«Նոայի» նորեկ Արթուր Քարտաշյանն ArmSport-ի հետ զրույցի ընթացքում մեկնաբանել է իր տեղափոխությունը երևանյան ակումբ։
Քարտաշյանի վերջին ակումբը «Սևանն» էր, որը վերջերս էր դուրս եկել VBET Հայաստանի Պրեմիեր Լիգայից։
-Արթուր, շնորհավորում եմ «Նոա» տեղափոխվելուդ կապակցությամբ։ Ինչպե՞ս առաջացավ ակումբի կողմից քո նկատմամբ հետաքրքրվածությունը։
-Շնորհակալ եմ։ Ինձ հետ կապ հաստատեց «Նոայի» մարզական տնօրենը և առաջարկեց միանալ ակումբին, ես էլ սիրով ընդունեցի հրավերը։ Շատ ուրախ եմ, որ հանդես եմ գալու այս ակումբում։
-Ունեի՞ր կարիերադ այլ ակումբներում շարունակելու տարբերակներ, թե՞ քո ծառայություններով միայն «Նոան» էր հետաքրքրված։
-Այո, շատ ակումբներ էին հետաքրքրված իմ ծառայություններով։ Այդ ակումբների կազմում կային ինչպես Հայաստանը ներկայացնող, այնպես էլ արտասահմանյան։ Պարզապես, եղած տարբերակներից կարիերայիս շարունակական աճի համար լավագույնը «Նոա» տեղափոխությունն էր։
-Ի՞նչ կասես «Սևանում» անցկացրածդ ժամանակահատվածի մասին։
-Այն մի մեծ ընտանիք էր։ Հազվադեպ կարող ես հանդիպել նման հրաշալի կոլեկտիվի։ Բնականաբար, շատ կկարոտեմ «Սևանում» անցկացրած ժամանակահատվածը։ Բացառությամբ մեկ հանդիպման, որի ժամանակ որակազրկված էի, մնացած բոլոր խաղերին մասնակցել եմ։ Իսկապես լավ թիմ էր ձևավորվել, և պայքարում էինք ամենաբարձր տեղերի համար։ Ցավոք, ամեն բան վատ ավարտ ունեցավ տհաճ իրադարձությունների պատճառով։
-Ի՞նչ կասես մեր բարձրագույն խմբի առաջնության ներկայիս խաղամակարդակի մասին։ Վերջին տարիներին աճ նկատու՞մ ես։
-Իհարկե, բավականին մեծ առաջընթաց է նկատվում։ Միայն մեկ բան կուզեի ավելացնել․ Շատ կուրախանամ, եթե հայ ֆուտբոլիստներն ավելի շատ խաղալու հնարավորություն ստանան։ Այդկերպ հայ ֆուտբոլիստներն ավելի արագ աճ կգրանցեն, ինչն օգտակար կլինի նաև ազգային հավաքականի համար։
Սուրեն Մելիքսեթյան