Ֆրանսիայի Մոնպելյե քաղաքում տեղի ունեցած գեղասահքի Աշխարհի առաջնությանը ներկա է գտնվել ArmSport-ի թղթակից Մարիա Բաղդասարովան, որտեղ Թինա Կարապետյան-Սիմոն Պրոուքս-Սենեկալ պարային զույգը գրանցեց Հայաստանի լավագույն արդյունքը գեղասահքի աշխարհի առաջնություններում։
Հայաստանը ներկայացնող գեղասահորդներ Թինա Կարապետյանը և Սիմոն Պրոուքս-Սենեկալը զբաղեցրին 14-րդ հորիզոնականը Ֆրանսիայի Մոնպելյե քաղաքում տեղի ունեցած գեղասահքի աշխարհի առաջնությունում։ Դա լավագույն ցուցանիշն է, որը երբևէ գրանցել է Հայաստանը գեղասահքի աշխարհի առաջնություններում։ Զույգը մրցաշարի երկու ելույթներում էլ մոտ էր գերազանցելուն իրենց լավագույն ցուցանիշը։ «Սուդ դե Ֆրանսում» հավաքված հանդիսատեսը մեծ խանդավառությամբ դիմավորեց Հայաստանը ներկայացնող պարային զույգին, որը ռիթմիկ պարի ելույթում հանդես եկավ Արետա Ֆրանկլինի կատարման ներքո։ Մրցավարական որոշմամբ նրանք արժանացան 68.50 միավորի, որը գրեթե երեք միավորով ավելի էր, քան Եվրոպայի առաջնության և Պեկինի ձմեռային Օլիմպիական խաղերի ռիթմիկ պարերի ելույթներում գրանցած արդյուքները։
«Ռիթմիկ պարում ամեն ինչ մեզ մոտ լավ ընթացավ․ Սիմոնը և ես գոհ ենք մեր ելույթից և տեխնիկապես կատարեցինք ամեն ինչ ավելի լավ, քան ձմեռային Օլիմպիական խաղերում, ու արժանացանք ավելի բարձր գնահատականների նույն էլեմենտների համար։ Մեզ համար մեծ պատիվ էր նման միջավայրում ու նման աջակցության պայմաններում հանդես գալ։ Դա մեզ ուժ էր տալիս և հենց դա օգնեց դրական էներգիայով լցված դուրս գալ սառույց և վայելել մեր ելույթը»,- ArmSport-ի հետ զրույցում ելույթից անմիջապես հետո նշեց Թինա Կարապետյանը։
Հայաստանի ներկայացուցիչ մոնրեալաբնակ զույգը ազատ ծրագիրն ավարտեց 13-րդ տեղում 101.82 միավորով։ Ելույթի ընթացքում հնչեցին ‘Autumn Leaves’ և ‘Luck be a Lady’ կատարումները։
«Այստեղ մենք մի քիչ ավելի նյարդային էինք. մարզումային սահքի ընթացքում սահադաշտը մի պահ քաոս էր հիշեցնում և ես անգամ վայր ընկա, բայց երբ երաժշտությունը միացավ ու մենք սկսեցինք միասին սահել, զգացինք կատարումն ու սկսեցինք անել այն, ինչ արել ենք ամբողջ մրցաշրջանի ընթացքում։ Ելույթը լավ ընթացավ, ու սառույցից դուրս եկանք մեծ բավականություն ստացած։ Չեմ ասի, որ ելույթը տեխնիկապես մաքուր էր: Սիմոնի թվիզլը (twizzle) միայն բարդությամբ գնահատվեց որպես առաջին մակարդակի, իսկ պահումը՝ երրորդ, բայց, ընդհանուր առմամբ, լավ ժամանակ անցկացրինք։ Կարող եմ միայն նշել, որ շատ հաճելի էր նման ակտիվ և ուրախ հանդիսական տեսնել, քանի որ մենք այս համավարակի հետևանքով արդեն մոռացել էինք, թե ինչ է նման պայմաններում հանդես գալը»,- ելույթից հետո ընդգծեց Թինա Կարապետյանը։
