Հայաստանի մինչև 21 տարեկանների հավաքականը Եվրո-2021-ի ընտրական փուլի 4-րդ տուրում Ավանի ակադեմիայի մարզադաշտում ընդունեց Իտալիայի Մ21 հավաքականին ու նվազագույն հաշվով պարտություն կրեց։
Հանդիպման միակ գնդակը խաղի 20-րդ րոպեին հեղինակեց Ջանլուկա Սկամական՝ մոտ տարածությունից գլխի հարվածով գրավելով Սևակ Ասլանյանի դարպասը։
Հայաստանի երիտասարդական հավաքականը, չնայած պարտությանը, բավականին լավ տպավորություն թողեց, պայքարեց մինչև վերջ ու գոլային մի շարք պահեր ստեղծեց մրցակցի դարպասին, սակայն չկարողացավ հաջողությամբ եզրափակել գրոհները։
Տպավորիչ էր նաև Ռուդիկ Մկրտչյանի՝ մոտ 40 մետրից կատարած հեռահար հարվածը, որից հետո, սակայն, գնդակը փոքր-ինչ բարձր ընթացավ։
Հայաստանի Մ21 հավաքականն ամբողջ խաղի ընթացքում ստացավ երկրպագուների անմնացորդ աջակցությունը ու մինչև վերջին րոպեները լարված պահեց Ավանի ակադեմիայի մարզադաշտում հավաքված հանդիսականներին։
Հանդիպման ավելացված րոպեներին էլ Վահան Բիչախչյանը տուգանայինի մատույցներից անչափ վտանգավոր հարված կատարեց իտալացիների դարպասին, սակայն մրցակցի դարպասապահը մատների ծայրով շեղելց գնդակի ուղղությունն ու այն հետ մղվեց դարպասաձողից։
Այս հաղթանակի շնորհիվ Իտալիայի Մ21 հավաքականն իր միավորների թիվը հասցրեց 7-ի ու բարձրացավ A խմբի մրցաշարային աղյուսակի 2-րդ հորիզոնականը։ Մեր ընտրանին 3 միավորով 5-րդն է։