Հուլիսի 5-ին «Փյունիկը» մեկնարկելու է Չեմպիոնների Լիգայի 2022/23թթ․ խաղարկության որակավորման առաջին փուլում՝ սեփական հարկի տակ ընդունելով Ռումինիայի չեմպիոն «Կլուժին»։
Առաջարկում ենք ծանոթանալ մեր թիմի առաջիկա մրցակցի հետ, որը ներկայացնում է Տրանսիլվանիայի Կլուժ-Նապոկա քաղաքը։
«Երկաթուղայինները» Ռումինիայի ամենահոջողակ թիմերից մեկն են վերջին տասնամյակում։ Բայց միշտ չէ, որ այդպես է եղել․․․ Ռումինիայում Կլուժ-Նապոկայի ակումբը, որը հիմնադրվել է 1907 թվականին, գրանդ չի համարվում. ավելի քան մեկ դարի ընթացքում այն մշտապես «ճանապարհորդել» է տարբեր դիվիզիոնների միջև՝ ընդհանուր առմամբ խաղալով ընդամենը 13 մրցաշրջան էլիտայում։ Սակայն 21-րդ դարում արդեն ակումբը գլխապտույտ թռիչք կատարեց. 2008 թվականին «Կլուժը», որի պաշտոնական անվանումը CFR է, իր պատմության մեջ առաջին անգամ դարձավ Ռումինիայի չեմպիոն և առաջին թիմն էր ոչ Բուխարեստից, որը նվաճեց այս տիտղոսը 1991 թվականից հետո։ 2008 թվականի աշնանը CFR-ն իտալացի մարզիչ Մաուրիցիո Տրոմբետայի ղեկավարությամբ իր նորամուտը նշեց Չեմպիոնների լիգայում՝ հաղթելով «Ռոմային»։
Ի դեպ, CFR հապավումը նշանակում է Caile Ferate Romane և թարգմանվում է որպես Ռումինական երկաթուղիներ:
Ընդհանուր առմամբ «Կլուժը» 8 անգամ դարձել է Ռումինիայի չեմպիոն և քառակի գավաթակիր։ Ընդ որում՝ թիմը 5-րդ տարին անընդմեջ դարձել է չեմպիոն։
«Կլուժը» Ռումինիայի առաջնության ամենաթանկարժեք կազմ ունեցող երկու թիմերից մեկն է։ Ըստ Transfermarkt-ի, թիմի ֆուտբոլիստների ընդհանուր տրանսֆերային արժեքը կազմում է ավելի քան 35,5 մլն եվրո, որը երկրորդ ցուցանիշն է՝ «Ստյաուայից» (FCSB) հետո (38,13 մլն եվրո)։ Առաջնության մյուս ուժեղագույն թիմերը նմանատիպ ցուցանիշով 2-3 անգամ զիջում են այս դուետին։ Իսկ ահա համեմատության համար նշենք, որ «Փյունիկի» ֆուտբոլիստների ընդհանուր տրանսֆերային արժեքը կազմում է 6,04 մլն եվրո։
Դրակուլայի հայրենիքը ներկայացնող թիմի ամենաթանկարժեք ֆուտբոլիստը ռումինացի պաշտպան Անդրեյ Բուրկան է, ում տրանսֆերային արժեքը կազմում է 4 մլն եվրո։ Ընդհանրապես, «Կլուժի» կազմում 11 ֆուտբոլիստի տրանսֆերային արժեքը հատում է 1 մլն եվրոյի շեմը։ Եթե նորից համեմատական տանենք Հայաստանի չեմպիոնի հետ, ապա, հայկական թիմում ամենաթանկարժեք ֆուտբոլիստների տրանսֆերային արժեքները առավելագույնը կազմում են 300 հազար եվրո (5 ֆուտբոլիստ)։
Ստորև՝ ռումինական թիմի ամենաթանկարժեք ֆուտբոլիստների ցանկը․
Թիմի կորիզը կազմում են ռումինացի ֆուտբոլիստները, որոնցից շատերը ազգային հավաքականի ներկայացուցիչիներ են։ Բացի այդ, թիմում խաղում են մի շարք որակյալ լեգիոներներ, որոնցից կարելի է առանձնացնել բոսնիացի պաշտպան Դանիել Գրաովացին, գանացի կիսապաշտպան Բոատենգին, ալժիրցի Բիլել Օմրանիին և խորվաթ հարձակվող Գաբրիել Դեբելյուին, ով թիմի գլխավոր ռմբարկուն է։
Ռումինացի ֆուտբոլիստներից կառանձնացնենք պաշտպաններ Բուրկային, Մանեային, կիսապաշտպաններ Պաունին, Պետրիլային, Բորդեանուին և իհարկե՝ փորձառու 36-ամյա կիսապաշտպան Չիպրիան Դաեկին, ով թիմի երկրորդ ռմբարկուն է։
Սակայն թիմի գլխավոր «աստղերից» մեկը Դան Պետրեսկուն է, ով ռումինական ժամանակակից մարզչական դպրոցի լավագույն ներկայացուցիչներից մեկն է։ Դանն ավելի շատ հայ ֆուտբոլասերներին ծանոթ է ռուսական ակումբներում անցկացրած կարիերայի շնորհիվ։ Ժամանակին նա մարզել է «Կուբանն» ու Մոսկվայի «Դինամոն»։ Խարիզմատիկ մարզիչը նաև հայտնի է Ռումինիայի հավաքականում (95 խաղ, 12 գոլ) և «Չելսիում» իր ելույթներով։ 54-ամյա մասնագետը մարզչական կարիերան սկսել է 2003 թվականից, աշխատել է ռումինական մի շարք թիմերում, ինչպես նաև լեհական, չինական, արաբական մի շարք ակումբներում։ 2017/18 մրցաշրջանում գլխավորել է «Կլուժը», այնուհետև մեկ տարի աշխատել Չինաստանում և 2019-ին նորից վերադարձել Տրանսիլվանիա։
Տրանսիլվանիայի թիմն իր տնային հանդիպումները անցկացնում է Կոնստանտին Ռեդուլեսկու անվան մարզադաշտում, որը տեղավորում է 23,500 հանդիսական։
Մարզադաշտը կառուցվել է 1973 թվականին և վերակառուցվել 2008-ին։ Սկզբնական անվանումը եղել է «Գրույա», բայց հետո այն անվանվել է Ռումինիայի հավաքականի լեգենդար մարզչի անունով։
Ռումինական թիմը եվրագավաթներում հայկական թիմի հետ հանդիպման փորձ արդեն ունի․ 2018-ին Երևանի «Ալաշկերտը» Եվրոպա Լիգայի խաղարկության շրջանակներում մրցել է «Կլուժի» դեմ (0:2, 0:5)։ Ի դեպ, «Փյունիկի» կազմում կան ֆուտբոլիստներ՝ ի դեմս Ուրոշ Նենադովիչի և Արտակ Դաշյանի, ովքեր «Ալաշկերտի» կազմում մասնակցել են «Կլուժի» դեմ խաղին։
«Փյունիկ»-«Կլուժ» հանդիպումը կցուցադրվի Առաջին ալիքի ուղիղ եթերում, խաղը կկայանա հուլիսի 5-ին, ժամը 20:00-ին, Վազգեն Սարգսյանի անվան Հանրապետական մարզադաշտում։
Վար Բաբայան
