«Առաջնության ընդհանուր մակարդակը գոհացուցիչ չէր, քանի որ պատճառներ կային: Զինամթերքի պակաս կար, մի փոքր ուշ ենք ստացել, ու մարզումները բնականոն հունով չէին ընթացել, ինչն ազդել էր մարզիկների մարզավիճակի վրա: Ամեն դեպքում, հրաձիգների ցույց տված արդյունքները ցածր չէին: Կային պատանի մասնակիցներ, որոնց արդյունքները նախորդ տարվա համեմատ մեծ աճ են գրանցել ու բարձր ցուցանիշ են ցույց տվել»,-ArmSport-ի հետ զրույցում ասում է Հայաստանի հավաքականի գլխավոր մարզիչ Սեյնար Նիկողոսյանը՝ ամփոփելով հրաձգության Հայաստանի առաջնությունը:
Հայ հրաձիգների համար տարին սկսվեց Հայաստանի առաջնությունով: Հունվարի 21-23-ը կայացած համապետական առաջնությանը մասնակցեց շուրջ 90 մարզիկ՝ Երևանից, Վանաձորից և Գյումրիից:
Մասնակիցները մրցել են 3 ձևում՝ հրացան, ատրճանակ և վազող թիրախ: Առաջնության արդյունքներով ձևավորվել է հավաքական թիմը, որը նախապատրաստվելու է Եվրոպայի առաջնությանը:
«Առջևում Եվրոպայի առաջնությունն է, որին ներկայանալու ենք ուժեղագույն կազմով: Մինչև մրցավայր մեկնելը՝ մարտի 7-18-ը ուսումնամարզական հավաք ենք անցկացնելու Լվովում, որից հետո կմեկնենք Նորվեգիա: Երիտասարդների ու մեծահասակաների առաջնություններում ընդհանուր առմամբ հանդես ենք գալու 12 մարզիկով»,-ասում է հավաքականի մարզիչը:
Հրացան ձևում Հայաստանի առաջնության չեմպիոնի կոչումը նվաճեց Նարեկ Ադամյանը: Նախորդ տարվա չեմպիոն, պատանեկան Օլիմպիական խաղերի և աշխարհի երիտասարդների առաջնության արծաթե մեդալակիր Հրաչիկ Բաբայանն այս տարի գրավեց 4-րդ տեղը: Նրա խոսքով ներքին առաջնությունն իր համար փորձնական բնույթ էր կրում.
«Հայաստանի առաջնության ընթացքում մի շարք փորձարկումներ են արվում, այս անգամ անհաջող ստացվեց, այդ պատճառով մրցանակային տեղ չգրավեց: Քանի որ մեր մարզաձևում միջազգային մրցումների քանակը քիչ է, այդ պատճառով տեխնիկական փոփոխությունները ստիպված փորձարկում եմ առաջնության ընթացքում»,-ամփոփելով իր ելույթներն ասում է բազմափորձ Հրաչիկ Բաբայանը:
Նրա խոսքով Եվրոպայի առաջնությունից առաջ անցկացվելիք ուսումնամարզական հավաքը լավ հնարավորություն է մարզավիճակը բարելավելու համար:
«Հավաքի ընթացքում արդեն կաշխատենք թերությունների վրա: Նախորդ տարի մասնակցել եմ միայն Եվրոպայի առաջնությանն ու Սերբիայի միջազգային մրցաշարին՝ պատճառը կորոնավիրուսով պայմանավորված սահմանափակումներ են: Տեղական մրցումներում չունենք այն պայքարը, ինչը միջազգային մրցումներում է: Հուսով եմ՝ հավաքների միջոցով կկարողանանք գալ մեր նախկին մակարդակին ու լավագույնս ներկայանալ Եվրոպայի առաջնությանը»,-նշում է Հրաչիկ Բաբայանը:
Հրացան մրցաձևի աղջիկների պայքարում առաջին տեղը գրավեց Միլենա Պողոսյանը: Վազող թիրախ ձևում հաղթել է Գոռ Խաչատրյանը: Ատրճանական ձևի աղջիկների պայքարում հավասարը չի ունեցել Էլմիրա Կարապետյանը, տղաների պայքարում ոսկե մեդալ է նվաճել Սևակ Արշակյանը:
Եվրոպայի առաջնությունից բացի հրաձգության Հայաստանի հավաքականը կմասնակցի նաև Աշխարհի առաջնությանը, որը տեղի է ունենալու հոկտեմբերին:
Երվանդ ՀԱԿՈԲՅԱՆ