Աշոցքում այսօր՝ հունվարի 15-ին, ավարտվեց Հայաստանի դահուկավազքի առաջնությունը։ Նշենք, որ տղամարդկանց պայքարում հաղթող ճանաչվեց Միքայել Միքայելյանը, իսկ կանանց պայքարում՝ Կատյա Գալստյանը։
Մրցաշարից հետո Միքայել Միքայելյանը զրուցել է լրագրողների հետ։
-Հայաստանի առաջնությունում հերթական անգամ անգերազանցելի էիր, ինչպե՞ս կգնահատես ինքդ քեզ նախաօլիմպիական այս շրջանում։
-Ճիշտն ասած, երեկ և դրանից առաջ երկու դիստանցիաներ ունեինք 10 կմ ազատ և դասական ոճում, դիստանցիան ինձ մոտ այնքան էլ չստացվեց և մտածում էի, որ մարզավիճակս այնքան էլ լավ չէ, սակայն այսօրվա սպրինտից իմ մեջ թեթևություն զգացի, որ մարզավիճակս տեղն է։ Ուղղակի, եթե եղանակային պայմաններն այսպիսին չլինեին՝ բուք էր, մրցում էինք բքին ու չկարողացա ամբողջությամբ ներդնել ուժերս, սակայն այսօր եղանակը լավ էր ու իմ մեջ համոզմունք առաջացավ, որ մարզավիճակս լավ է։
-Ի՞նչ նպատակ ունես Օլիմպիական խաղերում, որովհետև սա քո երկրորդ խաղերն են, արդեն փորձ ունես։
-Խնդիրներ չեմ սիրում իմ առաջ դնել, ուղղակի սիրում եմ մրցումների ժամանակ ամբողջությամբ ներդնել ուժերս և ցույց տալ իմ առավելագույն արդյունքը։ Նախորդ տարվա պես այս տարվա գերագույն նպատակս Աշխարհի առաջնությունում լավագույնս ելույթ ունենալն է, իսկ ՕԽ-ում մինչև վերջ չեմ մնալու, 10-15 օր մնալու եմ այնտեղ, նորից վերադառնամ՝ պատրաստվելու աշխարհի առաջնությանը։
-Իսկ Աշխարհի առաջնությունում ի՞նչ նպատակ ունես։
-Չեմ ուզում ցանկություններից խոսել, ժամանակից առաջ չընկնենք։ Ժամանակը գա, ամեն ինչ կլինի։
-Այս առաջնությունից ի՞նչ սպասելիքներ ունեիք։
-4-5 տարի անընդմեջ, երբ եղբայրս ավարտեց կարիերան, ես գրավեցի նրա տեղը։ Ինչպես ամեն տարի, այս տարի ևս նույնը կրկնվեց։
-Նախապատրաստական շրջանում կարելի է ասել ավելի՞ սահուն է անցել, որ դու ամբողջությամբ պատրաստվես Օլիմպիական խաղերին։
-Այս տարի կարելի է ասել՝ այո։ Նախորդ տարի շատ դժվարություններ կային, չբարձրաձայնենք, բայց այս տարի ամեն ինչ հարթ էր։