Երկու հարավկորեացի ֆուտբոլային երկրպագուներ, որոնք դատի են տվել «Յուվենտուսի» հետ ընկերական խաղի կազմակերպիչներին, շահել են գործը և ստացել ֆինանսական փոխհատուցում: Այդ մասին հայտնում է Reuters-ը:
2019-ի հուլիսին, նախամրցաշրջանային շրջագայության ընթացքում, «Յուվենտուսը» ընկերական հանդիպում անցկացրեց կորեական Կ-լիգայի աստղերի թիմի դեմ: Ռոնալդուն, կազմակերպիչների հավաստիացմամբ, պետք է խաղար առնվազն մեկ խաղակես, բայց ի վերջո խաղադաշտ դուրս չեկավ: Որոշ երկրպագուներ խաղի տոմսեր են գնել բացառապես Ռոնալդուին տեսնելու համար, և հիասթափվել են, որ պորտուգալացին չի խաղացել:
Դրանից հետո մի շարք դժգոհ երկրպագուներ դատական հայց ներկայացրեցին այդ խաղի կազմակերպմիչ ՝ «Fasta Inc» ընկերության դեմ:
Ի վերջո, Ինչհոնի շրջանի դատարանը որոշում կայացրեց, որ «Fasta Inc»-ը 371,000 վոն (մոտ 310 դոլար) կվճարի հայցադիմում ներկայացրած երկու երկրպագուներից յուրաքանչյուրին:
