Կիոկուշին Կայ կարատեի Հայաստանի ազգային ֆեդերացիայի նախագահ Սպարտակ Գասպարյանն ArmSport-ի հետ զրույցում ամփոփել է տարին: Գասպարյանը պատմել է 2021 թվականին արված աշխատանքների, գրանցած արդյունքների մասին, ինչպես նաև խոսել հաջորդ տարվա հետ կապված անելիքներից.
«Հուլիսից սկսեցինք մեծ մրցաշարերի մասնակցել: Բուլղարիայի Վառնա քաղաքում մասնակցեցինք KWO վարկածով Աշխարհի գավաթին ու մեր 4 մարզիկները դարձան բրոնզե մեդալակիրներ: Օգոստոսին վրանային մարզահավաք ենք ունեցել Սևանում, ինչը շատ եմ կարևորում, քանի որ արդեն մոտ 10 տարի անընդմեջ այդ ճամբարը կազմակերպում ենք, ու փորձը ցույց է տալիս, որ ով կանոնավոր կերպով անցնում է այդ ճամբարը, հետո անպայման Եվրոպայի կամ Աշխարհի մեդալակիր է դառնում:
Սեպտեմբերին Լեհաստանում մասնակցեցինք Եվրոպայի առաջնությանը. 15 մասնակցից 6-ը դարձան առաջին, 3-ը՝ երկրորդ, և մեկը՝ երրորդ մրցանակակիր: Նոյեմբերին լեհական Կրակով քաղաքում 10 մասնակցով մասնակցեցինք Աշխարհի առաջնությանը: Նրանցից երեքը դարձան ոսկե մեդալակիր, չորսը՝ արծաթե, իսկ մեկը՝ բրոնզե: Նույնիսկ ամենալավ երազներում չէի կարող նման բան պատկերացնել: Սա իսկապես շատ մեծ ձեռքբերում էր»,- ասել է Սպարտակ Գասպարյանը՝ ամփոփելով անցնող տարին:
Այդուհանդերձ, Գասպարյանը՝ որպես ամենակարևոր ձեռքբերում, առանձնացնում է ՀՀ ազգային հերոս Վահագն Ասատրյանի անվան մարտարվեստների ակադեմիայի հիմնումը.
«Ամենակարևորի մասին եմ ուզում խոսել. սեպտեմբերին Դավթաշենում բացվեց ՀՀ ազգային հերոս Վահագն Ասատրյանի անվան մարտարվեստների ակադեմիան՝ նրա մանկության ընկեր, բարերար Արմեն Մուրադյանի աջակցությամբ:
Ակադեմիայում մոտ 400-500 մարզիկ է մարզվում: Ակադեմիայի մասնաճյուղն արդեն բացվել է Քասախում՝ հերոսի բնակավայրում, որտեղ շուրջ 100 մարզիկ է մարզվում: Երկու ակադեմիայում էլ՝ Արմեն Մուրադյանի հովանավորությամբ, ձեռք է բերվել բոլորովին նոր մարզագույք և այդ գործընթացը լինելու է շարունակական»,- ընդգծում է Սպարտակ Գասպարյանը:
Ինչ վերաբերում է 2022 թվականի անելիքներին՝ ֆեդերացիայի նախագահը շեշտում է՝ բավականին հագեցած տարի է սպասվում.
«Ապրիլին նախատեսում ենք Հայաստանում միջազգային խոշոր մրցաշար անցկացնել, որին 800-1000 մարզիկ կմասնակցի: Մրցաշարը նվիրվելու է 44-օրյա պատերազմում զոհված բոլոր հերոս տղաներին: Մայիսին մեր հավաքականն Ուկրաինայում կմասնակցի Եվրոպայի 35-րդ առաջնությանը, որին մտադիր ենք հանդես գալ բավականին մեծ կազմով: Իսկ մինչ այդ կզբաղվենք հավաքականի ձևավորմամբ. փետրվարին կանցկացնենք նախընտրական մրցաշար, որի հաղթողները կընդգրկվեն հավաքականում: Հունիսին Օդեսայում միջազգային մրցաշարի կմասնակցենք, իսկ հուլիսին Բուլղարիայում կմասնակցենք Աշխարհի Գավաթ մանկապատանեկան ավանդական մրցաշարին»,- պատմում է Սպարտակ Գասպարյանը:
Ֆեդերացիայի նախագահի խոսքով, 2022 թվականի աշնանն էլ իրենք մտադիր են Հայաստանում շատ հետաքրքիր մրցաշար կազմակերպել: Այն կկրի Վահագն Ասատրյանի անունը և, բացի կիոկուշինից, կներառի ևս 4 մարզաձև: