եղիշե Մելիքյանը հետխաղային ասուլիսի ժամանակ։
Ի դեպ, օգոստոսի 1-ին ՀՖՖ-ն հայտարարեց, որ հետաձգել է առաջնության երկրորդ տուրի «Արարատ-Արմենիա»-«Փյունիկ» խաղը՝ կապված Հայաստանի չեմպիոնի՝ Չեմպիոնների լիգայի մասնակցության հետ:
«Արարատ-Արմենիան» էլ հանդես եկավ հայտարարությամբ, որ «Փյունիկ» ֆուտբոլային ակումբի առաջխաղացումը եվրագավաթների ընթացիկ խաղարկությունում հաշվի առնելով, և որպես հետևանք ակումբի խնդրանքը՝ համաձայնել են հետաձգել խաղը.
«Հաշվի առնելով FC Pyunik ֆուտբոլային ակումբի առաջխաղացումը եվրագավաթների ընթացիկ խաղարկությունում և որպես հետևանք` վերջինիս խնդրանքը` ս.թ. օգոստոսի 7-ին կայանալիք VBET Հայաստանի Պրեմիեր լիգայի 2րդ տուրի` «Արարատ — Արմենիա» ակումբի հետ կայանալիք հանդիպումը հետաձգելու վերաբերյալ, հայտնում ենք, որ «Արարատ-Արմենիան» տվել է իր համաձայնությունը` ընձեռելով հայկական ակումբին եվրագավաթային հանդիպմանը լավագույնս պատրաստվելու հնարավորություն»,-ասված է հայտարարությունում։
Մեկնարկային տուրում ԲԿՄԱ-ն Ավանի ակադեմիայի մարզադաշտում նվազագույն հաշվով պարտվեց Գյումրիի «Շիրակին»: Հյուրերի միակ գոլը խփեց Լյովա Մրյանը:
Մեկ գոլ եղավ նաև Ուրարտու Արարատ-Արմենիա խաղում: Տանտերերի կազմում հաղթական գոլը խփեց Օլեգ Պոլյակովը:
Առաջին տուրի վիճակագրությունը.
Այսպիսով, VBET Պրեմիեր Լիգայի առաջին տուրի 5 խաղում խփվեց 11 գոլ:
5 խաղից չորսն ավարտվեց հյուրերի հաղթանակով, մյուս խաղերում հաղթեցին տերերը։
Կայացած 5 խաղում գրանցվեց 12 անգամ դեղին քարտ, խաղադաշտից հեռացում չեղավ:
Առաջնության առաջին տուրից հետո «Ալաշկերտը», «Ուրարտուն», «Վանը», «Արարատն», ու «Շիրակն» ունեն 3-ական միավոր:
Vbet Հայաստանի Պրեմիեր լիգայի 2-րդ տուրի խաղերը տեղի կունենան օգոստոսի 7-ին և 8-ին: