🎥📷Երազանքից՝ իրականություն․ Լոռու մարզը ֆուտբոլային նոր թիմ ունի

Լոռու մարզի Շնող համայնքն արդեն իր մանկապատանեկան ֆուտբոլային թիմն ունի։ Սուրեն Մելիքսեթյանի, նրա ռուսաստանաբնակ ընկերների ու «Hay Mitq» հասարակական կազմակերպության ջանքերով մարզի երեխաներն իրենց առօրյան արդեն ֆուտբոլի շուրջ են կառուցում։

ArmSport-ը ակումբի համահիմնադիր Սուրեն Մելիքսեթյանի հետ զրուցել է դրա ստեղծման գաղափարի, նպատակների և ընթացքում գտնվող գործերի մասին։

-Ինչպե՞ս և ո՞ւմ մոտ է առաջացել ֆուտբոլային ակումբը ստեղծելու միտքը։

— Նման միտք ունեցել եմ շատ վաղուց։ Առհասարակ, ես նախընտրում եմ երազանքներով ապրելու փոխարեն իմ առջև դնել նպատակներ և հասնել դրանց։ Այս մեկը, սակայն, ավելի շատ երազանքի էր նման, քանի որ նախագծի իրագործման համար շատ հանգամանքներ պետք է համընկնեին։

Կոնկրետ տվյալ նախագծի վերաբերյալ առաջին խոսակցությունները եղել են 2021 թվականի դեկտեմբերին, երբ ռուսաստանաբնակ ընկերներս առաջարկեցին նման գաղափար։ Շատ կարճ քննարկումներից հետո վերջնական որոշում կայացրինք՝ այն կյանքի կոչել։ Այդպես մեկնարկեցին տարատեսակ աշխատանքներ, որոշ մարդկանց հետ բանակցություններից մինչև գույքի ձեռքբերում։

-Ինչո՞ւ հենց Լոռիում, Շնողում։

-Սկզբնական փուլում կոնկրետ վայրը որոշված չէր։ Մի քանի տարբերակներ էին քննարկվում, բայց քանի որ Շնողը համարվում է ծննդավայրս, և բոլոր հարազատներս առ այսօր այնտեղ են ապրում, առիթը չէի կարող բաց թողնել։

-Հիմա ակումբի գործերն ի՞նչ փուլում են։

-Բացման արարողությունը տեղի ունեցավ փետրվարի 26-ին։ Մարտի 1-ից մեկնարկել են մարզումները։

-Քանի՞ երեխա է մարզվում այս պահին։

-Նախատեսել էինք սկզբնական շրջանում ինտեգրել 40 երեխայի, սակայն, քանի որ ցանկացողները շատ էին, այս պահին մոտավորապես 50 երեխա է անդամագրվել։ Ընդունելությունը դադարեցրել ենք, քանի որ նախ մեզ համար ևս լուրջ մարտահրավեր է, պետք է մենք էլ մտնենք հունի մեջ։ Հետո էլ ֆինանսական միջոցները ևս համեստ են, և այս փուլում ավելի շատ երեխաներ պարզապես նպատակահարմար չենք համարում ընդունել։ Ուզում եմ ընդգծել, որ գյուղապետարանն էլ իր աջակցությունն է ցուցաբերում։

-Ովքե՞ր են մարզում երեխաներին։

-Մարզիչը Վոլոդյա Թումանյանն է։ Հետագայում նախատեսում ենք մեր մարզչին ուղարկել ՀՖՖ-ում անցկացվող մարզչական դասընթացների, որ ունենանք լիցենզավորված մարզիչ։

-Դու ի՞նչ դեր ունես ակումբում։

-Դե, ինչպես ասում են, ակումբի հիմնադիրներից մեկն եմ, բայց, իհարկե, միայնակ չեմ, ռուսաստանաբնակ ընկերներս և «Hay Mitq»-ը իրենց մեծ լուման ունեն այս գործում։
Հատուկ ցանկանում եմ ընդգծել իմ համագյուղացի Արեգ Պապյանի դերը, որը ևս մեծ օգնություն է ցուցաբերել և ցուցաբերում բոլոր կազմակերպչական հարցերում։

-Ի՞նչ նպատակներ ու առաջադրանքներ ունի այս ակումբը։

-Ամենափոքր նպատակն այն է, որ երեխաները զբաղվեն իրենց սիրելի մարզաձևով։
Սակայն ես երեք փուլով եմ պատկերացնում այս նախագիծը։
Առաջին․ մի քանի ամիս մարզվելուց հետո կմասնակցենք սիրողական հանդիպումների և մրցաշարերի։
Երկրորդ․ եթե առաջին փուլում արդյունքները գոհացնեն, ստուգողական հանդիպումներ կանցկացնենք հայկական պրոֆեսիոնալ ակումբների մանկապատանեկան թիմերի հետ, որպեսզի փորձենք մեր ուժերը այդ մակարդակում։
Երրորդ․ եթե երկրորդ փուլում ևս ամեն բան մեր նախատեսածի պես ընթանա, հայտ կներկայացնենք մասնակցելու Հայաստանի մանկապատանեկան առաջնությանը, որը մեր երկրում ամենաբարձր մակարդակն է։

-Ակումբի անվան փոփոխություն նախատեսվո՞ւմ է, թե՞ ոչ։

-Այժմ որպես անուն ընտրել ենք Hay Mitq Football School, բայց երբ գա ժամանակը, որ պաշտոնական մրցումների մասնակցենք, ամենայն հավանականությամբ, կունենանք նոր անվանում։ Այդ ամենը ևս քննարկման փուլում է։ Որոշ ժամանակ մարզվելուց հետո կունենանք նաև պատշաճ մակարդակի հանդերձանք, այժմ մարզումային ծրագրի համար նախատեսված ամեն ինչ ունենք, բայց ձեռք ենք բերելու նաև մարզահագուստ։

Ստելլա Բաբլոյան