Հանրագումարում Թինան և Սիմոնը վաստակեցին 170.32 միավոր և ավարտեցին 14-րդ տեղում, որը Հայաստանի երբևէ գրանցած լավագույն արդյունքն է գեղասահքի աշխարհի առաջնություններում։ Նախորդ լավագույն ցուցանիշը Հայաստանի պարային զույգը գրանցել էր 2005 թվականին Մոսկվայում, երբ Անաստասիա Գրեբյոնկինա-Վազգեն Ազրոյան զույգը գրավել էր 17-րդ հորիզոնականը։
Այդ կերպ Թինա Կարապետյան — Սիմոն Պրոուքս-Սենեկալ պարային զույգն ավարտեց մրցաշրջանը բարձր նոտայի վրա՝ հասնելով իր առջև դրված բոլոր նպատակներին։ Զույգը հաջողությամբ որակավորվեց ձմեռային Օլիմպիական խաղեր, իսկ այնտեղ արդեն նվաճեց եզրափակիչ փուլի ուղեգիր՝ մրցաշրջանն ավարտելով Մոնպելյեում ընթացած Աշխարհի առաջնության եզրափակիչ ելույթներով։
Ամփոփելով մրցաշրջանը՝ Թինա Կարապետյանը մասնավորապես նշեց․ «Մեր հիմնական նպատակն էր լավ կատարել ազատ ծրագիրն ու լինել լավագույն 15-ում, որը ևս հաջողեցինք։ Սա մրցաշրջանն ավարտելու լավագույն տարբերակն էր։ Ես իրոք հպարտ եմ, թե ինչպես անցկացրինք այս տարին ու ես կարծում եմ, որ մենք կարող ենք ավելին անել, շարժվել առաջ։ Դա այն է, ինչ նպատակադրված ենք անել»։
Հիշեցնենք, որ Թինա Կարապետյանը դահուկավազորդ Միքայել Միքայելյանի հետ միասին Հայաստանի դրոշակակիրներն էին այս տարի Պեկինում ընթացած ձմեռային Օլիմպիական խաղերում։ «Ես կհիշեմ ձմեռային խաղերում մեր մասնակցությունն ամբողջ կյանքի ընթացքում։ Բացման արարողությունը փառահեղ էր՝ տեսնել օլիմպիական օղակները, պահել պետական դրոշը, այդ ամենը մեծագույն պատիվ էր։ Մենք իրոք լավ սահեցինք, արեցինք մեր լավագույնը՝ վայելելով այդ պահը։ Շատ ազդեցիկ էր։ Լինել վերջապես Օլիմպիական խաղերի մասնակիցների շարքում՝ այս բոլոր փորձություններից հետո, իրոք հաճելի էր»,- վերհիշեց Թինան ArmSport-ի հետ զրույցում։
Մոնպելյեում ընթացած Աշխարհի առաջնությունում պարային զույգերի պայքարում պատվո հարթակը կիսած երեք զույգերն էլ, մարզիչներ Մարի-Ֆրանս Դուբրիլի, Պատրիս Լյուզոնի և Ռոման Հագուենաուերի գլխավորությամբ, մարզվում են Մոնրեալի «Սառցե Ակադեմիայում», որտեղ մարզվում են նաև Հայաստանի ներկայացուցիչները։ Վերջին Օլիմպիական խաղերի չեմպիոն, Ֆրանսիան ներկայացնող Գաբրիելլա Պապադակիս/Գիյոմ Սիզեղոն զույգը սեփական պատերի ներքո նվաճեց հինգերորդ անընդմեջ չեմպիոնական տիտղոսը, իսկ Մեդիսոն Հյուբել/Զախարի Դոնոհյու, Մեդիսոն Չոք/Իվան Բեյթս երկու զույգն էլ ԱՄՆ-ից գրավեցին համապատասխանաբար երկրորդ և երրորդ հորիզոնականները՝ արժանանալով արծաթե և բրոնզե մեդալների։
Հեղինակ՝ Մարիա Բաղդասարովա
Թարգմանությունը՝ Գևորգ Ղազարյանի