Հայաստանի մարմնամարզության ֆեդերացիան այսօր հայտարարություն տարածեց՝ Նատալյա Ռոտենբերգին գեղարվեստական մարմնամարզության գծով փոխնախագահի պաշտոնից ազատելու մասին:
Հատկանշական է, որ նախկին մարզուհի, բալետի պարուհի Նատալյա Ռոտենբերգը փետրվարի սկզբին էր նշանակվել Հայաստանի մարմնամարզության ֆեդերացիայի գեղարվեստական մարմնամարզության գծով փոխնախագահի պաշտոնում:
Ֆեդերացիայի նախագահ Գագիկ Վանոյանն ArmSport-ի հետ զրույցում խոսել է նման որոշման պատճառների մասին:
«Միայն կարող եմ ասել, որ մեր ֆեդերացիան ապաքաղաքական կառույց է: Ես թույլ չեմ տա, որ որևէ կերպ փորձ արվի մարզաձևը քաղաքականացնելու».- ասել է Գագիկ Վանոյանը՝ չցանկանալով այլ մանրամասներ հայտնել:
Գագիկ Վանոյանն ասում է՝ այս 2 ամսում որոշակի աշխատանքներ արվել են.«Բայց պետք չէր շեղվել նախապես որդեգրված ուղուց»:
Ֆեդերացիայի նախագահն ասում է՝ շարունակելու են բնականոն աշխատանքը՝ գեղարվեստական մարմնամարզությունը զարգացնելու ուղղությամբ. «Ամեն ինչ անելու ենք, որ այն հաջողություն ունենա: Ի դեպ կգործի նույն սկզբունքը՝ եթե կլինեն մարդիկ, ովքեր ցանկություն կունենան աջակցելու, պատրաստ կլինենք քննարկել»:
Նատալյա Ռոտենբերգի նշանակումից հետո գեղարվեստական մարմնամարզության հավաքականում մարզչական փոփոխություն տեղի ունեցավ. ավագ մարզիչ Գայանե Ներսիսյանին փոխարինեց Զառա Գրիգորյանը: Ֆեդերացիայի նախագահի խոսքով՝ մարզիչը կշարունակի իր աշխատանքը. «Ինքն իր առջև ունի դրված խնդիր: Կշարունակի աշխատել»: