«Բազմիցս ենք մեր հարցերը բարձրացրել Եվրոպական կառույցում: Ինքս լինելով թենիսի Եվրոպայի զարգացման կոմիտեի անդամ, միշտ էլ ասել եմ, որ մեզ պետք է ավելի խոշոր պատանեկան մրցաշարեր անցկացնել, քանի որ մենք թենիսային զարգացող երկիր ենք: Մոտ մեկ ամիս առաջ զարգացման կոմիտեի նիստն էր: Այնտեղ նույնպես բարձրացրեցի այս հարցը: Որոշ ժամանակ անց զանգ ստացա թենիս Եվրոպայի պատանեկան բաժնից և առաջարկեցին, որ Հայաստանում անցկացնենք Եվրոպական պատանիների թիմային առաջնության որակավորման փուլը»,-ասաց Հայաստանի թենիսի ֆեդերացիայի գործադիր տնօրեն Գևորգ Կարամանուկյանը՝ անդրադառնալով Երևանում կայացած պատանեկան միջազգային խոշոր մրցաշարին:
Հունիսի 26-ից 28-ը Երևանում անցկացվեց 2022 թվականի թենիսի Եվրոպական ամառային գավաթի A գոտու որակավորման շրջանի թիմային մրցաշարը` մինչև 14 տարեկան տղաների մասնակցությամբ։
Հայաստանի թենիսի ֆեդերացիան տարվա ընթացքում անցկացնում է մեծ քանակությամբ պատանեկան մրցաշարեր: Այս տարի պլանավորված է 17-ը, բայց պատանեկան տարիքի այսպիսի կարևոր մրցաշար Հայաստանն ընդունում է առաջին անգամ: Նախկինում Հայասատանն ընդունել է նաև Դեվիսի գավաթի եւ ֆեդերացիայի գավաթի հանդիպումներ, բայց 2009 թվականից հետո նման խոշոր մրցաշար Երևանում չի անցկացվել։ Ֆեդերացիայի գործադիր տնօրենի խոսքով կային կազմակերպչական մի շարք հարցեր, բայց Հայաստանը կարողացավ պատշաճ անցկացնել մրցաշարը.
«Սա պատանեկան խոշոր մրցաշար է: Կային կազմակերպչական շատ հարցեր: Ընդունող կողմը պարտավոր է հոգալ բոլորի հյուրանոցային, տրանսպորտային ու մի շարք այլ հարցեր: Այս բոլորը կախված է ծախսերի հետ: Եվրոպան մեզ աջակցել էր միայն գնդակների հարցերով: Մնացած ամեն ինչը եղել է մեր ֆեդերացիայի վրա: Մենք դիմել ենք ԿԳՄՍ-ին ու շնորհակալ ենք նրանցից, որ ստացանք աջակցություն ու անցկացրեցինք այս մրցաշարը՝ նոր ստանդարտներով ու բարձր որակի: Շնորհակալ եմ նաև մեր բոլոր գործընկերներից»,-խոսելով մրցաշարն ընդունելու դժվարությունների մասին ասում է ֆեդերացիայի գործադիր տնօրենը:
Հայաստանի թենիսի ֆեդերացիան կարևում է Հայաստանում միջազգային մրցաշարերի անցկացումը, քանի որ դա առաջին հերթին օգուտ է պատանի հայ թենիսիստներին:
«Հայաստանում մրցաշարեր անցկացնելու գլխավոր նպատակներից մեկն այն է, որ մեր պատանի թենիսիստները նույնպես կկարողանան մասնակցել այդ մրցաշարերին: Դա անում ենք հանուն մարզաձևի զարգացման: Թենիսը արիստոկրատ ու թանկ մարզաձև է: Ամեն մարզիկ պետք է տարեկան խաղա 10-ից ավելի միջազգային մրցաշար, որպեսզի կարողանա իր վարկանիշն ունենա: Դա շատ ծախսատար է, իսկ այստեղ մրցումների անցկացումը նպաստում է, որ մեր մարզիկներն առանց գումար ծախսելու կարողանան մասնակցել միջազգային մրցաշարերին և վաստակել վարկանիշային միավորներ: Մենք ուզում ենք սա դարձնել ավանդույթ, որ Հայաստան բերենք նման խոշոր մրցաշարեր: Դա կնպաստի թենիսի զարգացմանը Հայաստանում ու մարզաձևի մասսայականությանը»,-ասում է Կարամանուկյանը:
Եվրոպայի առաջնության որակավորման շրջանն անցկացվում է 4 երկրում: Երևանում կայացել են Ա զոնայի հանդիպումները, որին մասնակցել է 8 թիմ: Հայաստանի հավաքականը անցկացրած 3 խաղից հաղթեց մեկում, ու գրավեց 6-րդ տեղը: Մրցաշարի հաղթող դարձավ Գերմանիայի թիմը, որը եզրափակիչում հաղթեց Բուլղարիայի ընտրանուն: Այս երկու հավաքականները կմասնակցեն Եվրոպայի պատանեկան թիմային առաջնության եզրափակիչ փուլին:
Խոսելով Հայաստանում թենիսի ապագայի մասին, ֆեդերացիայի գործադիր տնօրենն ասաց.
«Պետք է ռեալ նայել, բայց հուսով ենք, որ լավ է լինելու: Դրա համար պահանջվում է շատ մեծ ներդրում ու մեծ աշխատանքներ, որոնք տարվում են՝ ծրագիրը կա: Սա մեր բոլորի աշխատանքն է և իրար օգնելու դեպքում կհասնենք մեծ բարձունքների»,-նշեց Կարամանուկյանը:
