«Վելեսի» կիսապաշտպան Արթուր Գալոյանը, որն օրերս ստացավ հայկական անձնագիր և ելույթ կունենա Հայաստանի հավաքականում, զրուցել է Match TV-ի հետ։
«Մինչև «Տորպեդո» տեղափոխվելը ինձ չընդունեցին ԲԿՄԱ-ի ակադեմիա։ Մեկ շաբաթ այնտեղ մարզվեցի, որից հետո մարզիչը հարազատներիս ասաց, որ հասակս կարճ է։ Նա առաջարկեց, որ մեկ տարի հետո մի անգամ էլ փորձեմ, բայց հայտնի ասացվածք կա՝ մենք ձեզ կզանգահարենք (ժպտում է)։
Այնպես չէ, որ շատ ծանր տարա այդ փաստը։ Նույն ժամանակահատվածում եղավ «Տորպեդոյի» տարբերակը, որը ևս շատ լավն էր։ Նոր ակումբիս նախագահը կին էր՝ Ելենա Ելինցևան, որի հետ հիանալի աշխատանքային հարաբերություններ ենք ունեցել։ Նա միշտ մոր պես էր վերաբերվում ակադեմիայի ֆուտբոլիստներին։
Երբ հեռանում էի «Տորպեդոյից», գլխավոր մարզիչ Սերգեյ Իգնաշևիչի հետ որոշ անհամաձայնություններ եղան, բայց չեմ ցանկանում խոսել անցյալի մասին։ Նա շատ նպատակասլաց մարզիչ է և շատ է սիրում աշխատասեր ֆուտբոլիստներին։
Շատ եմ աշխատել տուգաննայիններիս վրա։ Փորձում էի կիրառել այն հնարքները, որոնք օգտագործում էին Պիռլոն, Դավիթ Լուիսը, Ժունինյոն։ Այժմ արդեն քիչ եմ նայում այդպիսի տեսանյութեր և փորձում եմ մարզումների միջոցով հետաքրքիր լուծումներ գտնել։
Համապատասխանու՞մ եմ ՌՊԼ-ի մակարդակին։ Կարծում եմ՝ այնտեղ արտասովոր ոչինչ չկա։ Իհարկե, այնտեղ արագություններն այլ են, և պետք է ավելի արագ մտածել, բայց դա կարճ ժամանակում կարելի է շտկել։
Անկեղծ ասած, մինչև հիմա չեմ հասկանում, թե ինչու չստացվեց պայմանագիր կնքել ԲԿՄԱ-ի հետ։ Իմ ներկայացուցչին ոչ մի կոնկրետ պատասխան չտվեցին։ Իհարկե, որոշ դժվարություններ ունեի, բայց «Վելեսում» մի քանի խաղ խաղալուց հետո ամեն բան տեղն ընկավ։ Այս պահին անգամ չեմ հիշում կատարվածի մասին։
ԲԿՄԱ-ի հետ հավաքի մասնակցելու ընթացքում ինձ ամենաշատը տպավորել է Էջուկեն։ Ոչ ոք չէր կարողանում նրանից գնդակ խլել։ Ախմետովը ևս տեխնիկապես լավ պատրաստված ֆուտբոլիստ էր։ Կառանձնացնեմ նաև Մարադիշվիլիին։
Ինչքանով տեղյակ եմ, ձմռանը բելգիական «Գենտը» բավականին լրջորեն հետաքրքրված էր իմ ծառայություններով։ Սկզբում ցանկանում էին ձեռք բերել տրանսֆերս, այնուհետև որոշեցին վարձակալել՝ հետագայում տրանսֆերը գնելու իրավունքով։
Հետագայում ամեն ինչ ընդհատակ անցավ։ Շատ կցանկանայի Եվրոպա տեղափոխվել, քանի որ աճ գրանցելու տեսանկյունից լավ որոշում կլիներ։ Ամեն դեպքում, հիմա մտածում եմ լավ խաղալու մասին, որ կարողանամ Ազգերի Լիգայի խաղերի ժամանակ լավ մարզավիճակում գտնվել»։
