Հաշված օրեր են մնացել VBET Հայաստանի Պրեմիեր Լիգայի վերսկսմանը։ Բոլոր ակումբները վերջին նախապատրաստական աշխատանքներն են կատարում՝ կազմերը վերջնական տեսքի բերելով և ստուգողական հանդիպումներ անցկացնելով։
Այս անգամ ArmSport-ի ուշադրության կենտրոնում է հայտնվել «Նորավանքը», որը զգալիորեն փոխել է կազմը։
Վահե Գևորգյանի գլխավորած ակումբը մրցաշրջանից առաջ ԲԿՄԱ-ի հետ միասին «Քարտ-բլանշ» ստացած երկու ակումբներից մեկն էր, որոնք իրավունք ստացան մասնակցելու Բարձրագույն խմբի առաջնությանը։ Վայոց Ձորը ներկայացնող ակումբը չհասցրեց, ինչպես հարկն է, պատրաստվել մրցաշրջանին։ Այդ մասին մի քանի անգամ նշել է գլխավոր մարզիչը։ Այնուամենայնիվ, պետք է փաստել, որ հանդիպումների գերակշիռ մասում թիմը ամուր մրցակցություն ցույց տվեց հակառակորդներին, և վերջինիս դեմ կայացած խաղերում բոլոր մրցակիցները մեծ ջանքեր էին գործադրում՝ հաղթանակի հասնելու համար։
Մրցաշրջանի առաջին կեսի ավարտից հետո «Նորավանքը» ինը թիմերի պայքարում զբաղեցնում է նախավերջին՝ 8-րդ հորիզոնականը։ Չնայած անբավարար արդյունքներին՝ ցուցադրած խաղում նկատելի էր մարզչական «ձեռագիր»։ Վահե Գևորգյանը բավականին երիտասարդ մասնագետ է և դեռևս երկար ճանապարհ ունի անցնելու, սակայն նրա գլխավորած թիմը «ավտոբուսային» պաշտպանություն կառուցելու փոխարեն փորձում է հնարավորինս որակյալ ֆուտբոլ ցուցադրել։
Փոխարենն ակումբը հիանալի է հանդես գալիս VBET Հայաստանի Գավաթի խաղարկությունում, որտեղ դուրս է եկել կիսաեզրափակիչ՝ հաղթահարելով «Շիրակի» և առաջնության առաջատար «Արարատ-Արմենիայի» արգելքները։ Կիսաեզրափակչում Գևորգյանի սաները կմրցեն «Արարատի» հետ։ Գավաթի խաղարկությունը հիանալի հնարավորություն է «Նորավանքի» համար՝ տիտղոս նվաճելու և եվրագավաթների ուղեգիր ձեռք բերելու հարցում։
Ձմեռային տրանսֆերային պատուհանի ընթացքում «Նորավանքը» ամենաակտիվներից մեկն էր և գրեթե ամբողջությամբ «թարմացրել» է կազմը։ Մի շարք նորեկների մեջ աչքի է զարնում 25-ամյա նիգերիացի հարձակվող Իբրահիմ Շուաիբուն, որը Նորվեգիայի Բարձրագույն խմբի առաջնությունում մասնակցել է 80-ից ավելի հանդիպման՝ դառնալով 15 գոլի հեղինակ։ Իբրահիմը 300 հազար եվրո տրանսֆերային արժեքով համարվում է «Նորավանքի» ամենաթանկարժեք ֆուտբոլիստը։
Ուշադրություն է գրավում նաև 21-ամյա նիգերիացի հարձակվող Յենե Տենտոյի տրանսֆերը։ Վերջինս մի քանի մրցաշրջան անցկացրել է Սլովակիայում՝ հանդես գալով «Ժիլինայի» երկրորդ թիմում և «Սենիցայում»։ Աֆրիկացին ընդհանուր առմամբ 36 հանդիպում է անցկացրել Ֆորտունա Լիգայում՝ դառնալով 3 գոլի և 5 արդյունավետ փոխանցման հեղինակ։
Մի շարք լեգեոներներից բացի, ակումբի շարքերն են համալրել նաև բազմափորձ պաշտպան Արթուր Ավագյանը, կիսապաշտպան Արամ Քոչարյանը և դարպասապահ Հենրի Ավագյանը, որոնք ևս զգալիորեն կուժեղացնեն «Նորավանքի» կազմը։
Ակումբի սեփականատեր հանդիսացող Բալյանների ընտանիքը «Նորավանքը» մեծ ակումբ դարձնելու հեռանկարային պլաններ ունի։ Ղեկավարները ցանկանում են հաջորդ մրցաշրջանից մեծացնել մանկապատանեկան թիմերի քանակը, հատուկ ուշադրություն է դարձվում նաև կանանց թիմին, որը ևս մասնակցում է Հայաստանի Բարձրագույն խմբի առաջնությանը։ Ինչպես գիտենք, ընթացքի մեջ էր Վայքի «Արևիկ» մարզադաշտի շինարարությունը։ Եվ ահա, մեզ հայտնի է դարձել, որ փետրվարի 20-ին ԲԿՄԱ-ի դեմ կայանալիք հանդիպումը «Նորավանքը» կանցկացնի ոչ թե Չարենցավանում, այլ հարազատ «պատերի» ներքո՝ «Արևիկում»։
Որպես վերջաբան կարող ենք արձանագրել, որ «Նորավանքը» յուրովի է մոտենում առաջնության երկրորդ հատվածին և հետաքրքիր գույներ է «հաղորդելու» VBET Հայաստանի Պրեմիեր Լիգային։
Սուրեն Մելիքսեթյան
