Ապրիլի 1-ից 3-ը Երևանում պետք է անցկացվեր կիոկուշին կարատեի Եվրոպայի առաջնությունը, սակայն այն անորոշ ժամանակով հետաձգվել է՝ կապված աշխարհում տիրող պատերազմական դրության և դրա հետևանքների հետ: Մասնավորապես, այս առաջնությանը նախատեսվում էր մեծաթիվ ռուս մարզիկների մասնակցություն, սակայն եվրոպական ֆեդերացիան պահանջ է դրել Ռուսաստանի հավաքականին արգելել մասնակցել մրցաշարին:
Հայաստանի Կիոկուշին կարատեի ֆեդերացիայի նախագահ Անդրանիկ Հակոբյանն ArmSport-ի հետ զրույցում նշել է, որ իրենք, չցանկանալով քաղաքականացնել սպորտն ու նաև հաշվի առնելով Ռուսաստանի հետ դաշնակցային հարաբերությունները, չեն գնացել այդ քայլին. «Եվրոպական ֆեդերացիան պահանջ էր դրել՝ եթե արգելենք Ռուսաստանին մասնակցել, կկարողանանք անցկացնել Եվրոպայի առաջնությունը, բայց մենք նման բան չէինք կարող անել: Եղել են նաև երկրներ, որոնց հենց պետական մակարդակով արգելվել է մասնակցել մրցաշարին: Ստեղծված իրավիճակում, ստիպված էինք հետաձգել Եվրոպայի առաջնությունը»:
Այդուհանդերձ, եղել են նաև երկրներ, որոնց ներկայացուցիչներն արդեն իսկ տոմսեր էին ձեռք բերել Հայաստան ժամանելու համար և այլևս չէին կարող վերադարձ կատարել: Հայաստան ժամանող մարզիկների համար ֆեդերացիան որոշել է ապրիլի 2-ին անցկացնել Կիոկուշին կարատեի «Գրանդ Պրի»: Առաջնությունը կկայանա «Միկա» մարզադահլիճում:
Անդրանիկ Հակոբյանի խոսքով, «Գրանդ Պրիի» առաջնության համար Հայաստան է ժամանելու եվրոպական ֆեդերացիայի նախագահը, իսկ առաջնության ավարտից հետո սեմինար է անցկացվելու:
