Գեղասահորդ Սլավիկ Հայրապետյանը վերջին տեղը զբաղեցրեց Տալինում անցկացված Եվրոպայի առաջնությունում: Ասում է՝ կարճ ծրագրում իր ելույթից գոհ է, բայց ահա ազատ ծրագրում ինքն էլ չի հասկանում՝ ինչ կատարվեց իր հետ: Այս մասին ArmSport-ի հետ զրույցում Էստոնիայի մայրաքաղաքից հայտնեց 25-ամյա մարզիկը:
Սլավիկը վնասվածքով էր մասնակցում Եվրոպայի առաջնությանը ու հիմա իր առաջնային ծրագրերից մեկը ոտքը բուժելն է.
«Վաղուց վնասվածք ունեմ, իսկ Տալինում ցավերը շատացան: Միակ բուժումը ժամանակն է, որը չկա: Չեմ սիրում բողոքել կամ հանրայնացնել խնդիրներս: Առաջիկա ծրագրերում ոտքս բուժելն ու լավ մարզավիճակում մնալն է, քանի որ ձմեռային Օլիմպիական խաղերին մասնակցելու մեծ շանսեր կան»,- ասում է Սլավիկ Հայրապետյանը:
Սլավիկի խոսքով, Պեկինում կայանալիք 24-րդ ձմեռային Օլիմպիական խաղերին մասնակցելու համար ինքն առաջին պահեստայիններից է, և եթե որևէ մեկն ինչ-ինչ պատճառներով՝ վիզայի հետ կապված խնդիրներ, վնասվածք, հիվանդություն, չկարողանա մասնակցել Խաղերին, ապա այդ իրավունքը կարող է տրվել հենց իրեն:
Ինչ վերաբերում է Տալինում անցկացված Եվրոպայի առաջնությանը, Սլավիկն ընդգծում է՝ այս քաղաքն իր համար արդեն շատ հարազատ է դարձել, թեև այս անգամ համաճարակային նոր իրավիճակի էին բախվել. «Տալինում մթնոլորտը սովորական էր և քովիդային, որն արդեն նույնպես դարձել է սովորական: Շատ եմ եղել այստեղ, շատ հարազատ քաղաք է դարձել ինձ համար, ու այստեղ ինձ լավ ճանաչում են, շատ ջերմ ընդունեցին»:
Հայ գեղասահորդի խոսքով, միակ բացասական կողմն այն էր, որ, ինչպես ավելի ուշ հայտնի է դարձել, մրցման մասնակիցներից ոմանք քովիդով վարակված են եղել. «Մրցումների ժամանակ այդպիսի մոտ 7-9 դեպք եղավ: Կան մարդիկ, որոնց հետ շփվել ես և մեկ կամ երկու օր հետո իմանում ես՝ ինքնամեկուսացել է, թեստի պատասխանը դրական է եղել: 24 ժամը մեկ թեստավորվում ենք»:
Հիշեցնենք՝ Սլավիկ Հայրապետյանը կարճ ծրագրի արդյունքով հաղթահարել էր որակավորման փուլը, իսկ ազատ ծրագրում վաստակել էր 167,84 միավոր և Եվրոպայի առաջնությունում գրավել 24-րդ հորիզոնականը:
Տղամարդկանց մենասահքում չեմպիոնի կոչումը 286,56 միավորով նվաճել էր Ռուսաստանի ներկայացուցիչ Մարկ Կոնդրատյուկը։ Արծաթե մեդալը նվաճել է իտալացի Դանիել Գրասլը՝ 274,48 միավորով, իսկ լավագույն եռյակը 272,08 միավորով եզրափակել է Լատվիայի ներկայացուցիչ Դենիս Վասիլևը։
Նարե Հովհաննիսյան
